- બિહાર વિધાનસભામાં જીતનરામ માંઝી પર બરાબરના ભડક્યાં
- 'મારી મૂર્ખતાને કારણે CM બન્યાં'
- જીતનરામ માંઝી છે બિહારના પૂર્વ સીએમ
- માંઝીએ પણ કર્યો પલટવાર
મહિલાઓ પર અભદ્ર નિવેદન આપીને આખા દેશમાંથી ટીકાનો સામનો કરનાર બિહારના સીએમ નીતિશ કુમાર ફરી ચર્ચામાં આવ્યાં છે. વિધાનસભામાં અનામત સુધારા બીલ પર ચર્ચા વખતે નીતિશ કુમાર અને પૂર્વ સીએમ જીતનરામ માંઝી વચ્ચે ઉગ્ર બોલાચાલી હતી. ઉલ્લેખનીય છે કે જીતનરામ માંઝી બિહારના પૂર્વ સીએમ છે અને નીતિશ કુમારે જ તેમને મુખ્યમંત્રી બનાવ્યા હતા. ચર્ચા દરમિયાન પૂર્વ મુખ્યમંત્રી જીતનરામ માંઝીએ કહ્યું હતું કે અમે નથી માનતા કે બિહારની જાતિગત વસ્તી ગણતરી સાચી રહી છે. જો આંકડા ખોટા હશે તો તેનો લાભ સાચા લોકો સુધી નહીં પહોંચે. માંઝીના આ સવાલ પર નીતિશ ભડકી ઉઠ્યાં અને બોલ્યાં કે આ માણસ (માંઝી)ને એક વિચાર છે. અમે તેમને મુખ્યમંત્રી બનાવ્યા. બે જ મહિનામાં મારા પક્ષના માણસો કહેવા લાગ્યા કે આને દૂર કરો. આ એક ગડબડ છે. પછી અમે મુખ્યમંત્રી બન્યા. તે કહેતા રહે છે કે તે મુખ્ય પ્રધાન હતા ... આ મુખ્ય પ્રધાન શું હતા? મારી મૂર્ખતાને કારણે તેઓ સીએમ બન્યા. નીતીશે વધુમાં કહ્યું કે તેઓ (માંઝી) રાજ્યપાલ બનવા માંગે છે. આ પછી સીએમએ ભાજપના ધારાસભ્યો તરફ ઈશારો કરતા કહ્યું- તેમને રાજ્યપાલ બનાવો. આ પછી સ્થિતિ બગડતી જોઈ કેટલાક ધારાસભ્યો અને તેજસ્વી યાદવે સત્તાધારી પક્ષ વતી નીતિશને આડે હાથ લીધા હતા. બાદમાં વિજય કુમાર ચૌધરીએ નીતિશને રોક્યા હતા.
કોણ છે જીતનરામ માંઝી
જીતનરામ માંઝીને પહેલા નીતિશ કુમારના સૌથી નજીકના નેતાઓમાંના એક માનવામાં આવતા હતા. 2014માં જ્યારે લોકસભા ચૂંટણીમાં જેડીયુને કારમી હારનો સામનો કરવો પડ્યો હતો ત્યારે નીતિશે સીએમ પદ પરથી રાજીનામું આપી દીધું હતું અને 9 મે, 2014ના રોજ પોતાના 'વિશ્વાસુ' મહાદલિત સમાજના સભ્ય જીતન રામ માંઝીને મુખ્યમંત્રી બનાવ્યાં હતા. શુરૂઆતમાં માંઝીને 'રિમોટ કંટ્રોલ સીએમ' કહેવામાં આવતા હતા, પરંતુ ધીરે ધીરે માંઝી પોતે મોટા નિર્ણયો લેવા લાગ્યા અને નીતિશથી તેમનું અંતર વધવા લાગ્યું. જ્યારે પરિસ્થિતિ ધીરે ધીરે બગડી તો પાર્ટીએ માંઝીને રાજીનામું આપવા માટે કહ્યું પરંતુ તેમણે ના પાડી દીધી. ત્યારબાદ તેમને જેડી(યુ)માંથી હાંકી કાઢવામાં આવ્યા હતા. આ રીતે જીતનરામ માંઝી મે 2014થી ફેબ્રુઆરી 2015 સુધી નવ મહિના સુધી બિહારના સીએમ રહ્યા હતા.
બિહાર વિધાનસભામાં અનામત સુધારા બીલ પાસ
બિહારની નીતિશ સરકારે આજે વિધાનસભામાં અનામતનો વ્યાપ વધારતું બીલ રજૂ કર્યું હતું જેમાં પછાત વર્ગો, અતિ પછાત વર્ગ, અનુસૂચિત જાતિ, અનુસૂચિત જનજાતિ માટે 65 ટકા અનામત મળવાની જોગવાઈ છે. હાલ બિહારમાં આ વર્ગોને 50 ટકા અનામત મળે છે. જાતિ ગણતરીનો રિપોર્ટ રજૂ કર્યા બાદ સીએમ નીતિશ કુમારે રાજ્યમાં 65 ટકા અનામતની જાહેરાત કરી હતી.
હાલ બિહારમાં અનામતની મર્યાદા 50 ટકા છે. ઇડબલ્યુએસને અલગથી 10 ટકા રિઝર્વેશન મળતું હતું. પરંતુ, જો નીતિશ સરકારનો પ્રસ્તાવ પાસ થઇ જાય તો અનામતની 50 ટકા મર્યાદા તૂટી જશે. બિહારમાં કુલ 65 ટકા અનામત મળશે. આ સિવાય ઈડબલ્યુએસનું 10 ટકા અનામત અલગ રહેશે. બિહાર કેબિનેટે મંગળવારે જાતિ આધારિત અનામતને 50 ટકાથી વધારીને 65 ટકા કરવાના પ્રસ્તાવને મંજૂરી આપી દીધી છે. અત્યાર સુધી પછાત અને અતિ પછાત વર્ગોને 30 ટકા અનામત મળતું હતું પરંતુ જો નવી મંજૂરી મળશે તો 43 ટકા અનામતનો લાભ મળશે. એ જ રીતે અગાઉ અનુસૂચિત જાતિ માટે 16 ટકા અનામત હતી, હવે તેમને 20 ટકા અનામત મળશે. અનુસૂચિત જનજાતિ કેટેગરીમાં એક ટકા અનામત હતી, હવે બે ટકા અનામત મળશે. આ સિવાય તેને વધારીને 75 ટકા કરવાની દરખાસ્ત છે, જેમાં કેન્દ્ર સરકાર દ્વારા આર્થિક રીતે પછાત સામાન્ય ગરીબ વર્ગ (EWS) માટે 10 ટકા અનામત આપવામાં આવી છે.તાજેતરમાં જ બિહારમાં જાતિની વસ્તી ગણતરીના પરિણામો જાહેર કરવામાં આવ્યા હતા.
