Business / અમેરિકાના શેરબજારમાં હાહાકાર! AI કંપનીઓને મોટો ફટકો, એક જ દિવસમાં ₹236 લાખ કરોડનું ધોવાણ

શેરબજારમાં ક્યારેક એક દિવસનો ઘટાડો પણ રોકાણકારોની ઊંઘ ઉડાવી દે છે, પરંતુ અમેરિકાના બજારમાં ગુરુવારે જે થયું તેણે દુનિયાભરના રોકાણકારોનું ધ્યાન ખેંચ્યું છે. ટેકનોલોજી ક્ષેત્રની દિગ્ગજ કંપનીઓથી લઈને આર્ટિફિશિયલ ઇન્ટેલિજન્સ (AI) સાથે જોડાયેલી કંપનીઓ સુધી દરેક જગ્યાએ વેચવાલીનો માહોલ જોવા મળ્યો હતો. એક જ દિવસમાં Nasdaq-100ની કંપનીઓના બજાર મૂલ્યમાં $2.5 ટ્રિલિયન એટલે કે ભારતીય રૂપિયામાં આશરે ₹236 લાખ કરોડનું ધોવાણ થયું હતું. આ ઘટાડા પાછળ અમેરિકાની મધ્યસત્ર ચૂંટણીમાં ડેમોક્રેટિક પાર્ટીની જીત બાદ AI કંપનીઓ પર નિયમનકારી તપાસ વધવાની આશંકાને મુખ્ય કારણ માનવામાં આવી રહી છે.

અમેરિકાની મધ્યસત્ર ચૂંટણીમાં ડેમોક્રેટિક પાર્ટીને મળેલી મોટી જીત બાદ રોકાણકારોમાં ચિંતા વધી છે કે હવે AI કંપનીઓના કામકાજ પર વધુ કડક નજર રાખવામાં આવી શકે છે. ખાસ કરીને AI ક્ષેત્રમાં લાગુ થનારા નવા નિયમો અને ડેટા સેન્ટરના નિર્માણની ગતિ ધીમી પડવાની શક્યતાએ બજારનું વાતાવરણ બગાડ્યું છે. ડેટા સેન્ટર એવી મોટી સુવિધાઓ છે, જ્યાં AI સિસ્ટમ ચલાવવા માટે હજારો કમ્પ્યુટર્સ અને સર્વર્સનો ઉપયોગ કરવામાં આવે છે. AI ટેકનોલોજીના વિકાસ માટે આ ડેટા સેન્ટર અત્યંત મહત્ત્વપૂર્ણ છે.

આ ચિંતાની અસર જોવા મળી

ગુરુવારે શેરબજાર ખુલતાની સાથે જ આ ચિંતાની અસર જોવા મળી હતી. રોઇટર્સના અહેવાલ મુજબ, ટેકનોલોજી કંપનીઓ ધરાવતા Nasdaq Composite Indexમાં 5.5 ટકાનો મોટો ઘટાડો નોંધાયો હતો. એપ્રિલ 2025માં લિબરેશન ડે બાદનો આ તેનો સૌથી મોટો એક દિવસનો ઘટાડો હતો. બીજી તરફ, Nasdaq-100ની સૌથી મોટી કંપનીઓના સંયુક્ત બજાર મૂલ્યમાં $2.5 ટ્રિલિયનનો ઘટાડો થયો હતો. AI કંપનીઓના શેરમાં સતત બીજા દિવસે પણ ઘટાડો ચાલુ રહ્યો હતો.

કંપનીઓ પણ આ વેચવાલીથી બચી શકી નહોતી

AI ક્ષેત્રને ચિપ સપ્લાય કરતી કંપનીઓ પણ આ વેચવાલીથી બચી શકી નહોતી. ચિપ બનાવતી કંપનીઓનો ઇન્ડેક્સ લગભગ 12 ટકા ઘટીને છ મહિનાથી વધુ સમયના સૌથી નીચા સ્તરે પહોંચ્યો હતો. AI સંબંધિત કંપની CoreWeaveના શેરમાં પણ 10 ટકાનો ઘટાડો નોંધાયો હતો. આ સ્થિતિએ સ્પષ્ટ કર્યું કે રોકાણકારો હાલમાં AI ક્ષેત્રના ભવિષ્ય અને તેમાં થનારા સંભવિત નિયમનકારી ફેરફારોને લઈને સાવચેત બની ગયા છે.

ઓક્ટોબરના રેકોર્ડ સ્તરથી Nasdaq 12% ગગડ્યો

Nasdaq Composite Index 6 ઓક્ટોબરના રોજ નોંધાયેલા તેના રેકોર્ડ ઉચ્ચ સ્તરથી અત્યાર સુધીમાં લગભગ 12 ટકા નીચે આવી ગયો છે. શેરબજારની ભાષામાં કોઈ ઇન્ડેક્સ તેના તાજેતરના રેકોર્ડ સ્તરથી 10 ટકા કે તેથી વધુ ઘટે ત્યારે તેને 'કરેકશન' એટલે કે સુધારાનો તબક્કો કહેવામાં આવે છે. આ રીતે Nasdaq હવે કરેકશનના તબક્કામાં પ્રવેશી ગયો છે. ઓક્ટોબરના મધ્યભાગથી અત્યાર સુધીમાં Nasdaq પાંચ વખત 500થી વધુ પોઈન્ટ ઘટ્યો છે.

બાંધકામમાં મંદી આવવાની શક્યતાને લઈને પણ ચિંતિત

બજારના વિશ્લેષકો ડેટા સેન્ટરના બાંધકામમાં મંદી આવવાની શક્યતાને લઈને પણ ચિંતિત છે. ઊંચા વ્યાજદરને કારણે નાની AI કંપનીઓ માટે પહેલેથી જ ભંડોળ એકત્ર કરવું મુશ્કેલ બની રહ્યું છે. આવી સ્થિતિમાં જો સરકાર તરફથી નિયમો વધુ કડક કરવામાં આવે તો આ કંપનીઓની મુશ્કેલીઓમાં વધારો થઈ શકે છે. ડેટા સેન્ટરના બાંધકામ અને AI ક્ષેત્રના વિસ્તરણ પર તેની કેટલી અસર પડશે તે અંગે હજુ સ્પષ્ટતા નથી.

ટ્રમ્પે શેરબજારના ઘટાડા માટે ડેમોક્રેટ્સને જવાબદાર ગણાવ્યા

અમેરિકાના રાષ્ટ્રપતિ ડોનાલ્ડ ટ્રમ્પે પણ શેરબજારમાં આવેલા આ મોટા ઘટાડા અંગે પ્રતિક્રિયા આપી હતી. તેમણે સોશિયલ મીડિયા પર પોસ્ટ કરીને દાવો કર્યો હતો કે ચૂંટણીનાં પરિણામોને કારણે બજારે તેના ઇતિહાસના સૌથી ખરાબ દિવસોમાંથી એક જોયો છે. ટ્રમ્પે આ સ્થિતિ માટે ડેમોક્રેટિક પાર્ટીને જવાબદાર ગણાવી હતી. તેમણે કહ્યું હતું કે બજારમાં આવેલા ઘટાડાની અસર લોકોના 401(k) નિવૃત્તિ ખાતાં પર પણ પડી છે અને તેમાં જમા નાણાંનું મૂલ્ય ઘટ્યું છે.

આ પણ વાંચો : દિવાળી પહેલા શેરબજારમાં આવી ભારે ભરતી, પણ આ ચર્ચિત શેર થયો ક્રેશ, 17 ટકા તૂટ્યો

ટ્રમ્પે પોતાની પોસ્ટમાં ડેમોક્રેટ્સને 'ડ્યુમોક્રેટ્સ' કહીને નિશાન બનાવ્યા હતા. જોકે, તેમણે સાથે એવો વિશ્વાસ પણ વ્યક્ત કર્યો હતો કે અમેરિકા ટૂંક સમયમાં ફરી મજબૂત સ્થિતિમાં પાછું ફરશે. હાલ રોકાણકારોની નજર એ વાત પર છે કે AI કંપનીઓ માટે ભવિષ્યમાં કેવા નિયમો બનાવવામાં આવે છે અને તેની ડેટા સેન્ટર સહિતની વિકાસ યોજનાઓ પર કેટલી અસર પડે છે. આ અનિશ્ચિતતાને કારણે AI શેરોમાં ભારે વેચવાલી જોવા મળી રહી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ