Lok Sabha Election 2024 / રવિન્દ્ર સિંહ ભાટી..26 વર્ષના યુવકે ભલભલી પાર્ટીનો પરસેવો છોડાવ્યો, ભાજપના મિશન 25 પર મંડરાયો ખતરો

લોકસભા ચૂંટણી (Lok Sabha Election 2024) માં રાજસ્થાનમાં 25 સીટો પર દિગ્ગજ નેતાઓ ચૂંટણી લડી રહ્યા છે. તમામે પ્રચારમાં પુરી તાકાત લગાવી દીધી છે. આ દરમિયાન એક 26 વર્ષના યુવા નેતાની ખૂબ ચર્ચા થઈ રહી છે. આ નેતા છે રવિન્દ્ર સિંહ ભાટી (Ravindra Singh Bhati). તેમના અપક્ષ ઉમેદવારના નોમિનેશન વખતે એકઠી થયેલી ભીડની તસવીરો સોશિયલ મીડિયા પર વાયરલ થઈ રહી છે. રાજસ્થાનમાં સતત બે વાર ક્લીન સ્વીપ કરી ચુકેલી ભાજપના 'મિશન 25' માટે પણ આ યુવા નેતાને ખતરો માનવામાં આવી રહ્યા છે. રવિન્દ્ર સિંહ ભાટી પહેલી લોકસભા ચૂંટણીમાં જીત નોંધાવી શકશે કે નહીં એ તો 4 જૂને મતગણતરી પછી જ જાણવા મળશે, પણ તેમને પોતાની ટૂંકી રાજકીય કારકિર્દીમાં જબરદસ્ત લોકપ્રિયતા મેળવી છે કે એની ચર્ચાઓ ચારેબાજુ થઈ રહી છે. 

બાડમેર બેઠકના મહત્ત્વના દાવેદાર

રાજસ્થાનના બાડમેર જિલ્લાની શિવ વિધાનસભા બેઠક પરથી અપક્ષ ધારાસભ્ય છે રવિન્દ્ર સિંહ ભાટી (Ravindra Singh Bhati). હવે તેણે બાડમેર સંસદીય બેઠક પરથી અપક્ષ ઉમેદવાર તરીકે ઉમેદવારી નોંધાવી છે. ભાટી મોદી સરકારના મંત્રી કૈલાશ ચૌધરી સામે ચૂંટણી મેદાનમાં ઉતર્યા છે. વિધાનસભા ચૂંટણી દરમિયાન તેમના જબરદસ્ત પ્રદર્શનને કારણે તેની લોકપ્રિયતા વધી ગઈ છે. એટલે જ તેની સભાઓમાં ભારે ભીડ જામે છે. નોમિનેશન દરમિયાન પણ મોટી સંખ્યામાં લોકો ભેગા થયા કે તસવીરો વાયરલ થઈ ગઈ. તેમને બાડમેર બેઠકના મહત્ત્વના દાવેદાર તરીકે જોવામાં આવી રહ્યા છે. એમ તો ભાજપ પીએમ મોદીના નામ અને કામ સાથે જ રામ લહેર પર સવાર થઈને રાજસ્થાનની તમામ 25 સીટો પર જીતનો દાવો કરી રહી છે. પરંતુ બાડમેરમાં પાર્ટીના ધબકારા ચોક્કસ વધી ગયા છે. 

રવિન્દ્ર સિંહ ભાટી (Ravindra Singh Bhati)એ 2023ની વિધાનસભા ચૂંટણીમાં ભાજપ સામે બળવો કરીને અપક્ષ ઉમેદવાર તરીકે ચૂંટણી લડીને ઘણા દિગ્ગજ નેતાઓને હરાવીને જીત મેળવી હતી. જ્યારે ભાજપે આ બેઠક પરથી સ્વરૂપ સિંહ ખારાને ઉમેદવાર બનાવ્યા ત્યારે ભાટીએ બળવો કર્યો અને ચૂંટણી લડી. ચૂંટણીના પરિણામો આવ્યા ત્યારે બધા ચોંકી ગયા હતા. ભાટીએ ભાજપ ઉપરાંત કોંગ્રેસના દિગ્ગજ નેતા અમીન ખાન, બળવાખોર કોંગ્રેસના નેતા ફતેહ ખાન અને ભૂતપૂર્વ ધારાસભ્ય જાલમ સિંહ રાવત જેવા નેતાઓને હરાવી દીધા હતા. તેમણે લગભગ 4 હજાર મતોથી જીત નોંધાવી હતી.

વધુ વાંચો: બાગી હોય કે સાથી..સૌ પર નજર રાખી રહી છે BJP, આવી રીતે 370 બેઠકો પળેપળની અપડેટ પહોંચી રહી છે દિલ્હી

2019માં પહેલીવાર ચૂંટણી લડી અને ઇતિહાસ રચ્યો

રવિન્દ્ર સિંહ ભાટીએ 5 વર્ષ પહેલા જ રાજકારણમાં પ્રવેશ કર્યો. આરએસએસના વિદ્યાર્થી સંગઠન એબીવીપીના સભ્ય ભાટી જય નારાયણ વ્યાસ યુનિવર્સિટીમાં અભ્યાસ કરતા હતા. 2019માં તેઓ વિદ્યાર્થી સંઘના અધ્યક્ષ પદ માટે ચૂંટણી લડવા માંગતા હતા. પરંતુ એબીવીપીએ તેમને ટિકિટ આપી ન હતી. ભાટીએ બળવો કર્યો અને અપક્ષ ઉમેદવાર તરીકે લડ્યા અને જીત્યા. આ યુનિવર્સિટીના 57 વર્ષના ઇતિહાસમાં પ્રથમ વખત કોઈ અપક્ષ ઉમેદવાર વિદ્યાર્થી સંઘના પ્રમુખ પદે જીત્યો છે. બાદમાં તેઓ ભાજપમાં જોડાઈ ગયા હતા.