ગુજરાત / અમદાવાદના ખોખરામાં તંત્રની બેદરકારી? 20 દિવસથી હજારો લિટર પાણીનો બગાડ છતાં સમારકામ નહીં!

ઓનલાઈન ફરિયાદો અને રજૂઆતો છતાં સમારકામ ન થતાં સ્થાનિકો પરેશાન છે, જ્યારે રસ્તા પર પાણી ભરાવાથી મચ્છરોનો ઉપદ્રવ અને રોગચાળાની ભીતિ પણ વધી છે.

શહેરના ખોખરા વોર્ડમાં આવેલા સર્વોદયનગર ગુજરાત હાઉસિંગ બોર્ડ વિસ્તારમાં પીવાનાં પાણીની મુખ્ય લાઈનમાં ભંગાણ પડતાં છેલ્લા આશરે ૨૦ દિવસથી હજારો લિટર પાણી રસ્તા પર વહીને વેડફાઈ રહ્યું હોવાની ફરિયાદ ઊઠી છે. બ્લોક નંબર-૧૬૭ સામે સર્જાયેલી આ સમસ્યાને કારણે વસાહતના મુખ્ય માર્ગ પર પાણી ફરી વળ્યું છે. સ્થાનિક રહીશોના જણાવ્યા અનુસાર, મહાનગરપાલિકામાં ઓનલાઈન ફરિયાદો કરવા ઉપરાંત સત્તાધારી પક્ષના કાર્યકરોને પણ રજૂઆતો કરવામાં આવી હોવા છતાં લાઈનનું સમારકામ કરવામાં આવ્યું નથી.

સ્થાનિક રહેવાસી અને રાહદારીને અવરજવરમાં હાલાકીનો સામનો

પાણીનો સતત પ્રવાહ માર્ગ પર ફરી વળતાં સ્થાનિક રહેવાસી અને રાહદારીને અવરજવરમાં હાલાકીનો સામનો કરવો પડી રહ્યો છે. રસ્તા પર પાણી ભરાયેલું રહેવાને કારણે મચ્છરોનો ઉપદ્રવ વધવાની અને રોગચાળો ફેલાવાની ભીતિ પણ સ્થાનિકોમાં છે. લાંબા સમયથી સમસ્યા યથાવત્ હોવા છતાં તેનું નિરાકરણ ન આવતાં રહીશોએ તંત્રની કામગીરી સામે નારાજગી વ્યક્ત કરી છે.

પાણીની લાઈનમાં ભંગાણ

સ્થાનિકોના જણાવ્યા મુજબ, પાણીની લાઈનમાં ભંગાણની જાણ મહાનગરપાલિકાને ઓનલાઈન ફરિયાદ દ્વારા કરવામાં આવી છે. આ ઉપરાંત વસાહતમાં રહેતા સત્તાધારી પક્ષના કાર્યકરોને પણ મૌખિક રજૂઆતો કરીને સમસ્યાથી વાકેફ કરવામાં આવ્યા છે. તેમ છતાં સ્થળ પર સમારકામની કામગીરી હાથ ધરવામાં આવી ન હોવાથી પીવાના પાણીનો બગાડ અટક્યો નથી.

આ પણ વાંચો : પાર્સલની આડમાં ડ્રગ્સની હેરાફેરી રોકવા ગુજરાત પોલીસનો એક્શન પ્લાન, હવે પોર્ટર સહિતની ડિલિવરી એપ્સ પર વધશે દેખરેખ!

એક તરફ શુદ્ધ પીવાનું પાણી રસ્તા પર વહી રહ્યું છે, તો બીજી તરફ આસપાસનાં રહેણાક મકાનોમાં પૂરતા પ્રેશરથી પાણી મળતું ન હોવાની ફરિયાદો પણ સામે આવી છે. મુખ્ય લાઈનમાં ભંગાણને કારણે પાણીનાં વિતરણ પર અસર થતી હોવાની સ્થાનિકોની રજૂઆત છે. આથી પાણીનો બગાડ અટકાવવાની સાથે રહેવાસીઓને નિયમિત અને પૂરતા પ્રેશરથી પાણી મળે તે જરૂરી બન્યું છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ