ચેતજો / સુરતના કાપોદ્રામાં શિક્ષકે કર્યા વિદ્યાર્થિની સાથે શારીરિક અડપલા, લંપટ નિરવ વૈષ્ણવની ધરપકડ

• સુરતમાં શિક્ષકના વિદ્યાર્થિની સાથે શારીરિક અડપલા
• કાપોદ્રાની જગદગુરૂ વલ્લભાચાર્ય શાળાની ઘટના
• લંપટ શિક્ષક નિરવ વૈષ્ણવ સામે ફરિયાદ દાખલ

વરાછામાં અશ્વનિકુમાર રોડ વિસ્તારમાં આવેલી સ્કૂલમાં ધો. 7 માં અભ્યાસ કરતી 12 વર્ષિય વિદ્યાર્થિનીની વર્ગ શિક્ષકે જ છેડતી કરી હતી. શિક્ષકે શરીર પર હાથ ફેરવી અડપલાં કરતા વિદ્યાર્થિની ડરીને સ્કૂલ જવાની ના પાડતી હતી,સમગ્ર મામકે વિદ્યાર્થીની ના દાદી એ કાપોદ્રા પોલીસ સ્ટેશનમાં આરોપી શિક્ષક સામે ફરિયાદ નોંધાવતા પોલીસે આરોપી ની પોકસો સહિતના ગુન્હામાં ધરપકડ કરી છે.

દીકરીએ પરિવારને જાણ કરી પણ પરિવાર બહાનું સમજ્યો
અશ્વનિકુમાર રોડ વિસ્તારમાં શ્રમજીવી પરિવાર રહે છે. પરિવારમાં 12 વર્ષની દીકરી એ કે રોડ ઉપર આવેલી જગદગુરુ વલ્લભાચાર્ય સ્કૂલમાં ધોરણ 7 માં અભ્યાસ કરે છે. તેનો વર્ગ શિક્ષક નિરવ વૈષ્ણવ છે.એકાદ મહિના પહેલા વિદ્યાર્થીનીએ તેની દાદીને કહ્યું હતું કે તે ક્લાસમાં અભ્યાસ કરતી હોય ત્યારે નિરવ સર તેના શરીરે હાથ ફેરવી અડપલાં કરે છે તેથી સ્કુલે નથી જવું. તેની દાદીને એવું લાગ્યું કે છોકરીને સ્કૂલે નથી જવું એટલે બહાનું કાઢતી હશે.

ભોગ બનનાર દીકરીની દાદીએ નોંધાવી પોલીસ ફરિયાદ
વિદ્યાર્થીની એ વારંવાર આવી વાત કરીને સ્કૂલે જવાનું ના પાડતી હતી. બે દિવસ પહેલા તેની દાદી વતન રાજકોટ ગઈ હતી. તે દિવસે વિદ્યાર્થીની સ્કૂલે ગઈ ત્યારે શિક્ષક નિરવે ફરીથી અડપલાં કર્યા હતા. બીજી તરફ દાદી સુરત પરત ફર્યા ત્યારે વિદ્યાર્થીનીએ તેમની સાથે વાત કરી હતી. અને કહ્યું હતું કે ગઈ કાલે પણ સરે તેની સાથે અડપલાં કર્યા હતા. તેથી  દાદીએ કાપોદ્રા પોલીસ સ્ટેશનમાં નિરવ વિરુદ્ધ છેડતીની ફરિયાદ આપતા પોલીસે ગુનો દાખલ કરીને નિરવની અટકાયત કરી છે.

બાળકની વાતમાં બાંધછોડ ન કરો
દીકરીની પીડાની કહાની અનેક સવાલ ઊભા કરે છે. વારંવાર કહેવાય છતાંય પણ પરિવાર દીકરીની વાતને અલગ જ રૂપ સમજી રહ્યો હતો, પરિવારને એમ હતું કે શાળાએ ન જવા માટે દીકરી બહાના કરી રહી છે. જેનો સીધો લાભ લંપટ શિક્ષક નિરવ વૈષ્ણવ ઉપાડી રહ્યો હતો. અને દીકરીને પોતાના વિકૃત હવસનો શિકાર બનાવી રહ્યો હતો.પણ આખરે શિક્ષકની પાપલીલાનો ભાંડો ફૂટ્યો છે.હવે તે જેલના સળિયા ગણી રહ્યો છે.