સરવે / દીપડાઓને ગોઠી ગયું ગુજરાત, આંકડા ગણતા થાકી જવાય તેટલો વધારો, વનપ્રેમીઓમાં હર્ષની લાગણી

• જૂનાગઢ જિલ્લામાં દીપડાની સંખ્યા 578 પહોંચી
• ગુજરાતમાં છેલ્લા 6 વર્ષમાં દીપડાની વસતી 63% વધી
• દાહોદ, પંચમહાલ, છોટાઉદેપુરમાં દીપડાની સંખ્યા 20% વધી

Gujarat Leopard population : ગુજરાતમાં દીપડાની વસતીમાં વધારો થયો છે. અત્રે જણાવીએ કે, વનવિભાગ દ્વારા થતી ગણતરીમાં દીપડાની વસ્તીના આંકડા સામે આવ્યા છે. જે પ્રમાણે ગુજરાતમાં છેલ્લા 6 વર્ષમાં દીપડાની વસતી 63% વધી છે. 2016માં રાજ્યમાં 1395 દીપડા હતા જ્યારે તાજેતરમાં હાથ ધરાયેલી ગણતરીમાં દીપડાની સંખ્યા 2274 પહોંચી છે. 

સરવેમાં શું સામે આવ્યું?
ગીચ વસતીમાં દીપડાની હાજરી વધી છે. જેમાં ભરૂચ, અમદાવાદ જેવા વિસ્તારમાં માનવ વસાહતમાં દીપડાની હાજરી છે તેમજ જૂનાગઢ, સુરત, ગીર-સોમનાથ,પંચમહાલ, દાહોદમાં દીપડામાં વધારો થયો છે.  ખાસવાત એ છે કે, દીપડો એક સમયે દક્ષિણ એશિયા અને આફ્રિકામાં જોવા મળતો હતો. જો કે, અત્યારે ગુજરાતમાં પણ બહોળી સંખ્યામાં જોવા મળે છે. ઘણાં સમયથી દીપડાનો આવાસ પ્રદેશ બદલાયો છે. હવે દીપડો ભારત, મલેશિયા, પાકિસ્તાન અને ચીનમાં પણ જોવા મળે છે

ક્યા જિલ્લામાં દીપડાની કેટલી વસતી?
જૂનાગઢમાં દીપડાની વસતી 2016માં 374 હતી અને હાલ જૂનાગઢ જિલ્લામાં દીપડાની સંખ્યા 578 છે જ્યારે ગીરમાં 2016માં દીપડાની સંખ્યા 111 હતી અને હાલ 257 થઈ છે. સૌરાષ્ટ્રમાં 2016માં 700 જેટલા દીપડા હતા જ્યારે વર્તમાનનો આંકડો 1395એ પહોંચ્યો છે. તો બીજી તરફ દાહોદ, પંચમહાલ, છોટાઉદેપુરમાં દીપડાની સંખ્યા 20 ટકા જેટલી વધી છે. દીપડાની સંખ્યામાં વધારો થતાં વનપ્રેમીઓમાં હર્ષની લાગણી જોવા મળી રહી છે.