ચોમાસું 2023 / લાંબા વિરામ બાદ અમદાવાદમાં વરસાદની ફરી એન્ટ્રી: આટલા વિસ્તારો ભીંજાયા, જાણો શું છે આગાહી

• અમદાવાદના કેટલાંક વિસ્તારોમાં આજે ધીમીધારે વરસાદ
• શહેરમાં વરસાદ પડતા વાતાવરણમાં ઠંડક પ્રસરી 
• હવામાન વિભાગે કરી છે હળવા વરસાદની આગાહી

અમદાવાદમાં વિરામ બાદ ફરી વરસાદની એન્ટ્રી થઈ છે. વાદળછાયા વાતાવરણની વચ્ચે સવારના 9.00 વાગ્યા બાદ વરસાદ શરૂ થયો છે. શહેરના વિવિધ વિસ્તારોમાં ધીમીધારે વરસાદ વરસી રહ્યો છે. લાંબા સમય પછી શહેરમાં વરસાદ પડતા વાતાવરણમાં ઠંડક પ્રસરી ગઈ છે. બીજુ કે આજે રવિવારને રજાનો દિવસ હોવાથી ફૂડ સ્ટોલ પર ગાંઠીયા અને ભજીયા ખરીદવા માટે લોકોની લાંબી લાઈનો લાગી ગઈ છે. મહત્વનું છે કે, અમદાવાદમાં આગામી બે દિવસ હળવો વરસાદ પડવાની આગાહી કરવામાં આવી છે. 

લોકોને ગરમીથી રાહત મળી
ગુજરાતમાં છેલ્લાં કેટલાંક દિવસથી વરસાદનું જોર થોડું ધીમું પડ્યું છે. પરંતુ હજુ ચોમાસું ગયું નથી. ત્યારે હવામાન વિભાગની આગાહીને પગલે અમદાવાદમાં વરસાદ વરસી રહ્યો છે. અમદાવાદના કેટલાંક વિસ્તારોમાં ધીમી ધારે વરસાદ વરસી રહ્યો છે. અમદાવાદના નારણપુરા, વાડજ, RTO સર્કલ, ચાંદખેડા, સાબરમતી અને એસ.જી હાઇવે પર હળવો વરસાદ વરસી રહ્યો છે. ધીમી ધારે વરસાદ વરસતા શહેરના રસ્તાઓ ભીના થઈ ગયા છે. વરસાદનું આગમન થતા લોકોને ગરમીથી રાહત મળી છે. જ્યારે શહેરીજનો અહલાદક વાતાવરણની મજા માણી રહ્યા છે. 

હવામાન વિભાગે કરી છે આગાહી
આપને જણાવી દઈએ કે, બંગાળની ખાડીમાં નવી સિસ્ટમ સર્જાતા શહેર સહિત રાજ્યમાં વરસાદ પડવાની શક્યતા ઊભી થઈ છે. ગતરોજ હવામાન વિભાગે આગાહી કરી હતી કે અમદાવાદમાં આજથી ત્રણ દિવસ સુધી હળવો વરસાદ પડવાની શક્યતા છે. સ્થાનિક હવામાન વિભાગે આગાહી કરતા જણાવ્યું હતું કે, આજે, આવતીકાલે અને સોમવાર એમ સતત ત્રણ દિવસ સુધી અમદાવાદમાં હળવો વરસાદ પડશે. જ્યારે 22 ઓગસ્ટથી 24 ઓગસ્ટ સુધી વાદળછાયું વાતાવરણ રહેશે. આ સાથે હવામાન વિભાગે રવિવારે આખા ગુજરાતમાં હળવો વરસાદ પડવાની સંભાવના વ્યક્ત કરી હતી.

બંગાળની ખાડીમાં લો પ્રેશર
હવામાન વિભાગે કહ્યું હતું કે, બંગાળની ખાડીમાં બનેલા લો પ્રેશરના કારણે રાજ્યમાં વરસાદ થવાની શક્યતા ઉદ્ભવી છે. આ સિસ્ટમનું વહન મોટા ભાગે પશ્ચિમ-ઉત્તર પશ્ચિમ તરફ થવાની શક્યતાઓ જોવાઈ રહી છે. આ સિસ્ટમ આગળ વધતા નબળી પડી શકે છે, પરંતુ તેની અસરના કારણએ ગુજરાતમાં વરસાદ થઈ શકે છે.