નેશનલ / પૂર્વ કેપ્ટન સૂર્યકુમાર યાદવના પરિવારને મળ્યા PM મોદી, દીકરીએ સંભળાવ્યું ભજન!

દિવાળીના પવિત્ર માહોલમાં સૂર્યકુમાર યાદવ અને તેમના પરિવારની વડાપ્રધાન સાથે મુલાકાત થઈ હતી. આ દરમિયાન PM મોદીએ સૂર્યકુમારની દીકરી રિદ્ધિમાને પ્રેમથી ખોળામાં લીધી હતી. પરિવાર સાથેની આ મુલાકાતમાં ભજનની સુંદર ક્ષણ પણ જોવા મળી હતી. વડાપ્રધાને વીડિયો શેર કરીને દિવાળીના વાતાવરણને વધુ પાવન અને દિવ્ય ગણાવ્યું હતું. બીજી તરફ, સૂર્યકુમાર યાદવ હાલમાં ભારતીય ટીમની બહાર છે અને ફરી ટીમમાં સ્થાન મેળવવા માટે પ્રયાસ કરી રહ્યા છે.

PM મોદીએ શેર કર્યો મુલાકાતનો વીડિયો

ભારતીય ક્રિકેટ ટીમના પૂર્વ ટી20 કેપ્ટન સૂર્યકુમાર યાદવ પોતાના પરિવાર સાથે વડાપ્રધાન નરેન્દ્ર મોદીને મળ્યા હતા. આ મુલાકાત વડાપ્રધાનના નિવાસસ્થાને થઈ હતી. સૂર્યકુમાર સાથે તેમની પત્ની દેવિશા અને દીકરી રિદ્ધિમા પણ હાજર રહ્યાં હતાં.આ મુલાકાતનો વીડિયો PM મોદીએ સોશિયલ મીડિયા પર શેર કર્યો છે. વીડિયોમાં વડાપ્રધાન સૂર્યકુમારના પરિવાર સાથે વાતચીત કરતા જોવા મળે છે. આ દરમિયાન તેમણે સૂર્યકુમારની દીકરી રિદ્ધિમાને ખોળામાં લઈને દુલાર કર્યો હતો. પરિવાર સાથેની આ મુલાકાતની તસવીરો અને વીડિયો લોકોનું ધ્યાન ખેંચી રહ્યા છે.

PM મોદીએ બાળકી પાસેથી સાંભળ્યું ભજન

મુલાકાત દરમિયાન પરિવારની એક બાળકી પાસેથી વડાપ્રધાને ભજન પણ સાંભળ્યું હતું. ભજન સાંભળીને PM મોદી ખુશ થયા હતા. દિવાળીના માહોલમાં આ મુલાકાતની ખાસ ક્ષણ જોવા મળી હતી.વીડિયો શેર કરતી વખતે વડાપ્રધાને લખ્યું હતું કે, દિવાળીના માહોલમાં રામ અને સરયુનું આગમન થયું છે. તેનાથી દિવાળીનું વાતાવરણ વધુ પાવન અને દિવ્ય બની ગયું છે. આ મુલાકાતમાં પરિવાર સાથેની વાતચીત અને ભજનની ક્ષણ ખાસ બની હતી.

View this post on Instagram

A post shared by Sambhaav Nascent LLP (@vtv_gujarati_news)

ટી20 વર્લ્ડ કપ બાદ ટીમની બહાર છે સૂર્યકુમાર

સૂર્યકુમાર યાદવ છેલ્લે ટી20 વર્લ્ડ કપ 2026માં ભારતીય ટીમ તરફથી રમ્યા હતા. તેમની કેપ્ટનશિપમાં ભારતે અમદાવાદના નરેન્દ્ર મોદી સ્ટેડિયમમાં ન્યૂઝીલેન્ડને હરાવીને ટી20 વર્લ્ડ કપનો ખિતાબ જીત્યો હતો.ખિતાબ જીત્યા બાદ સૂર્યકુમાર પાસેથી કેપ્ટનશિપની જવાબદારી લેવામાં આવી હતી. ત્યારબાદ તેમને ભારતીય ટીમમાંથી પણ બહાર કરવામાં આવ્યા હતા. ખરાબ ફોર્મને કારણે તેમને ટીમમાં સ્થાન મળતું ન હોવાનું જણાવવામાં આવ્યું હતું. તેમને ઘરેલુ ક્રિકેટમાં સારું પ્રદર્શન કરીને ફરી ટીમમાં સ્થાન મેળવવા માટે કહેવામાં આવ્યું હતું.

સૂર્યકુમાર માટે ટીમમાં વાપસીનો રસ્તો ખુલ્લો

ટીમમાંથી બહાર થયા હોવા છતાં સૂર્યકુમાર યાદવ માટે ભારતીય ટીમમાં વાપસીનો રસ્તો બંધ થયો નથી. ઘરેલુ ક્રિકેટમાં સારું પ્રદર્શન કરીને તે ફરી ટીમમાં સ્થાન મેળવી શકે છે.સૂર્યકુમારની બહાર થવાની વાતથી તેમના ચાહકોમાં નારાજગી જોવા મળી હતી. ઘણા ચાહકોએ આ નિર્ણયનો વિરોધ પણ કર્યો હતો. ટી20 ક્રિકેટમાં સૂર્યકુમારના પ્રદર્શનને જોતા તેમની વાપસી અંગે ચાહકોને આશા છે.

આ પણ વાંચોઃ 10 નવેમ્બર બાદ સાથે બેસીને વાત કરીશું, હોસ્પિટલમાં શરદ પવારના નિવેદનથી મહારાષ્ટ્રના રાજકારણમાં ગરમાવો!

સૂર્યકુમારે ભારત માટે કેટલા મેચ રમ્યા?

સૂર્યકુમાર યાદવે ભારત માટે અત્યાર સુધી 1 ટેસ્ટ, 37 વનડે અને 113 ટી20 મેચ રમ્યા છે. ટી20 ક્રિકેટમાં તેમનો રેકોર્ડ ખાસ રહ્યો છે. 113 ટી20 મેચમાં તેમણે 36.36ની સરેરાશ અને 162.95ના સ્ટ્રાઇક રેટથી 3,272 રન બનાવ્યા છે.આ દરમિયાન તેમના નામે 25 અડધી સદી અને 4 સદી નોંધાઈ છે. વનડે ક્રિકેટમાં તેમણે 37 મેચમાં 25.77ની સરેરાશથી 773 રન બનાવ્યા છે. વનડેમાં તેમના નામે 4 અડધી સદી છે. જ્યારે એક ટેસ્ટ મેચમાં તેમણે 8 રન બનાવ્યા છે.

કેપ્ટન તરીકે સૂર્યકુમારનો રેકોર્ડ કેવો રહ્યો?

સૂર્યકુમાર યાદવે ભારત માટે 52 ટી20 મેચમાં કેપ્ટનશિપ કરી છે. તેમની કેપ્ટનશિપમાં ભારતીય ટીમે 40 મેચમાં જીત મેળવી હતી, જ્યારે 8 મેચમાં હારનો સામનો કરવો પડ્યો હતો. 2 મેચ ટાઈ રહી હતી અને 2 મેચનું પરિણામ આવ્યું નહોતું.સૂર્યકુમારની કેપ્ટનશિપમાં ભારતે કોઈ દ્વિપક્ષીય ટી20 સિરીઝ ગુમાવી નહોતી. આ ઉપરાંત, તેમની આગેવાનીમાં ભારતીય ટીમ કોઈ મલ્ટી ટીમ ટૂર્નામેન્ટ પણ હારી નહોતી. આ રેકોર્ડને કારણે ટી20 ક્રિકેટમાં તેમની કેપ્ટનશિપની ખાસ ચર્ચા રહી છે.હાલમાં ટીમની બહાર હોવા છતાં સૂર્યકુમાર યાદવના ચાહકો તેમની વાપસીની રાહ જોઈ રહ્યા છે. વડાપ્રધાન સાથે પરિવારની મુલાકાત અને દીકરીએ ભજન સંભળાવ્યાની ક્ષણ હાલ ચર્ચામાં છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ