નેશનલ / શિયાળામાં પણ છૂટશે પરસેવો! પ્રશાંત મહાસાગરમાં અલ નીનો સક્રિય થતાં ગરમ રહેશે આ વખતનો શિયાળો

પ્રશાંત મહાસાગરમાં થઈ રહેલી મોટી હલચલને કારણે આ વર્ષે શિયાળાની ઋતુમાં પણ લોકોને ગરમી અને બફારાનો અનુભવ થઈ શકે છે. આગામી ડિસેમ્બર મહિનામાં અલ નીનો પોતાના ઉચ્ચતમ સ્તરે પહોંચવાની પૂરેપૂરી શક્યતા છે, જેના પ્રભાવથી નવેમ્બરથી જાન્યુઆરી વચ્ચે ભારતમાં સામાન્ય કરતાં ઓછી ઠંડી પડવાનું અનુમાન વ્યક્ત કરવામાં આવ્યું છે. જોકે, ઉત્તર ભારતના વિસ્તારોમાં ઠંડીનું પ્રમાણ પશ્ચિમી વિક્ષોભ, પર્વતીય વિસ્તારોમાં થતી હિમવર્ષા અને ઉત્તર-પશ્ચિમ દિશામાંથી આવતા પવનો પર આધારિત રહેશે.

આ સમયગાળા દરમિયાન દિલ્હી સહિત પંજાબ, હરિયાણા, ઉત્તર પ્રદેશ, રાજસ્થાન અને બિહારમાં ક્યારેક ક્યારેક શીતલહેર ચાલુ થવાની શક્યતા છે. પશ્ચિમી પવનોના કારણે મેદાની વિસ્તારોમાં તાપમાનમાં થોડા સમય માટે ઘટાડો નોંધાઈ શકે છે. છતાં પણ વાતાવરણના નિષ્ણાતોનું માનવું છે કે આ વર્ષે લાંબા સમય સુધી આકરી ઠંડી પડવાની શક્યતા ખૂબ જ નહિવત છે.

વિશ્વ હવામાન સંસ્થાના તાજેતરના મૂલ્યાંકન અનુસાર પ્રશાંત મહાસાગરમાં તાપમાનમાં સતત વધારો થઈ રહ્યો છે. આ સ્થિતિને કારણે દક્ષિણ એશિયાના મોટા ભાગોમાં ડિસેમ્બરથી જાન્યુઆરી દરમિયાન મહત્તમ અને ન્યૂનતમ તાપમાન સામાન્ય અથવા તો સામાન્ય કરતાં વધુ ઊંચું રહી શકે છે. પરિણામે શિયાળાની શરૂઆત પણ થોડી ગરમ અનુભવાય તેવા એંધાણ છે. વિશ્વ સંસ્થાના જણાવ્યા મુજબ નવેમ્બરથી જાન્યુઆરી દરમિયાન પ્રશાંત મહાસાગરમાં અલ નીનોની સ્થિતિ વધુ મજબૂત બની શકે છે. અનેક આબોહવાકીય મોડેલો સંકેત આપી રહ્યા છે કે ડિસેમ્બરમાં આ પરિસ્થિતિ તેની ચરમસીમા પર પહોંચશે. સમુદ્રની સપાટીના તાપમાનમાં થતા ફેરફારોની સીધી અસર વૈશ્વિક હવામાન પર પડે છે. ભારતમાં પણ તેની અસર તાપમાન અને વરસાદની પેટર્ન પર સ્પષ્ટપણે જોવા મળી શકે છે.

હવામાન નિષ્ણાતનું માનવું છે કે પ્રશાંત મહાસાગરમાં અલ નીનો સતત મજબૂત બની રહ્યો છે, જેની અસર આવતા વર્ષના ફેબ્રુઆરી મહિના સુધી જળવાઈ રહેવાની શક્યતા છે. જોકે, તેની અસર દેશના તમામ રાજ્યોમાં એકસરખી જોવા મળશે નહીં. હિંદ મહાસાગરની સ્થિતિ, પશ્ચિમી વિક્ષોભ અને સ્થાનિક વાતાવરણીય પરિબળો પણ ઠંડીની તીવ્રતા નક્કી કરવામાં મહત્વનો ભાગ ભજવશે.

અલ નીનોના કારણે ભારતમાં શિયાળો નબળો પડવાની શક્યતાનો અર્થ એવો બિલકુલ નથી કે ઠંડા પવનો ફૂંકાશે જ નહીં. જ્યારે પશ્ચિમી વિક્ષોભ સક્રિય થશે ત્યારે ઉત્તર ભારતના પહાડી વિસ્તારોમાં હિમવર્ષા પણ થવાની શક્યતા છે. મેદાની વિસ્તારોમાં ટાઢા પવનો વાવા અને તાપમાન ગગડવાની સ્થિતિ પણ સર્જાશે, જેના કારણે કેટલાક દિવસો સુધી કડાકાની ઠંડીનો અનુભવ થઈ શકે છે. પરંતુ આ વખતે લાંબા ગાળા સુધી સતત આકરી શિયાળાની ઋતુ ટકી રહે તેવું અનુમાન નથી.

આ પણ વાંચોઃ National / કેન્દ્ર સરકારનો ખાંડના વેપારીઓને દિવાળી પહેલાં રાહતનો નિર્ણય, 31 ડિસેમ્બર સુધી મળશે છૂટ!

જોકે, આ અંગે ભારતીય હવામાન વિભાગનું સત્તાવાર પૂર્વાનુમાન આવવાનું હજુ બાકી છે, જે સામાન્ય રીતે નવેમ્બર મહિનામાં જાહેર કરવામાં આવે છે. પરંતુ અત્યાર સુધી પ્રાપ્ત થયેલા તમામ વૈશ્વિક સંકેતો દર્શાવે છે કે આ વખતે દેશમાં શિયાળો સામાન્ય કરતાં વધુ ગરમ રહી શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ