ન્યૂઝ અપડેટ્સ
6 ફોટો ગેલેરી
Last Updated: 06:58 AM, 19 November 2026
1/6
દેશમાં અત્યારે હવામાનના બે અલગ-અલગ સ્વરૂપ જોવા મળી રહ્યાં છે. એક તરફ ઉત્તર ભારતમાં ઠંડી અને ગાઢ ધુમ્મસે લોકોની મુશ્કેલીઓ વધારી દીધી છે, તો બીજી તરફ બંગાળની ખાડીમાં સર્જાયેલું ચક્રવાતી વાવાઝોડું 'અક્વાન' દક્ષિણ અને પૂર્વ ભારત તરફ આગળ વધી રહ્યું છે. આ વાવાઝોડાને કારણે અનેક રાજ્યોમાં ભારે વરસાદની ચેતવણી આપવામાં આવી છે. ભારતીય હવામાન વિભાગના તાજેતરના અપડેટ મુજબ, આગામી દિવસોમાં દેશના અલગ-અલગ વિસ્તારોમાં હવામાનમાં મોટા ફેરફારો જોવા મળી શકે છે. ખાસ કરીને દરિયાકાંઠાના વિસ્તારોમાં ભારે પવન અને વરસાદને લઈને સાવચેતી રાખવાની જરૂર છે.
2/6
ઉત્તર ભારતના પર્વતીય વિસ્તારોમાં બરફવર્ષા અને ઠંડા પવનોને કારણે તાપમાનમાં નોંધપાત્ર ઘટાડો થયો છે. કાશ્મીર ખીણના અનેક વિસ્તારોમાં લઘુત્તમ તાપમાન શૂન્ય ડિગ્રી સેલ્સિયસથી નીચે પહોંચી ગયું છે. જેના કારણે ઠંડીનું પ્રમાણ સતત વધી રહ્યું છે. પર્વતીય વિસ્તારોમાં પડી રહેલી ઠંડીની સીધી અસર હવે મેદાની વિસ્તારોમાં પણ જોવા મળી રહી છે. બીજી તરફ, દક્ષિણ ભારતના પ્રખ્યાત હિલ સ્ટેશન ઉટીમાં પણ આ સિઝનમાં પહેલીવાર હિમવર્ષા નોંધાઈ છે. જેના કારણે ત્યાં ઠંડીનું પ્રમાણ વધ્યું છે.
ADVERTISEMENT
3/6
રાજધાની દિલ્હી અને એનસીઆરમાં પણ ઠંડીનો ચમકારો જોવા મળી રહ્યો છે. ખાસ કરીને વહેલી સવારે અને રાત્રિના સમયે ઠંડીનું પ્રમાણ વધારે અનુભવાઈ રહ્યું છે. હવામાન વિભાગના જણાવ્યા અનુસાર, 19 નવેમ્બરે દિલ્હીમાં મહત્તમ તાપમાન 26 ડિગ્રી સેલ્સિયસ અને લઘુત્તમ તાપમાન 12થી 14 ડિગ્રી સેલ્સિયસ રહેવાની શક્યતા છે. આગામી દિવસોમાં તાપમાનમાં થનારા ફેરફારોને કારણે ઠંડીનો અહેસાસ વધુ વધી શકે છે.
4/6
તાપમાનમાં ઘટાડો થવાની સાથે જ ઉત્તર ભારતના મેદાની વિસ્તારોમાં ગાઢ ધુમ્મસની સમસ્યા પણ વધી રહી છે. હવામાન વિભાગે 19થી 21 નવેમ્બર દરમિયાન પંજાબ, હરિયાણા, દિલ્હી અને ઉત્તર પ્રદેશના અનેક વિસ્તારોમાં ગાઢ ધુમ્મસ છવાવાની ચેતવણી આપી છે. ખાસ કરીને વહેલી સવારે ધુમ્મસને કારણે રસ્તાઓ પર દૃશ્યતા ઓછી થઈ શકે છે. તેની અસર વાહનવ્યવહાર અને રેલવે સેવાઓ પર પણ પડી શકે છે. આ સ્થિતિને ધ્યાનમાં રાખીને વાહનચાલકોને સાવચેતીપૂર્વક વાહન ચલાવવાની સલાહ આપવામાં આવી છે.
ADVERTISEMENT
5/6
બીજી તરફ, બંગાળની ખાડીમાં સર્જાયેલું તીવ્ર ચક્રવાતી વાવાઝોડું 'અક્વાન' ચિંતાનું કારણ બન્યું છે. આ વાવાઝોડું ઉત્તર-ઉત્તરપશ્ચિમ દિશામાં આગળ વધી રહ્યું છે. ભારતીય હવામાન વિભાગના જણાવ્યા અનુસાર, 20 નવેમ્બરના બપોર સુધીમાં આ ચક્રવાત ઉત્તર આંધ્રપ્રદેશના નરસાપુર અને દક્ષિણ ઓડિશાના પુરી વચ્ચેના દરિયાકાંઠાના વિસ્તારમાંથી પસાર થવાની ધારણા છે. આ દરમિયાન પવનની ઝડપ 90થી 110 કિલોમીટર પ્રતિ કલાક સુધી પહોંચવાની શક્યતા છે. ભારે પવનને કારણે દરિયાકાંઠાના વિસ્તારોમાં મુશ્કેલીઓ ઊભી થઈ શકે છે.
6/6
ગુજરાતમાં હજુ ઉત્તર ભારત જેવી કડકડતી ઠંડીનો અનુભવ થઈ રહ્યો નથી, પરંતુ આગામી દિવસોમાં ઠંડીનો ચમકારો વધી શકે છે. હવામાન વિભાગના અમદાવાદ કેન્દ્રના જણાવ્યા અનુસાર, 19 નવેમ્બરે અમદાવાદમાં લઘુત્તમ તાપમાન 18 ડિગ્રી અને મહત્તમ તાપમાન 33 ડિગ્રી સેલ્સિયસ રહેવાની શક્યતા છે. જ્યારે 20 નવેમ્બરે લઘુત્તમ તાપમાન 19 ડિગ્રી રહેવાની આગાહી છે. બીજી તરફ, રાજ્યના ગુજરાત રિજન તેમજ સૌરાષ્ટ્ર અને કચ્છમાં 19થી 25 નવેમ્બર સુધી વરસાદને લઈને કોઈ ચેતવણી આપવામાં આવી નથી. આગામી દિવસોમાં આકાશ મુખ્યત્વે સ્વચ્છ રહેવાની શક્યતા છે. આમ, ગુજરાતમાં હાલ વરસાદની કોઈ શક્યતા નથી, પરંતુ રાત્રિ અને વહેલી સવારના સમયે ઠંડીનો અનુભવ વધી શકે છે.
સંકળાયેલા મુદ્દાઓ
જોવા જેવું
ટોપ સ્ટોરીઝ