વિમાસણ / કોઈની જમીન,કોઈના નામે, કોઈના ખાતામાં `તળાવ' ચડી ગયા, મહીસાગરમાં સેટેલાઈટ સરવેએ જુઓ કેવા કર્યા ગોટાળા

• મહીસાગરમાં કોઈની જમીન, કોઈના નામે
• સેટેલાઈટ સરવેએ ગોટાળો સર્જ્યો
• કોઈના ખાતામાં `તળાવ' ચડી ગયા

વાત છે સેટેલાઇટ સર્વેએ સર્જેલા ગોટાળાની. એક એવો ગોટાળો જેમાં જમીન સર્વેનંબરો બદલાઈ ગયા. ખેડૂતો બદલાઈ ગયા અને સ્થળ તેમજ સ્થિતિ બદલાઈ ગઈ. એક એવો ગોટાળો જેમાં ખેતરના બદલે ગામના રોડ ખેડૂતોના નામે થઈ ગયા. સેટેલાઈટ સર્વેબાદ હવે કયા ગામના ખેડૂતો ચડ્યા ગોથે.

ખેડૂતો વિમાસણમાં મૂકાયા
હાથમાં ગામ નમૂના નંબરની કોપી લઈને ઊભેલા આ ધરતીપુત્રો, સરકારના  સેટેલાઈટ સર્વે સામે જાણે અરીસો ધરી રહ્યા છે. સરકારે રાજ્યની ખેતીની જમીનનો સેટેલાઈટ સર્વે કર્યો હતો, તેમાં કેવા કેવા ગોટાળા થયા છે તે જોવા માટે આ કોપીઓ પૂરતી છે. મહીસાગર જિલ્લાના સજ્જનપુર ગામના ધરતીપુત્રોના દુખડાની કહાની રજૂ કરી રહ્યા છે. કેમ કે, તેઓ વર્ષોથી જે જમીન ખેડતા હતા, મહેસૂલ ભરતા હતા તે જમીન સરકારના સેટેલાઈટ સર્વેમાં કોઈ બીજાના જ ખાતામાં બોલી રહી છે. ત્યારે જગતનો તાત ખેતીની જમીન પર પોતાની માલિકને લઈને વિસામણમાં મૂકાઈ ગયો છે.

સરવે રદ કરવાની ઊઠી માગ
સજ્જનપુર ગામમાં સરકાર દ્વારા જમીન માપણીને લઈ ને જે સર્વે કરવામાં આવ્યો, તેમાં ખેડૂતોના સર્વે નંબર બદલાઈ ગયાની વ્યાપક ફરિયાદો ઊઠી છે. જમીનનો ભોગવટો મૂળ ખેડૂત પાસે પરંતુ તે સર્વે નંબર અન્ય ખેડૂતના નામે ચડી ગયા જેથી ખેડૂતો મુશ્કેલીમાં મુકાયા છે, હદ તો ત્યારે થઈ જ્યારે ગામમાં જવાનો મુખ્ય માર્ગ એક ખેડૂતના નામે ચડી ગયો અને ગામનું તળાવ અને નાળું પણ ખેડૂતના નામે થઈ ગયા. આમ સર્વે નંબરની અદલાબદલી થઈ જતા ખેડૂતો મુશ્કેલીમાં મુકાયા છે. ત્યારે ખેડૂતોની માગણી છે કે, જમીનો જૂની પદ્ધતિથી જ રિસર્વે કરવામાં આવે. 

આપણું દેશી ભારત હવે ડિજિટલ ઇન્ડિયા બનવા તરફ જઈ રહ્યું છે. પરંતુ તેના પ્રયોગો ઘણીવાર મોટી ઊથલપાથલ સર્જી રહ્યા છે. આથી જરૂરી છે કે, પૂરતું હોમવર્ક કર્યા બાદ જ આવા પ્રયોગો કરવામાં આવે. હાલ તો સજ્જનપુરના ખેડૂતો સેટેલાઈટ જમીનમાપણીને રદ કરી નવેસરથી સર્વે કરવા માટે સરકારને વિનંતી કરી રહ્યા છે. ત્યારે જોવાનું રહ્યું કે ખેડૂતોની મુંજવણનો અંત ક્યારે આવે છે.