નેશનલ / પેપર લીક મામલે સરકાર લાવશે કડક કાયદો, લોકસભામાં આજે રજૂ કરાશે 'જાહેર પરીક્ષા (ગેરરીતિ નિવારણ) સુધારા વિધેયક-2026'

Public Examination Amendment Bill 2026: સરકાર ચોમાસુ સત્ર દરમિયાન 'જાહેર પરીક્ષા (ગેરરીતિ નિવારણ) સુધારા વિધેયક, 2026' રજૂ કરવા જઈ રહી છે. આ વિધેયકનો ઉદ્દેશ્ય પરીક્ષાના પ્રશ્નપત્રો લીક થવા અને ગેરરીતિ (નકલ) જેવી અયોગ્ય પ્રવૃત્તિઓ પર રોક લગાવવાનો છે.

સંસદનું ચોમાસુ સત્ર હાલમાં ચાલી રહ્યું છે. લગભગ દોઢ મહિનાથી ચાલી રહેલા NEET પેપર લીક વિવાદ અને વિદ્યાર્થીઓની ચિંતાઓને ધ્યાનમાં રાખીને, સરકાર આ અંગે એક સંબંધિત ખરડો રજૂ કરવાની તૈયારી કરી રહી છે. ચોમાસુ સત્ર દરમિયાન સોમવારે લોકસભામાં 'જાહેર પરીક્ષા (ગેરરીતિ નિવારણ) સુધારા વિધેયક 2026' રજૂ કરવામાં આવશે.

ડો. જિતેન્દ્ર સિંહ રજૂ કરશે બિલ

કેન્દ્રીય મંત્રી ડૉ. જિતેન્દ્ર સિંહ ગૃહમાં આ ખરડો રજૂ કરશે. બિલ રજૂ થયા બાદ, સરકાર તેના પર વિચારણા અને તેને પસાર કરવા માટેનો પ્રસ્તાવ પણ રજૂ કરશે.

પરીક્ષામાં સુધાર કરવા માટે આવશે બિલ

• આ સુધારો 'જાહેર પરીક્ષાઓ (ગેરરીતિ નિવારણ) અધિનિયમ, 2024'માં કરવામાં આવતા ફેરફારોને લગતો છે. જાહેર પરીક્ષાઓમાં પ્રશ્નપત્ર લીક થવાની ઘટનાઓ, ગેરરીતિઓ અને અન્ય અયોગ્ય પ્રથાઓને રોકવાના ઉદ્દેશ્યથી આ કાયદો ઘડવામાં આવ્યો હતો.
• આ ઉપરાંત, આજે લોકસભામાં 'સુપ્રીમ કોર્ટ (જજોની સંખ્યા) સુધારા વિધેયક, 2026' પર ચર્ચા કરવાની અને તેને પસાર કરવાની કાર્યવાહી પણ નિર્ધારિત છે.
• કેન્દ્રીય કાયદા મંત્રી અર્જુન રામ મેઘવાલ ગૃહમાં આ ખરડો રજૂ કરશે. આ ખરડાનો ઉદ્દેશ્ય સુપ્રીમ કોર્ટમાં ન્યાયાધીશોની સંખ્યા અંગેની જોગવાઈઓમાં સુધારો કરવાનો છે.

ઉલ્લેખનીય છે કે, જંતર-મંતર ખાતેના વિરોધ પ્રદર્શનો સહિત દેશભરમાં વિદ્યાર્થીઓના વિરોધ બાદ સરકારે આ બાબતે મક્કમ વલણ અપનાવવાનો નિર્ણય કર્યો છે. કેન્દ્ર સરકાર હવે પરીક્ષાઓને લઈને સતર્ક છે અને સતત સુધારાઓની જાહેરાત કરી રહી છે. આ સંદર્ભમાં, વડાપ્રધાન મોદી પોતે નિયમિતપણે ઇન્સ્ટાગ્રામના માધ્યમથી પરીક્ષા સુધારણા અને પેપર લીક સામે કડક કાર્યવાહી પ્રત્યે સરકારની પ્રતિબદ્ધતા વ્યક્ત કરી રહ્યા છે.

વધુ વાંચો : નંદન નીલેકણીની અધ્યક્ષતામાં બનશે હાઈ પાવર ટાસ્ક ફોર્સ, પરીક્ષામાં સુધારાને લઇ PM મોદીનું એલાન

બિલ પર ચર્ચા માટે લિસ્ટમાં યુવા સાંસદોનું નામ

• આ મહત્વપૂર્ણ બિલ પર અંદાજે 8 થી 10 કલાક સુધી ચર્ચા થવાની અપેક્ષા છે. NDAએ આ ચર્ચામાં પોતાના યુવા સાંસદોને મુખ્ય ભૂમિકામાં રજૂ કરવાની રણનીતિ ઘડી છે અને સરકારનું પ્રતિનિધિત્વ કરતા મોટાભાગના વક્તાઓ આ યુવા જૂથમાંથી જ હશે.
• ભાજપ તરફથી બંસુરી સ્વરાજ અને તેજસ્વી સૂર્યા આ ચર્ચામાં ભાગ લેશે. આ ઉપરાંત, સહયોગી પક્ષોના અનેક સાંસદો જેમાં સયોની ઘોષ, મિતાલી બાગ, લાવુ શ્રી કૃષ્ણ દેવરાયલુ, લલ્લન સિંહ, ડૉ. શ્રીકાંત શિંદે, સુનીલ તટકરે, અનુપ્રિયા પટેલ અને અરુણ ભારતીનો સમાવેશ થાય છે તેમના પણ સંબોધન કરવાની શક્યતા છે.
• આ ઉપરાંત, નવા શિક્ષણ મંત્રી પ્રહલાદ જોશી આજે પ્રથમ વખત 'પ્રશ્નકાળ' દરમિયાન શિક્ષણ મંત્રાલયને લગતા પ્રશ્નોના જવાબ આપશે. સત્રની તૈયારીમાં મદદરૂપ થવા માટે મંત્રાલયના અધિકારીઓએ રવિવારે તેમને વિગતવાર માહિતી પણ આપી હતી.

જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ