તમારા કામનું / હવે સોશિયલ મીડિયા સાથે ગેમ્સ પર પણ મૂકાશે પ્રતિબંધ! સરકારની તૈયારીઓ શરૂ

બાળકોના સોશિયલ મીડિયા ઉપયોગને લઈને હવે કડક નિયમો બનાવવાની તૈયારી ચાલી રહી છે. 16 વર્ષથી નાનાં બાળકો માટે સોશિયલ મીડિયા જ નહીં પરંતુ કેટલીક ઓનલાઈન ગેમ્સ પર પણ પ્રતિબંધ લાગી શકે છે. આ નિયમ હેઠળ TikTok, Snapchat અને Roblox જેવા લોકપ્રિય પ્લેટફોર્મ પર અસર થવાની શક્યતા છે. નવા નિયમમાં કંપનીઓએ યુઝર્સની ઉંમર ચકાસવી પડશે અને નિયમોનું પાલન ન કરવા પર દંડ પણ થઈ શકે છે. તો જાણો કયા દેશે આ તૈયારી શરૂ કરી છે અને બાળકો માટે કયા નિયમો લાગુ થઈ શકે છે.

સોશિયલ મીડિયા જ નહીં, ગેમ્સ પર પણ લાગશે વયમર્યાદા

નોર્વે સરકાર હવે બાળકોને ઓનલાઈન જોખમોથી બચાવવા માટે સોશિયલ મીડિયા અંગેના પ્રસ્તાવિત કાયદામાં ફેરફાર કરી રહી છે. અગાઉ આ નિયમ મુખ્યત્વે સોશિયલ મીડિયાના ઉપયોગ પર પ્રતિબંધ મૂકવા માટે તૈયાર કરવામાં આવ્યો હતો. હવે તેમાં બાળકો માટે નુકસાનકારક સાબિત થઈ શકે તેવી ઓનલાઈન ગેમ્સ અને મેસેજિંગ સેવાઓને પણ સામેલ કરવાની તૈયારી છે. સરકારનું માનવું છે કે કોઈ પ્લેટફોર્મ ગેમ તરીકે ઓળખાતું હોય તો પણ તેમાં બાળકોને નુકસાન પહોંચાડે તેવી સુવિધાઓ હોઈ શકે છે.

Roblox, Snapchat અને TikTok પર પડી શકે છે અસર

આ પ્રસ્તાવ હેઠળ કેટલીક જાણીતી એપ્સ અને ગેમિંગ પ્લેટફોર્મ પર 16 વર્ષથી નાનાં બાળકો માટે પ્રતિબંધ લાગુ થઈ શકે છે. તેમાં ખાસ કરીને Roblox, Snapchat અને TikTokનો સમાવેશ થઈ શકે છે. Roblox પર બાળકો વિવિધ ગેમ્સ રમી શકે છે અને અન્ય લોકો સાથે ઓનલાઈન સંપર્ક પણ કરી શકે છે. બીજી તરફ Snapchat અને TikTokનો ઉપયોગ ફોટા, વીડિયો અને અન્ય કન્ટેન્ટ શેર કરવા માટે થાય છે. સરકારના જણાવ્યા મુજબ આ પ્લેટફોર્મના હાલના સ્વરૂપને ધ્યાનમાં રાખીને તેમને નવા કાયદા હેઠળ આવરી લેવામાં આવી શકે છે. જોકે કયા પ્લેટફોર્મ પર અંતિમ પ્રતિબંધ લાગશે તેની સંપૂર્ણ યાદી હજુ જાહેર થઈ નથી.

બાળકોને ઓનલાઈન જોખમોથી બચાવવાનો હેતુ

આ નિર્ણય પાછળનો મુખ્ય હેતુ બાળકોની સુરક્ષા કરવાનો છે. સોશિયલ મીડિયા અને ગેમિંગ પ્લેટફોર્મ પર ક્યારેક અયોગ્ય કન્ટેન્ટ, બાળકોને લલચાવતી જાહેરાતો અને અજાણ્યા લોકો તરફથી સંપર્ક થવાનું જોખમ રહે છે. આ ઉપરાંત વારંવાર સ્ક્રીન જોવાની આદત અને લોકોને લાંબા સમય સુધી એપ પર રોકી રાખતી સુવિધાઓ પણ ચિંતાનો વિષય છે. સરકાર ઈચ્છે છે કે બાળકોનો શારીરિક, માનસિક અને બૌદ્ધિક વિકાસ ઓનલાઈન પ્રવૃત્તિઓને કારણે પ્રભાવિત ન થાય. જોકે તમામ ગેમ્સ અને મેસેજિંગ એપ્સ પર એકસરખો પ્રતિબંધ લાગશે એવું નથી. બાળકો માટે નુકસાનકારક ન ગણાતી સેવાઓ ચાલુ રહી શકે છે.

ઉંમરની ચકાસણી કરવાની જવાબદારી કંપનીઓની રહેશે

નોર્વે સરકારના પ્રસ્તાવ મુજબ ટેકનોલોજી કંપનીઓએ પોતાના પ્લેટફોર્મનો ઉપયોગ કરનારા લોકોની ઉંમર ચકાસવાની વ્યવસ્થા કરવી પડશે. એટલે કે 16 વર્ષથી નાની ઉંમરના બાળકો નિયમ હેઠળ પ્રતિબંધિત પ્લેટફોર્મનો ઉપયોગ ન કરી શકે તે સુનિશ્ચિત કરવાની જવાબદારી કંપનીઓની રહેશે. આ માટે કંપનીઓએ ઉંમરની ચકાસણી કરતી વ્યવસ્થા ઊભી કરવી પડશે. જો કંપનીઓ પોતાની જવાબદારી યોગ્ય રીતે નિભાવવામાં નિષ્ફળ જશે તો તેમને દંડનો સામનો કરવો પડી શકે છે. સરકાર વર્ષ 2026ના અંત સુધીમાં આ અંગેનું વિધેયક સંસદમાં રજૂ કરવાની તૈયારી કરી રહી છે. જોકે આ હજી પ્રસ્તાવિત કાયદો છે, એટલે અંતિમ જોગવાઈઓ અને અમલીકરણની તારીખ અંગે વધુ સ્પષ્ટતા થવાની બાકી છે.

આ પણ વાંચોઃ સરકાર 9.30 કરોડ ખેડૂતોને આપશે દિવાળી ભેટ, જાણો PM કિસાનનો 24મો હપ્તો ક્યારે જમા થશે

ઓસ્ટ્રેલિયા સહિતના દેશોમાં પણ બાળકોના સોશિયલ મીડિયા પર નિયંત્રણ

બાળકોના સોશિયલ મીડિયા ઉપયોગ પર નિયંત્રણ મૂકવાની દિશામાં આગળ વધનાર નોર્વે એકમાત્ર દેશ નથી. ઓસ્ટ્રેલિયાએ ડિસેમ્બર 2025માં 16 વર્ષથી નાની ઉંમરના બાળકો માટે સોશિયલ મીડિયા પર પ્રતિબંધ લાગુ કરવાની શરૂઆત કરી હતી. તેના નિયમો હેઠળ Facebook, Instagram, TikTok, Snapchat અને YouTube સહિતનાં પ્લેટફોર્મને ઉંમર સંબંધિત નિયંત્રણો લાગુ કરવાની જવાબદારી સોંપવામાં આવી છે. આ ઉપરાંત યુરોપના કેટલાક દેશોમાં પણ બાળકોના ઓનલાઈન ઉપયોગને મર્યાદિત કરવા માટે કાયદાકીય પગલાં લેવામાં આવી રહ્યાં છે. નોર્વેનો નવો પ્રસ્તાવ ખાસ એટલા માટે ચર્ચામાં છે કે તેમાં માત્ર સોશિયલ મીડિયા જ નહીં પરંતુ બાળકો માટે જોખમી ગણાતી ગેમ્સ અને મેસેજિંગ સેવાઓને પણ સામેલ કરવાની તૈયારી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ