કાર્યવાહી ક્યારે / લોદરાના સરપંચના ભાઈ-દીકરાની દાદાગીરી તો જુઓ, પોલીસની હાજરીમાં જ અધિકારીને માર્યો માર

પાટણ જિલ્લાના લોદરા ગામમાં ગેરકાયદેસર પાણીના જોડાણો દૂર કરવા ગયેલી પાણી પુરવઠા વિભાગની ટીમ પર હુમલો થવાની ગંભીર ઘટના સામે આવી છે. આ ઘટનામાં મદદનીશ પાણી પુરવઠા અધિકારી મેહુલ પટેલ પર હુમલો કરવામાં આવ્યો હોવાનું જાણવા મળ્યું છે.

અધિકારી સાથે ઉગ્ર બોલાચાલી થઈ

મળતી માહિતી મુજબ, લોદરા ગામના પાટિયા પાસે આવેલી એક હોટલમાં ગેરકાયદેસર પાણીનું કનેક્શન હોવાની ફરિયાદના આધારે પાણી પુરવઠા વિભાગની ટીમ કાર્યવાહી કરવા પહોંચી હતી. દરમિયાન ગામના સરપંચ પ્રદીપ ઠાકોરના ભાઈ અને પુત્રએ અધિકારીઓ સાથે ઉગ્ર બોલાચાલી કરી હુમલો કર્યો હોવાના આરોપો ઉઠ્યા છે.

પોલીસની હાજરીમાં ઘટના બની

ખાસ બાબત એ છે કે આ સમગ્ર ઘટના પોલીસની હાજરીમાં બની હોવાનું જણાવવામાં આવી રહ્યું છે, જેના કારણે કાયદો અને વ્યવસ્થાને લઈને અનેક પ્રશ્નો ઊભા થયા છે. સૂત્રોના જણાવ્યા અનુસાર, બે દિવસ અગાઉ પણ સંબંધિત અધિકારી પર હુમલો કરવામાં આવ્યો હતો.

આ પણ વાંચોઃ વડાપ્રધાનના કાર્યક્રમને લઈ તૈયારીઓ શરૂ, 5 જૂને સુરતમાં સંબોધશે જંગી સભા

સરકારી કર્મચારીઓમાં રોષ

સરકારી ફરજ બજાવતા અધિકારી પર થયેલા હુમલાને લઈને પાણી પુરવઠા વિભાગના કર્મચારીઓમાં રોષ જોવા મળી રહ્યો છે. ઘટનાની જાણ થતાં ઉચ્ચ અધિકારીઓએ મામલાની ગંભીર નોંધ લીધી છે અને જવાબદારો સામે કડક કાર્યવાહી કરવાની માંગ ઉઠી છે. પોલીસે ઘટનાની તપાસ શરૂ કરી છે અને ફરિયાદના આધારે આગળની કાનૂની કાર્યવાહી હાથ ધરવામાં આવશે તેમ જાણવા મળ્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ