કામની વાત / વગર પરીક્ષાએ નોકરી? અગ્નિવીરો માટે ખુશખબરી, 250ને મળ્યો જોઈનિંગ લેટર

અગ્નિવીરો માટે સરકારી નોકરીને લઈને મોટા સમાચાર સામે આવ્યા છે. મહારાષ્ટ્ર સરકારે ભારતીય નૌકાદળના 250થી વધુ ભૂતપૂર્વ અગ્નિવીરોને કોસ્ટલ પોલીસ ફોર્સમાં સામેલ કર્યા છે. ખાસ વાત એ છે કે આ જવાનોને કોઈ નવી ભરતી પરીક્ષા આપ્યા વગર સીધી નિમણૂક આપવામાં આવી છે.

250થી વધુ અગ્નિવીરોને મળી સરકારી નોકરી

મહારાષ્ટ્રના મુખ્યમંત્રી દેવેન્દ્ર ફડણવીસે શુક્રવારે નાગપુરમાં આ અંગેની માહિતી આપી હતી. તેમણે જણાવ્યું કે ભારતીય સશસ્ત્ર દળોમાં ચાર વર્ષનો કાર્યકાળ પૂરો કરનારા અગ્નિવીરોને જો મહારાષ્ટ્ર પોલીસમાં જોડાવું હોય તો સરકાર તેમને તક આપશે. આ નિર્ણયથી સૈન્યમાં સેવા આપી ચૂકેલા યુવાનોને સરકારી નોકરી મેળવવાનો માર્ગ સરળ બનશે.

પહેલા બેચમાં નૌકાદળના જવાનો સામેલ

મહારાષ્ટ્ર કોસ્ટલ પોલીસ ફોર્સમાં સામેલ કરવામાં આવેલા પહેલા બેચમાં ભારતીય નૌકાદળના જવાનો છે. આ જવાનો રાજ્યની દરિયાઈ સુરક્ષા મજબૂત કરવામાં મદદ કરશે. દરિયાઈ સરહદોની સુરક્ષા માટે વિશેષ તાલીમ અને અનુભવની જરૂર પડે છે. નૌકાદળમાં તાલીમ મેળવી ચૂકેલા આ જવાનોનો અનુભવ કોસ્ટલ પોલીસ માટે ઉપયોગી સાબિત થશે.

ભરતી પરીક્ષા વગર સીધી નિમણૂક

મુખ્યમંત્રી દેવેન્દ્ર ફડણવીસે જણાવ્યું કે અગ્નિવીરોને કોઈ નવી ભરતી પરીક્ષા આપ્યા વગર સીધી નિમણૂક આપવામાં આવી છે. સશસ્ત્ર દળોમાં ભરતી થવા માટે તેઓ અગાઉ જ મુશ્કેલ પસંદગી પ્રક્રિયામાંથી પસાર થઈ ચૂક્યા છે અને સઘન તાલીમ મેળવી ચૂક્યા છે. તેથી તેમને ફરીથી બીજી પરીક્ષા આપવાની જરૂર ન હોવાનું સરકારે માન્યું છે. આ જવાનોને સીધા નિમણૂક પત્ર આપવામાં આવ્યા છે.

આ પણ વાંચોઃ YouTubeની જાહેરાતોથી મળશે છુટકારો! Airtelના ₹200ના રિચાર્જમાં 18થી વધુ OTT પ્લેટફોર્મનો લાભ

અગ્નિવીરો માટે નિયમોમાં ફેરફાર કરાયો

ફડણવીસે જણાવ્યું કે ભૂતપૂર્વ અગ્નિવીરોને પોલીસ દળમાં સામેલ કરવા માટે સરકારે નિયમોમાં કેટલાક ફેરફાર કર્યા છે. આ ફેરફારો બાદ 250થી વધુ ભૂતપૂર્વ નૌસૈનિક અગ્નિવીરોને કોસ્ટલ પોલીસમાં સામેલ કરવાનો માર્ગ ખુલ્યો છે. સરકારનો હેતુ સૈન્યમાં અનુભવ મેળવી ચૂકેલા યુવાનોની ક્ષમતાનો ઉપયોગ રાજ્યની સુરક્ષા વ્યવસ્થામાં કરવાનો છે.

મહારાષ્ટ્ર પોલીસમાં પણ મળશે તક

આ પહેલાં પણ મુખ્યમંત્રી દેવેન્દ્ર ફડણવીસે જાહેરાત કરી હતી કે સશસ્ત્ર દળોમાં ચાર વર્ષનો કાર્યકાળ પૂરો કરનારા અગ્નિવીરોને મહારાષ્ટ્ર પોલીસ અને રાજ્ય સરકારના અન્ય સુરક્ષા દળોમાં સામેલ કરવામાં આવશે. આ માટે તેમને નવી ભરતી પરીક્ષા આપવાની કે ફરીથી તાલીમ લેવાની જરૂર નહીં પડે. આ નિર્ણયથી ભવિષ્યમાં સેવા પૂર્ણ કરનારા અગ્નિવીરોને પણ રાજ્યના સુરક્ષા દળોમાં જોડાવાની તક મળી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ