IPL2020 / ટીમોએ 35 વિદેશી સહિત 127 ખેલાડીને રિટેન કર્યા, 71ને રિલીઝ કરી દીધા

કુલ ૧૨૭ ખેલાડીઓને ટીમોને પોતાની સાથે રિટેન કર્યા છે, જેમાં ૩૫ વિદેશી ખેલાડી પણ સામેલ છે. કિંગ્સ ઈલેવન પંજાબની ટીમ ૪૨.૭૦ કરોડ રૂપિયાની રકમ સાથે હરાજીના મેદાનમાં ઊતરશે, જે રકમ અન્ય ફ્રેંચાઇઝીઓ કરતાં સૌથી વધુ છે.

હરાજીમાં ૭૩ ખેલાડી ખરીદવા માટે બોલી લાગશે. ખેલાડીઓને રિટેન કરવા પાછળ આઠ ટીમ કુલ ૪૭૨.૩૫ કરોડ રૂપિયા ખર્ચ કરી ચૂકી છે અને હરાજીમાં તેઓ પાસે ૨૦૭.૬૫ કરોડ રૂપિયા બચ્યા છે.

BCCIના જણાવ્યા અનુસાર કિંગ્સ ઈલેવન પંજાબ પાસે હરાજી માટે સૌથી વધુ ૪૨.૭૦ કરોડની સેલેરી કેપ ઉપલબ્ધ છે, જ્યારે રોયલ ચેલેન્જર્સ બેંગલુરુ પાસે સૌથી વધુ ખેલાડીઓની ૧૨ જગ્યા ખાલી છે, જેમાં છ વિદેશી ખેલાડીઓનું સ્થાન પણ ખાલી છે. આજની સ્થિતિએ ચેન્નઈ સુપર કિંગ્સ સૌથી મોટી ટીમ (૨૦ ખેલાડી) છે.

આઠ ફ્રેંચાઇઝીમાંથી આરસીબીએ સૌથી વધુ ૧૨ ખેલાડીને રિલીઝ કર્યા છે, જ્યારે હૈદરાબાદની ટીમે સૌથી ઓછા પાંચ ખેલાડીને રિલીઝ કર્યા છે. રાજસ્થાન રોયલ્સે ૧૧ ખેલાડીઓને રિલીઝ કર્યા છે અને જાહેરાત કરી છે કે ઓસ્ટ્રેલિયાનો  સ્ટાર ખેલાડી સ્ટીવ સ્મિથ ટીમનું નેતૃત્વ સંભાળશે.