નેશનલ / રેલવે કાઉન્ટર પરથી ટિકિટ ખરીદવા પર મળશે ઇન્શ્યોરન્સ? વાંચો સુપ્રીમ કોર્ટનો આદેશ

સુપ્રીમ કોર્ટે તમામ ટ્રેન મુસાફરો માટે વીમા કવરેજનો આદેશ આપ્યો છે. ભારતીય રેલવેને 27 ઓક્ટોબરથી કાઉન્ટર પરથી ખરીદેલી ટિકિટ માટે વીમા કવરેજ આપવાનો નિર્દેશ આપવામાં આવ્યો છે. કોર્ટે ચેતવણી આપી છે કે આ આદેશનો અમલ કરવામાં કોઈપણ નિષ્ફળતા સીધી રીતે રેલ્વે બોર્ડને જવાબદાર ઠેરવશે.

સુપ્રીમ કોર્ટે 6 ઓક્ટોબરના રોજ જૂન 2023માં ઓડિશા ટ્રેન અકસ્માત સંબંધિત અરજીની સુનાવણી દરમિયાન આ નિર્દેશ કર્યો હતો. અરજીમાં અકસ્માતની તપાસ માટે કમિશનની રચના કરવાની માંગ કરવામાં આવી હતી. અરજદારે આ અકસ્માત માટે રેલવેની "કવચ" સલામતી પ્રણાલી લાગુ કરવામાં નિષ્ફળતાને જવાબદાર ઠેરવી હતી. અરજીમાં તમામ ટ્રેનોમાં આ સિસ્ટમ ટૂંક સમયમાં લાગુ કરવાનો આદેશ આપવાની પણ માંગ કરવામાં આવી હતી.

કેસની સુનાવણી કરતા ન્યાયાધીશ અહસાનુદ્દીન અમાનુલ્લાહ અને આર. મહાદેવનની બેન્ચે મુસાફરોની સલામતી સંબંધિત અન્ય મુદ્દાઓ પર પણ ધ્યાન દોર્યું હતું. આમાં રેલવે ફૂટ ઓવરબ્રિજ, પટરી આસપાસ વાડ અને કાઉન્ટર પરથી ખરીદેલી ટિકિટ પર વીમા સુવિધાનો અભાવ જેવા મુદ્દાઓનો સમાવેશ થાય છે.

'જમીન પર કોઈ મોટા ફેરફારો નથી'

ગત સુનાવણી દરમિયાન સુપ્રીમ કોર્ટે રેલવે બજેટમાં મુસાફરોની સલામતી માટે કરવામાં આવેલી ફાળવણી સામે નારાજગી વ્યક્ત કરી હતી. કોર્ટે આશા વ્યક્ત કરી હતી કે આ દિશામાં વધુ કામ કરવામાં આવશે.

11 મેના રોજ કેન્દ્ર સરકારે કોર્ટને ખાતરી આપી હતી કે ઑફલાઇન ખરીદેલી ટિકિટો, એટલે કે ઓવર-ધ-કાઉન્ટર પર વીમો આપવાનો નિર્ણય લેવામાં આવ્યો છે, અને અમલીકરણ પદ્ધતિઓ પર કામ કરવામાં આવી રહ્યું છે.

બેન્ચે એ પણ કહ્યુ કે એ વાતની જાણકારી નથી આપવામાં આવી કે, "કવચ" સુરક્ષા વ્યવસ્થાના વિસ્તરણ, ફૂટઓવરબ્રિજનું નિર્માણ અને રેલ્વે ટ્રેક આસપાસ ફેન્સીંગને પ્રાથમિકતા આપવા માટે શું પગલાં લેવામાં આવ્યા છે. કોર્ટના અગાઉના આદેશો પછી આ પ્રોજેક્ટ્સ પર કેટલું ધ્યાન આપવામાં આવ્યું તેની પણ માહિતી આપવામાં નથી આવી.

આ પણ વાંચોઃ રાહુલ ગાંધીની અરજીની ખામીઓ દૂર, સુપ્રીમ કોર્ટમાં સુનાવણીની સંભવિત તારીખ સામે આવી

કોર્ટે રેલવેને બે મહિનાની અંદર આ પ્રોજેક્ટ્સ માટે ફાળવવામાં આવેલા બજેટ અને નાણાકીય સંસાધનો સહિત આ ત્રણ મુદ્દાઓ પર કરવામાં આવેલા ચોક્કસ પ્રયાસોની વિગતો આપતો અહેવાલ રજૂ કરવાનો નિર્દેશ આપ્યો હતો. કોર્ટે રેલવેને જમીન પર કરવામાં આવેલા વાસ્તવિક કાર્યની માહિતી રેકોર્ડ પર મૂકવા પણ કહ્યું હતું.

6 ઓક્ટોબરના કેસની ફરીથી સુનાવણી કરતા સુપ્રીમ કોર્ટે રેલવે મંત્રાલયના અધિકારીઓના વલણ પર "ઊંડી નિરાશા અને નારાજગી" વ્યક્ત કરી હતી. કોર્ટે જણાવ્યું હતું કે આ જનતાની સલામતી સાથે સંકળાયેલો ખૂબ જ ગંભીર મામલો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ