Please Help / 'મણિપુરના લોકોના જીવ...' ઓલિમ્પિકમાં દેશનું નામ રોશન કરનાર મીરાંબાઈએ હાથ જોડીને PM મોદીને શું અપીલ કરી?

• ઓલિમ્પિક મેડલ વિજેતા મીરાબાઈ ચાનુએ પીએમ મોદીને કરી અપીલ
• મણિપુર હિંસાને લઈને મીરાબાઈએ ચિંતા વ્યક્ત કરતા સરકારને કરી અપીલ
• ટ્વિટર એકાઉન્ટ પરથી વીડિયો શેર કરીને વડાપ્રધાન મોદીને કરી અપીલ

હું વડા પ્રધાન નરેન્દ્ર મોદી અને ગૃહ પ્રધાન અમિત શાહને આ સંઘર્ષને વહેલી તકે સમાપ્ત કરવાની અપીલ કરું છું. જેથી મણિપુરના લોકોના જીવન બચાવી શકાય. અને તેઓ પહેલાની જેમ શાંતિથી પોતાનું જીવન જીવી શકે. આવું કહેવું છે ઓલિમ્પિક મેડલ જીતનારી વેઈટલિફ્ટર મીરાબાઈ ચાનુનું. તેણે પોતાના ટ્વિટર એકાઉન્ટ પરથી આ અપીલનો વીડિયો પણ જાહેર કર્યો છે. મણિપુર હિંસામાં મૈતી અને કુકી સમુદાયો વચ્ચે 3 મેથી સંઘર્ષ ચાલી રહ્યો છે. આમાં લગભગ 150 લોકોના મોત થયા છે. લાખો લોકોને ઘર છોડવાની ફરજ પડી છે.

I request Hon'ble Prime Minister @narendramodi_in sir and Home Minister @AmitShah sir to kindly help and save our state Manipur. 🙏🙏 pic.twitter.com/zRbltnjKl8

— Saikhom Mirabai Chanu (@mirabai_chanu) July 17, 2023

મીરાબાઈ ચાનુ અમેરિકામાં ટ્રેનિંગ લઈ રહી છે

મીરાબાઈ ચાનુ હાલ અમેરિકામાં ટ્રેનિંગ લઈ રહી છે. તેણે ખેલાડીઓ માટે પોતાની ચિંતા પણ વ્યક્ત કરી હતી. વીડિયોમાં તેણે કહ્યું કે, મણિપુરમાં ચાલી રહેલા સંઘર્ષને લગભગ ત્રણ મહિના થવા જઈ રહ્યા છે. પરંતુ હજુ પણ દૂર-દૂર સુધી શાંતિ દેખાતી નથી. ઘણા ખેલાડીઓ તેના કારણે તાલીમ પણ લઈ શકતા નથી. નાના બાળકોના શિક્ષણને પણ આ લડાઈથી અસર થઈ છે. ઘણા લોકોએ જીવ ગુમાવ્યા છે. ઘણા ઘરો બળીને ખાખ થઈ ગયા છે.

ટોક્યોમાં સિલ્વર મેડલ જીત્યો

મીરાબાઈ ચાનુએ 2021 ટોક્યો ઓલિમ્પિકમાં 49 કિગ્રા વજન વર્ગમાં સિલ્વર મેડલ જીત્યો હતો. તેણી કહે છે કે આટલા દૂર હોવા છતાં પણ તે પોતાના ઘરમાં ચાલી રહેલી લડાઈ વિશે વિચારવાથી પોતાને રોકી શકતી નથી. ઍમણે કહ્યું, મારું ઘર મણિપુરમાં છે. હું હાલમાં અમેરિકામાં આગામી વર્લ્ડ ચેમ્પિયનશિપ અને એશિયન ગેમ્સની તૈયારીમાં રહું છું. હું મણિપુરમાં નથી, પણ હું હંમેશા ત્યાં ચાલી રહેલા સંઘર્ષના અંત વિશે વિચારું છું.

જનજાતિ માટે અનામત અંગેના મતભેદને કારણે હિંસા

મણિપુર હિંસા આદિવાસી જૂથો અને બહુમતી મૈતી સમુદાય વચ્ચે આર્થિક લાભો અને અનુસૂચિત જનજાતિ માટે અનામત અંગેના મતભેદને કારણે શરૂ થઈ હતી. મણિપુર હાઈકોર્ટે 27 માર્ચે આદેશ જારી કર્યો હતો. જેમાં રાજ્ય સરકારને મૈતી સમુદાયને અનુસૂચિત જનજાતિ (ST)માં સમાવવા માટે કહેવામાં આવ્યું હતું. આ આદેશ સામે 3 મેના રોજ વિરોધ પ્રદર્શન કરવામાં આવ્યું હતું. જે બાદ રાજ્યના ઘણા વિસ્તારોમાં હિંસા શરૂ થઈ હતી.