રાજકોટ સિવિલ સુપ્રિટેન્ડેન્ટ દ્વારા લેવામાં આવ્યો મહત્વનો નિર્ણય, ઇમરજન્સીમાં સારવાર માટે પહેલા કેસ નહી કઢાવવો પડે
Share
રાજકોટ સિવિલ તંત્ર દ્વારા લેવાયો નિર્ણય
ઇમરજન્સી સારવાર માટે પહેલા કેસ કઢાવવાની જરુર નહી
મનપા નાયબ કમિશનર વીતી એટલે શાન આવી ઠેકાણે
કહેવાય છેને એતો જેના પર વીતી હોય તેજ જાણે. રાજકોટમાં પણ કંઇક આવુ જ બન્યુ. રાજકોટ સિવિલમાં ઇમરજન્સીમાં સારવાર માટે પહેલા કેસ નહી કાઢવો પડે. આ નિર્ણય રાતો રાત લેવાયો કારણ કે મનપાના નાયબ કમિશનર એ.કે સિંઘને ઇમરજન્સીમાં સારવાર લેવા માટે પહેલા કેસ કઢાવવાનું કહેવામાં આવ્યુ હતું,
પહેલા સારવાર પછી કેસ કઢાવવો
રાજકોટ સિવિલ હોસ્પિટલમાં હજારોની સંખ્યામાં દર્દીઓ આવે છે. વળી હાલમાં ડબલ સિઝન હોવાથી દર્દીઓના કેસની સંખ્યા વધારે રહે છે. તેમાં પણ જો ઇમરજન્સીમાં સારવાર લેવી હોય તો પહેલા કેસ કઢાવવા લાઇનમાં ઉભુ રહેવુ પડતુ હતું. પરંતુ હવે આ નિયમને બદલી નાંખવામાં આવ્યો છે. હવે જો તમારે ઇમરજન્સીમાં સારવાર લેવી હોય તો પહેલા કેસ કઢાવવાની જરુર નહી પડે. તમને સારવાર તાત્કાલિક અસરથી મળી જશે.
કેમ લેવાયો આ નિર્ણય ?
ખરેખરમાં બનાવ એવો બન્યો હતો કે બે દિવસ અગાઉ રાજકોટ મહાનગર પાલિકાના નાયબ કમિશનર એ.કે.સિંઘને હાથમાં વાગ્યુ હતું. જેથી તેઓ તાત્કાલિક અસરથી સારવાર કરાવવા રાજકોટ સિવિલ દોડી ગયા . પરંતુ અહીં તેઓને ઇમરજન્સીમાં સારવાર આપવાને બદલે તેમને પહેલા કેસ કઢાવવાનું કહેવામાં આવ્યું હતું. આ દરમિયાન કલેક્ટર અરુણ મહેશ બાબુ પણ સારવાર માટે તેઓની સાથે પહોંચ્યા હતા. પરંતુ કલેક્ટરને ઓળખ્યા વિના જ લેડી ડોક્ટરને પહેલા કેસ કઢાવવા કહેવામાં આવ્યુ હતું
મહિલા ડૉક્ટરની રાતોરાત બદલી
રાજકોટ સિવિલની મહિલા ડોક્ટર કે જેના કારણે આ ઘટના બની તેનું નામ ડૉ.હેમલતાબેન છે. ઘટનાને પગલે તેઓને રાતોરાત ભુજ આરોગ્ય કેન્દ્રમાં ડેપ્યુટેશનમાં મુકી દેવાયા છે. પરંતુ અહીં રાજકોટ સિવિલના તંત્ર પર સવાલ થાય છે કે જ્યારે અધિકારીઓએ હેરાનગતિ વેઠવી પડી ત્યારે જ કેમ નિયમો બદલાયા ? અત્યાર સુધી પ્રજા કેસ કઢાવવા લાઇનમાં ઉભી રહીને થાકી ત્યારે તમને દર્દીની પીડા ન દેખાઇ ? મનપાના નાયબ કમિશનરને ઇમરજન્સીમાં કેસ કઢાવવો પડ્યો ત્યારે તમને ખબર પડી કે નિયમ આવો ન હોવો જોઇએ ?
