જાળવણી ક્યાં? / વડોદરા મનપાની બેદરકારી: 20 ઈ-રિક્ષા બની ભંગાર, તો બીજી બાજુ  મોંઘી બ્રિફકેસ આપવાની પરંપરામાં 50 લાખ ખર્ચ્યા

• વડોદરા મહાનગરપાલિકાની બેદરકારી
• 20 ઈ-રિક્ષા બની ભંગાર
• જાળવણીના અભાવે રિક્ષા બની ભંગાર

વડોદરા મહાનગર પાલિકા અને વિવાદનો સંબંધ બહુ જુનો છે. વડોદરા મહાનગર પાલિકા વારંવાર વિવાદમાં આવતી રહે છે. આ વખતે વડોદરા મહાનગર પાલિકાની બેદરકારીને કારણે કરોડોના ખર્ચે ખરીદવામાં આવેલી 40 ઈ-રિક્ષામાંથી 20 ઈ-રિક્ષાની હાલ ભંગાર જેવી થઈ ગઈ છે. ત્યારે બીજી તરફ વર્ષોથી ચાલતી આવતી બોર્ડ બેઠક દરમિયાન બ્રિફકેસ આપવાની પરંપરામાં કોર્પોરેટરોને મોઘી દાટ બ્રિફકેશ આપવા પાછળ છેલ્લા 8 વર્ષમાં 50 લાખ રૂપિયાનો ખર્ચો કરતા ફરી એક વખત વડોદરા મહાનગર પાલિકા વિવાદમાં આવી છે. જેથી પ્રજાના પૈસાનું પાણી કરતી વડોદરા મહાનગર પાલિકા સામે અનેક સવાલો ઉભા થઈ રહ્યા છે.

બેદરકારી માટે જવાબદાર કોણ ?
આ દ્રશ્યો કોઈ ભંગારના ગોડાઉનના નથી. વડોદરા મહાનગર પાલિકાના વર્કશોપના છે જ્યાં જાળવણીના અભાવે 20 ઈ-રિક્ષાની હાલત ભંગાર થઈ ગઈ છે. વડોદરા શહેરના ચાર ઝોનમાં અને ૧૨ વોર્ડમાં આવેલ સાંકડી ગલીઓ અને પોળોમાં આસાનીથી વાહન જાય અને ઘરે ઘરે ફરી કચરો ઉઠાવી તેનો યોગ્ય નિકાલ કરે તે માટે વર્ષ 2017માં વડોદરા શહેરમાં સ્માર્ટ સીટી અતર્ગત 2 કરોડના ખર્ચે 40 ઈ-રિક્ષા ખરીદવામાં આવી હતી. શહેરની સફાઈના હેતુથી ઈ-રિક્ષા લાવવામાં આવી હતી પરંતુ જેમાંથી 20 ઈ-રિક્ષા જાણવણીના અભાવે ભંગાર હાલતમાં ફેરવાઈ ચૂંકી છે. જેને લઈને વડોદરાવાસીઓમાં મહાનગરપાલિકા વિરૂદ્ધ ભારે રોષ જોવા મળી રહ્યો છે.

બ્રિફકેસ  50 લાખની બ્રિફકેસ
ભંગાર ઈ-રિક્ષાને લઈ જ્યારે સ્ટેન્ડીગ કમિટિના ચેરમેન ડો.હિતેન્દ્ર પટેલ સાથે વાત કરવામાં આવી તો તેમણે તેને રિપેરિંગ કરવાની હોવાની વાત કહી હતી. અને રિપેરિંગ બાદ ઈ-રિક્ષાના ઉપયોગની વાત કહી હતી. બીજી તરફ વડોદરા મહાનગરપાલિકાએ બ્રિફ્કેશ પાછળ કરેલા ખર્ચને લઈ RTIમાં ચોકાવનારો ખુલાસો થયો હતો. બજેટ બોર્ડ બેઠક દરમિયાન મોંઘી બ્રિફકેસ આપવાની પરંપરા ને લઈ છેલ્લા 8 વર્ષ માં કોર્પોરેશને 50 લાખ ખર્ચ કર્યો છે. કરોડપતિ કોર્પોરેટર પણ બેગ લઈ ગયા હોવાનો સામાજીક કાર્યકર્તાએ આરોપ લગાવ્યો હતો. ત્યારે પોતાને પ્રજાના સેવક કહેતા કોર્પોરેટરો પાછળ લાખો રૂપિયાની બેગની લહાણી કરતા વડોદરા મહાનગરપાલિકા સામે લોકો સવાલ ઉઠાવી રહ્યા છે.