National / સરકારે સોનમ વાંગચુક સાથે વાતચીત શરૂ કરી, જેપી નડ્ડા અને જીતેન્દ્ર સિંહે મેદાંતા હોસ્પિટલમાં કરી મુલાકાત

સામાજિક કાર્યકર્તા સોનમ વાંગચુકને દિલ્હી હાઈકોર્ટના આદેશ બાદ સફદરજંગ હોસ્પિટલમાંથી રજા આપવામાં આવી છે અને વધુ સારવાર માટે ગુરુગ્રામની મેદાંતા હોસ્પિટલમાં દાખલ કરવામાં આવ્યા છે. આ દરમિયાન એવા અહેવાલો સામે આવ્યા છે કે સરકારે સોનમ વાંગચુક સાથે વાતચીત શરૂ કરી છે. કેન્દ્રીય મંત્રી જેપી નડ્ડા અને કેન્દ્રીય રાજ્યમંત્રી જીતેન્દ્ર સિંહે મેદાંતા હોસ્પિટલમાં પહોંચીને સોનમ વાંગચુક સાથે મુલાકાત કરી હતી. સૂત્રોના જણાવ્યા અનુસાર બંને મંત્રીઓ ખાસ વાંગચુકને મળવા માટે હોસ્પિટલ પહોંચ્યા હતા.

હોસ્પિટલમાંથી ડિસ્ચાર્જ કરીને ગુરુગ્રામની મેદાંતા હોસ્પિટલમાં દાખલ

દિલ્હી હાઈકોર્ટના આદેશ બાદ સોનમ વાંગચુકને સફદરજંગ હોસ્પિટલમાંથી ડિસ્ચાર્જ કરીને ગુરુગ્રામની મેદાંતા હોસ્પિટલમાં દાખલ કરવામાં આવ્યા હતા. ત્યારબાદ સરકાર અને વાંગચુક વચ્ચે ચર્ચા શરૂ થઈ હોવાના અહેવાલો સામે આવ્યા છે. જોકે આ બેઠકમાં શું ચર્ચા થઈ તે અંગે કોઈ સત્તાવાર માહિતી જાહેર કરવામાં આવી નથી.

28 જૂનથી અનિશ્ચિત સમયની ભૂખ હડતાળ

સોનમ વાંગચુક 28 જૂનથી અનિશ્ચિત સમયની ભૂખ હડતાળ પર છે. તેઓ શિક્ષણ પ્રણાલીમાં જવાબદારીની માંગ સાથે કોકરોચ જનતા પાર્ટી (CJP)ના નેતૃત્વ હેઠળ ચાલી રહેલા વિરોધ પ્રદર્શનને સમર્થન આપી રહ્યા છે. તેમની મુખ્ય માંગણીઓમાં NEET સહિત વિવિધ પરીક્ષાઓમાં પેપર લીકની ઘટનાઓની નિષ્પક્ષ તપાસ, પરીક્ષાઓમાં થયેલી અનિયમિતતાઓ માટે જવાબદારી નક્કી કરવી, કેન્દ્રીય શિક્ષણ મંત્રી ધર્મેન્દ્ર પ્રધાનના રાજીનામાની માંગ અને વિદ્યાર્થીઓના મુદ્દાઓ પર સરકાર જવાબદાર બને તેવી માંગનો સમાવેશ થાય છે.

સફદરજંગ હોસ્પિટલમાં સારવાર માટે દાખલ કરવામાં આવ્યા

સોનમ વાંગચુકને અગાઉ દિલ્હીની સફદરજંગ હોસ્પિટલમાં સારવાર માટે દાખલ કરવામાં આવ્યા હતા. તેમની પત્ની ગીતાંજલિ આંગ્મોએ દિલ્હી હાઈકોર્ટમાં અરજી કરીને વાંગચુકને વધુ સારી સારવાર માટે ગુરુગ્રામની મેદાંતા હોસ્પિટલમાં ટ્રાન્સફર કરવાની મંજૂરી માંગેલી હતી. આ અરજી પર સુનાવણી દરમિયાન દિલ્હી હાઈકોર્ટે તાત્કાલિક તેમને મેદાંતા હોસ્પિટલમાં ખસેડવાનો આદેશ આપ્યો હતો.

નિષ્ણાત ડોક્ટરો દ્વારા સતત દેખરેખ રાખવી જરૂરી

હાઈકોર્ટે પોતાના આદેશમાં જણાવ્યું હતું કે સોનમ વાંગચુકની હાલની સ્વાસ્થ્ય સ્થિતિને ધ્યાનમાં રાખીને નિષ્ણાત ડોક્ટરો દ્વારા સતત દેખરેખ રાખવી જરૂરી છે. સુનાવણી દરમિયાન AIIMS અને સફદરજંગ હોસ્પિટલના ડોક્ટરો પણ હાજર રહ્યા હતા. ડોક્ટરોએ કોર્ટને તબીબી અહેવાલ રજૂ કરીને જણાવ્યું હતું કે વાંગચુકના શરીરમાં પોટેશિયમનું સ્તર ઓછું છે અને TLC પરીક્ષણના પરિણામોને લઈને પણ ચિંતા વ્યક્ત કરવામાં આવી છે.

હોસ્પિટલમાં દાખલ કરવામાં આવે તે અંગે કેન્દ્ર સરકારને કોઈ વાંધો

તબીબી અહેવાલોને ધ્યાનમાં રાખીને દિલ્હી હાઈકોર્ટે વધુ સારી સારવાર અને સતત તબીબી દેખરેખ માટે મેદાંતા હોસ્પિટલમાં ટ્રાન્સફર કરવાનો નિર્ણય યોગ્ય ગણાવ્યો હતો. સુનાવણી દરમિયાન સોલિસિટર જનરલ તુષાર મહેતાએ પણ કોર્ટને સ્પષ્ટ કર્યું હતું કે સોનમ વાંગચુકને મેદાંતા હોસ્પિટલમાં દાખલ કરવામાં આવે તે અંગે કેન્દ્ર સરકારને કોઈ વાંધો નથી.

આ પણ વાંચો : રાહુલ ગાંધી સહિત તમામ વિપક્ષી નેતાઓને પોલીસે કસ્ટડીમાંથી કર્યા મુક્ત

હવે મેદાંતા હોસ્પિટલમાં સારવાર દરમિયાન કેન્દ્રીય મંત્રીઓ જેપી નડ્ડા અને જીતેન્દ્ર સિંહની મુલાકાત બાદ સરકાર અને સોનમ વાંગચુક વચ્ચે સંવાદ શરૂ થયો હોવાની ચર્ચા તેજ બની છે. વાંગચુકની તબિયત પર ડોક્ટરો સતત નજર રાખી રહ્યા છે, જ્યારે તેમની માંગણીઓ અને સરકાર સાથેની ચર્ચાના આગામી તબક્કા પર સૌની નજર ટકેલી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ