લાગણી દુભાઈ / ગુટલી લડ્ડુ ફિલ્મને લઇને વાલ્મિકી સમાજનો વિરોધ: ગુજરાત હાઇકોર્ટે સેન્સર બોર્ડને 24 કલાકમાં ખુલાસો કરવા આપ્યા નિર્દેશ, જાણો વિવાદનું કારણ

• ગુટલી લડ્ડુ ફિલ્મને લઇ વિવાદ 
• ફિલ્મમાં વપરાતા શબ્દ પ્રયોગથી વાંધો
• વાલ્મિકી સમાજ થયો નારાજ

ગુટલી લડ્ડુ  ફિલ્મને લઇને વિવાદ વકર્યો છે. વાલ્મિકી સમાજ વિરૂદ્ધ ગેરબંધારણીય અને બિનસંસદીય ભાષાના પ્રયોગ સામે કોર્ટમાં અરજી કરાઈ છે. ત્યારે ગુજરાત હાઇકોર્ટે સેન્સર બોર્ડને 24 કલાકમાં ખુલાસો કરવા પણ નિર્દેશ કર્યો છે. ગેરબંધારણીય શબ્દો ફિલ્મ અને ટ્રેલરમાંથી પણ દૂર કરવા અરજીમાં માગ કરવામાં આવી છે. 

આવતીકાલે ફિલ્મ થવાની છે રિલીઝ
ચોક્કસ શબ્દપ્રયોગથી વાલ્મિકી સમાજના લોકોની લાગણી દુભાતી હોવાની રજૂઆત કરવામાં આવી છે. અત્રે જણાવીએ કે, આવતીકાલે 13મી ઓક્ટોબરે ફિલ્મ રિલીઝ થવાની છે. ત્યારે તત્કાલ રાહતની પણ અરજીમાં માગ કરાઇ છે. ગુજરાત હાઇકોર્ટે ફિલ્મના પ્રોડ્યુસર અને સેન્સર બોર્ડ સહિતના પક્ષકારોને નોટિસ ઇશ્યૂ કરી છે. ગુટલી લડ્ડુ ફિલ્મના પ્રોડ્યુસર પ્રદીપ રંગવાની છે. આ સમગ્ર મામલે આગામી દિવસોમાં સુનાવણી હાથ ધરાશે. 

અરજદારનું શુ કહેવું ?
પાપ્ત વિગતો મુજબ નિમેષ વાઘેલાએ વકીલ વિશાલ ઠક્કર દ્વારા આ ફિલ્મમાં વાલ્મિકી સમાજ માટે વપરાયેલા ચોક્કસ શબ્દને લઈને અરજી દાખલ કરવામાં આવી છે. અરજદારનું કહેવું છે કે, આ ફિલ્મમાં સંજય મિશ્રાએ અભિનય કર્યો છે અને આ ફિલ્મ સામાજિક ભેદભાવ અને શિક્ષણના મુદ્દાને લગતી ફિલ્મ છે. જેમાં વાલ્મીકિ સમાજ માટે જે શબ્દો વપરાયા છે તે દૂર કરવામાં આવે. વધુમાં અરજદારે કહ્યું છે કે, ફિલ્મમાં વપરાયેલા કેટલાક શબ્દો અસંવૈધાનિક છે, આ પ્રકારના શબ્દો વાપરવા તે એટ્રોસિટી એકટનો ભંગ છે.