આજે ડિસ્કવરીમાં છવાશે પ્રધાનમંત્રી મોદી, રાત્રે 9 કલાકે થશે પ્રસારણ. ડિસ્કવરી ચેનલના ખાસ કાર્યક્રમ Man Vs Wildમાં બરાક ઓબામા બાદ આજે હવે પ્રધાનમંત્રી નરેન્દ્ર મોદી જોવા મળશે. આ કાર્યક્રમ વિશે માહિતિ આપતાં બેયર ગ્રિલ્સે લખ્યું કે તેમને પીએમ નરેન્દ્ર મોદી સાથે ભારતમાં વન્ય જીવ સંરક્ષણ માટે વિવિધ ઉપાયો પર કાર્યક્રમ શૂટ કર્યો છે.
આ એપિસોડમાં પીએમ મોદી ગ્રિલ્સ સાથે ભારતની વિશાળ પાકૃતિક વિવિધતા અને પ્રકૃતિ સંરક્ષણ ઉપાયો અંગે ચર્ચા કરતા નજરે પડશે. ગ્રિલ્સે ટ્વિટમાં લખ્યું કે 180 દેશના લોકો ટૂંક સમયમાં જ પીએમ મોદી અંગે પરિચિત થશે. જ્યાં દેખાડીશું કે કેવી રીતે ભારતમાં વન્ય જીવોના સંરક્ષણ માટે જાગૃતતા અભિયાન અને ભૌગોલિક પરિવર્તન માટે કામ થઈ રહ્યું છે.
વડાપ્રધાન મોદી અહીં અલગ જ અંદાજમાં જોવા મળશે. PM નરેન્દ્ર મોદી ગ્રિલ્સ સાથે બોટમાં નદી પાર કરતા જોવા મળશે. આ અગાઉ અમેરિકાના પૂર્વ રાષ્ટ્રપતિ બરાક ઓબામા પણ બેયર ગ્રિલ્સ સાથે નજરે પડ્યા હતા. આ શોમાં વિશ્વની પ્રખ્યાત હસ્તીઓ ભાગ લઈ ચૂકી છે. પીએમ મોદી પહેલાં બરાક ઓબામાની સાથે શો કરી ચૂકેલા બેયર ગ્રિલ્સને પૂછવામાં આવ્યું કે મોદી- ઓબામામાં શું સમાનતા છે તો જાણો તેઓએ શું જવાબ આપ્યો.
બેયરે કહ્યું કે ભારત ખૂબ જ સુંદર દેશ છે. તેમાં સુંદરતા છે અને સાથે તમારે તેને સાચવવી જોઈએ, પણ આ જવાબદારી દરેક વ્યક્તિ લે તો જ સંભવ છે. તેમાં નાની ચીજો જેમકે થૂંકવું નહીં, પ્લાસ્ટિકના ઉપયોગથી પર્યાવરણને બચાવવું વગેરે સામેલ કરવી જોઈએ. બેયરે જણાવ્યું કે તમે શૉમાં પીએમ મોદીની પર્સનાલિટીના એ ભાગને જોશો જે તમે પહેલાં ક્યારેય જોયો નહીં હોય. ટીમે પરત આવીને પહેલી વાત એ કહી હતી કે આ દેશમાં સૌથી વધારે જોનારો જાણીતો શૉ બનવા જઈ રહ્યો છે. તેઓએ ઉમેર્યું કે હું પણ આવું જ ઈચ્છું છું. બેયર ગ્રિલ્સનો આ સર્વાઈવલ શૉ દુનિયાભરમાં લોકપ્રિય છે અને પીએમ મોદીના એપિસોડને ભારતમાં કુલ 8 ભાષાઓમાં બતાવાશે અને સાથે ડિસ્કવરી દુનિયાભરના લગભગ 180 દેશોમાં આ શૉનું પ્રસારણ કરાશે.