મોંઘવારી / મોટી ખબર : CNGના ભાવમાં 12 રુપિયા સુધી વધારાની શક્યતા, રાંધણ ગેસ પણ આપશે ઝટકો

• સામાન્ય જનતાને લાગશે મોંઘવારીનો ડામ 
• આગામી સમયમાં સીએનજીના ભાવમાં થઈ શકે 12 રુપિયા સુધીનો વધારો 
• રાંધણ ગેસના ભાવમાં પણ વધારાની સંભાવના 
•  મુંબઈમાં વધ્યાં CNG અને PNGના ભાવ
• CNGની કિંમતમાં 6 રુપિયા અને PNGમાં 4 રુપિયાનો વધારો 

તહેવારોની સિઝનમાં મોંઘવારીના મોરચે સામાન્ય માણસને મોટો ઝટકો લાગી શકે છે કારણ કે આગામી સમયમાં સીએનજીના ભાવમાં  8થી લઈને 12 રુપિયા સુધીના વધારાનું નિષ્ણાંતોનું અનુમાન છે. મુંબઈ જેવા મોટા શહેરમાં તો સીએનજી અને પીએનજીના ભાવમાં વધારો પણ કરી દેવાયો છે. સિટી ગેસ ડિસ્ટ્રીબ્યુશન કંપની મહાનગર ગેસ લિમિટેડે મુંબઈમાં CNGની કિંમતમાં 6 રુપિયા અને PNGમાં 4 રુપિયાનો વધારો જાહેર કર્યો છે. નિષ્ણાંતોનું અનુમાન હતું કે સીએનજીના ભાવમાં 8થી 12 રુપિયાનો વધારો થઈ શકે છે જોકે આ દેશવ્યાપી અનુમાન હતું પરંતુ કંપનીએ મુંબઈના સીએનજીના ભાવમાં વધારો કર્યો છે. હવે દેશના બીજા શહેરોમાં સીએનજી અને પીએનજીનો ભાવ વધી શકે છે. 

મુંબઈમાં કેટલી થઈ સીએનજી અને પીએનજીની કિંમત 
મહાનગર ગેસ લિમિટેડ દ્વારા સોમવારે સાંજે જારી કરવામાં આવેલા એક નિવેદનમાં એવું જણાવાયું કે  મુંબઈમાં 6 રુપિયાના વધારા સાથે CNGનો ભાવ કિલો દીઠ 86 રુપિયા અને PNGનો ભાવ 52.50 રહેશે. 

સીએનજીના ભાવમાં 8-12 રૂપિયાના વધારાની શક્યતા 
સરકારે કુદરતી ગેસના ભાવમાં વધારો કર્યા બાદ સીએનજીના ભાવ આસમાને પહોંચવાની ધારણા છે. સીએનજીના ભાવમાં 8-12 રૂપિયા પ્રતિ કિલોનો વધારો થઇ શકે છે. આ ઉપરાંત પીએનજીના ભાવમાં પણ વધારો થઇ શકે છે. બજારના જાણકારોના જણાવ્યા પ્રમાણે તેમાં યુનિટ દીઠ રૂ.6નો વધારો થઇ શકે છે. હકીકતમાં સરકારે ગત અઠવાડિયે જુના ગેસ ક્ષેત્રોમાંથી નીકળનાર ગેસ માટે ચૂકવણી દર 6.1 ડોલર પ્રતિ મિલિયન બ્રિટીશ થર્મલ યુનિટથી વધારીને 8.57 ડોલર પ્રતિ યુનિટ કર્યો હતો. આ રેટને આધારે દેશમાં પેદા થતી ગેસના લગભગ બે તૃતિયાંશ હિસ્સાનું વિતરણ થાય છે.