ગુજરાત / પાર્સલની આડમાં ડ્રગ્સની હેરાફેરી રોકવા ગુજરાત પોલીસનો એક્શન પ્લાન, હવે પોર્ટર સહિતની ડિલિવરી એપ્સ પર વધશે દેખરેખ!

સામાન્ય પાર્સલની આડમાં ડ્રગ્સ અને અન્ય પ્રતિબંધિત ચીજવસ્તુઓની હેરાફેરીના કિસ્સા સામે આવતાં ગુજરાત પોલીસ હવે કુરિયર અને એપ આધારિત ડિલિવરી સેવાઓની મદદ લેશે. પોર્ટર સહિતની ડિલિવરી સેવાઓનો દુરુપયોગ અટકાવવા અને પાર્સલ મોકલનારની ઓળખની વધુ કડક ચકાસણી થાય તે માટે પોલીસ સંબંધિત કંપનીઓનો સંપર્ક કરશે.

સામાન્ય માલસામાન તરીકે દર્શાવીને ગેરકાયદે ચીજવસ્તુઓ મોકલવાના અનેક કિસ્સા સામે આવ્યા બાદ આ પગલું લેવામાં આવી રહ્યું છે. તાજેતરમાં નરોડા પોલીસે ત્રણ દિવસ પહેલાં એક ડિલિવરી બોયને રોકીને તેની પાસેથી ઈયરબડ્સના બોક્સમાં છુપાવેલું એમડી ડ્રગ્સ કબજે કર્યું હતું. આ ઉપરાંત આવી જ રીતે દારૂની હેરાફેરીનાં પાર્સલ પણ પકડવામાં આવ્યાં છે.

પોલીસને ચોક્કસ બાતમીના આધારે સફળતા

જોકે આ તમામ કિસ્સામાં પોલીસને ચોક્કસ બાતમીના આધારે સફળતા મળી હતી. અગાઉથી માહિતી ન હોય તો પાર્સલમાં છુપાવીને લઈ જવાતી પ્રતિબંધિત ચીજવસ્તુઓને પકડી પાડવી મુશ્કેલ બને છે. ઝોન-૪ના ડીસીપી અતુલકુમાર બંસલે જણાવ્યું છે કે અમે આ ખામીઓ શોધી રહ્યા છીએ, જેથી સંબંધિત એપ્લિકેશનના સંચાલકો સમક્ષ તેને રજૂ કરી શકાય.

ત્રાહિત વ્યક્તિના નામે બુકિંગ કરી ઓળખ છુપાવવાનો ખેલ

સેક્ટર-૨ના એડિશનલ પોલીસ કમિશનર જયપાલસિંહ રાઠોડે જણાવ્યું છે કે આરોપીઓ કથિત રીતે અન્ય લોકોના નામ અને મોબાઈલ નંબરનો ઉપયોગ કરીને પાર્સલ બુક કરાવે છે, જેથી તેમની સીધી ઓળખ છતી ન થાય. પાર્સલ બુક કરાવ્યા બાદ તેઓ ડિલિવરી કરનાર વ્યક્તિનો સંપર્ક નંબર મેળવે છે અને વારંવાર ફોન કરીને પાર્સલને અન્ય સ્થળે પહોંચાડવા માટે કહે છે, જોકે પાર્સલનો ડિલિવરી ઓટીપી મૂળ બુકિંગ સમયે નોંધાયેલા મોબાઈલ નંબર પર જ મોકલવામાં આવે છે. નરોડાના કિસ્સામાં એમડી ડ્રગ્સનું પાર્સલ ત્રીજી વ્યક્તિના નામે બુક કરવામાં આવ્યું હતું, જ્યારે ડ્રગ્સના કથિત વેપારીઓએ ડિલિવરી બોયનો સંપર્ક કરીને પાર્સલ અન્ય સ્થળે પહોંચાડવાનો પ્રયાસ કર્યો હતો. જે વ્યક્તિની વિગતોનો કથિત રીતે દુરુપયોગ થયો હતો તેણે પોતે કોઈ પાર્સલ મંગાવ્યું ન હોવા છતાં તેના નામે પાર્સલ આવ્યાના ફોન આવતાં શંકા ગઈ હતી. આથી તેણે પોલીસને જાણ કરી હતી, જેના પગલે પોલીસે પાર્સલ અટકાવીને તેને લેવા આવેલા શખ્સને પકડી પાડ્યો હતો. પોલીસના જણાવ્યા અનુસાર લોકો પોતાના નામે બુક થયેલા પાર્સલ અંગે આવતા શંકાસ્પદ ફોનને અવગણે તો આવી હેરાફેરીની યોજનાઓ સફળ થઈ શકે છે.

આ પણ વાંચો : અમદાવાદ પોલીસનો અનોખો એક્શન પ્લાન! દિવાળીમાં ચોરી રોકવા જેલમાં બંધ 12 ચોર-લૂંટારુઓની મદદ લેશે પોલીસ

પાર્સલ બુકિંગમાં વધુ સુરક્ષા માટે પોલીસનાં સૂચનો

તપાસ પૂર્ણ થયા બાદ પોલીસ પોર્ટર કંપનીનો સંપર્ક કરીને પાર્સલ મોકલનારની ઓળખની ચકાસણી વધુ કડક બનાવવા ભલામણ કરશે. પોલીસ અધિકારીના જણાવ્યા અનુસાર આ માટે બે ઉપાય સૂચવી શકાય છે - પ્રથમ એપ્લિકેશનમાં પાર્સલ મોકલનાર માટે એક બાંયધરી આપવી ફરજિયાત બનાવવી જોઈએ, જેમાં પાર્સલમાં કોઈ પ્રતિબંધિત પદાર્થ ન હોવાનું જાહેર કરવાનું રહે, બીજું જો પાર્સલ મોકલનાર આવી બાંયધરી આપવા ઈનકાર કરે તો ડિલિવરી કરનાર વ્યક્તિએ પાર્સલનો ફોટો પાડીને તે એપ્લિકેશન પર અપલોડ કરવો જોઈએ. આવાં પગલાંથી પાર્સલ બુકિંગની પ્રક્રિયા વધુ જવાબદારીપૂર્ણ બનશે અને ડ્રગ્સ તથા અન્ય પ્રતિબંધિત ચીજવસ્તુઓની હેરાફેરી માટે ડિલિવરી પ્લેટફોર્મનો દુરુપયોગ અટકાવવામાં મદદ મળશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ