ભુજ નજીક માધાપર હાઇવે પર ગઈકાલ સાંજે પશ્ચિમ કચ્છ પોલીસે પંજાબીથી ડ્રગ્સનો જથ્થો લઈને આવેલ પાંચ પંજાબીઓને ડ્રગ્સના જથ્થા સાથે ઝડપી લીધા હતા. પકડાયેલો 420 ગ્રામ માદક પદાર્થનો જથ્થો સ્થળ ચકાસણી બાદ હેરોઇનનો હોવાનુ ખુલ્યો હતો.
ભુજના માધાપર નજીક આવેલ નળ સર્કલ પાસે બુધવારની સાંજે પોલીસ ને બાતમી મળી હતી કે પંજાબના પ શખ્સો ડ્રગ્સના વેચાણ અર્થે આવી રહ્યા છે ત્યારે પશ્ચિમ કચ્છ પોલીસની સ્પેશિયલ ઓપરેશન ગ્રુપ તેમજ ક્રાઇમ બ્રાન્ચના જવાનો સિવિલ ડ્રેસમાં પેટ્રોલીંગ શરૂ કરી હતી. જે દરમિયાન સંદિગ્ધ કાર નીકળતા તેને અટકાવી હતી પરંતુ તે ઉભી ના રહેતા કાર અને તેના ટાયર ઉપર પાંચ રાઉન્ડ ફાયર કરીને કાર અટકાવી પાંચ પંજાબીને પકડી પાડયા હતા. સમગ્ર કાર્યવાહીમાં ર૫ થી વધુ પોલીસ કર્મચારીઓએ આ કામગીરી સફળ પાર પાડી હતી.
ઝડપાયેલા આરોપીઓ પાસેથી ૪૨૦ ગ્રામ હેરોઇન ડ્રગ્સનો જથ્થો જેની બજાર કિંમત અંદાજીત રૂ. 2.10 કરોડ આંકવામાં આવી છે. વ્યવસાયિક વેંચાણ અર્થે પંજાબથી કચ્છ આવેલા આરોપીઓની બ્રેઝા કારના ચાલક સામેના ડેસ્કબોર્ડમાં છુપાવેલા હેરોઇનના જથ્થાને પોલીસે સઘન પૂછપરછ બાદ શોધી કાઢ્યો હતો. દિલધડક રીતે પાર પડયેલા મિશનમાં એસઓજી અને એલસીબી સ્ટાફના કર્મીઓએ વિવિધ અંતરે સિવિલ ડ્રેસમાં ગોઠવાઈ જઇ મોટી સફળતાં મેળવી હતી. પકડાયેલ આરોપીઓમાંથી એક-બે આરોપીઓ ગુનાહિત ઈતિહાસ ધરાવે છે
આ વિશે પશ્ચિમ કચ્છ ઇન્ચાર્જ એસપી ડો. કરણરાજ વાઘેલાએ જણાવ્યું હતું કે, ગઈકાલે ભુજ નજીકના માધાપર ગામનાં નળ સર્કલ પાસે આંતર રાજ્યની કારમાં ડ્રગ સપ્લાય થવાની ચોક્કસ બાતમીના આધારે એસઑજી અને એલસીબીની ટીમ વોચમા ગોઠવાઈ હતી. પકડાયેલા તમામ આરોપીઓ પંજાબના ડ્રગની હેરાફેરી માટે કુખ્યાત તરન તારન વિસ્તારમાં રહેવાસી છે. આરોપી હરપ્રિતસિંઘ જાટે નાસતો-ફરતો આરોપી કુલદીપસિંઘ જી. તરનતારન, પંજાબ પાસેથી ઉપરોક્ત નાર્કોટિકસ હેરોઇનનો જથ્થો ખરીદેલ હતો. ઝડપાયેલા આરોપી પૈકી એક થી બે આરોપીઓ ગુનાહિત ઇતિહાસ ધરાવે છે.પશ્ચિમ કચ્છ પોલીસને મળેલી બાતમીના આધારે સમગ્ર ઓપરેશન પાર પાડ્યું છે.પંજાબ થી કચ્છ ડ્રગ્સ વેચાણ અર્થે આવેલા આરોપીઓનું કચ્છ કનેક્શન સહીત વિગતો જાણવા કાર્યવાહી શરૂ કરી દેવામાં આવી છે.
