બિઝનેસ / રોકાણકારો રૂપિયા તૈયાર રાખજો! ટાટા કેપિટલનો આવશે 17000 કરોડ રૂપિયાનો IPO

ટાટા ગ્રુપની નાણાકીય સેવાઓ આપતી કંપની ટાટા કેપિટલ ટૂંક સમયમાં IPO લાવશે. સૂત્રોના જણાવ્યા મુજબ, નેશનલ કંપની લો ટ્રિબ્યુનલ (NCLT) તરફથી ટાટા મોટર્સ ફાઇનાન્સ વિલય મંજૂરી મળ્યા બાદ IPO માટે આરંભિક દસ્તાવેજો દાખલ કરી શકાય છે. હાલમાં, કંપની NCLTના અંતિમ આદેશની રાહ જોઈ રહી છે.

આ IPO લગભગ 2 અબજ ડૉલર એટલે કે 17,000 કરોડ રૂપિયા જેટલો હશે. સૂત્રોના જણાવ્યા પ્રમાણે, આ માપદંડ મુજબ કંપનીનું મૂલ્યાંકન અંદાજે 11 અબજ ડૉલર આસપાસ પહોંચી શકે. NCLT તરફથી અંતિમ આદેશ મળવાની સંભાવના ચાલુ નાણાકીય વર્ષના અંત સુધી છે.

NBFC તરીકે માન્યતા પ્રાપ્ત

આ બાબતે ટાટા કેપિટલને ઈમેલ મોકલવામાં આવ્યો હતો, પરંતુ કંપની તરફથી કોઈ જવાબ મળ્યો નથી. ભારતીય રિઝર્વ બેંક (RBI) દ્વારા ટાટા કેપિટલને ઊંચી સ્તરની NBFC તરીકે માન્યતા આપવામાં આવી છે. કંપનીને IPO માટે તેના બોર્ડ ઓફ ડિરેક્ટર્સ તરફથી પહેલેથી જ મંજૂરી મળી ચૂકી છે. કંપની IPO અંતર્ગત 2.3 કરોડ નવા શેર જાહેર કરશે.

અત્યારે કેટલાક હાલના શેરહોલ્ડર્સ દ્વારા ઓફર ફોર સેલ (OFS) પણ લાવવામાં આવશે. IPO સિવાય, ટાટા કેપિટલે જાહેર લિસ્ટિંગ પહેલાં પોતાની નાણાકીય સ્થિતિ મજબૂત કરવા માટે રાઇટ્સ ઈશ્યૂ દ્વારા ફંડ એકત્ર કરવાની યોજના પણ જાહેર કરી છે. જો આ IPO સફળ જશે, તો તે દેશના નાણાકીય ક્ષેત્રના સૌથી મોટા IPOમાંની એક ગણાશે.

નવેમ્બર 2023 પછી ટાટા ગ્રુપનો બીજો IPO

નવેમ્બર 2023માં ટાટા ટેક્નોલોજીઝની લિસ્ટિંગ પછી, ટાટા ગ્રુપ માટે આ બીજું IPO હશે. આ સ્ટેપ RBIની લિસ્ટિંગની આવશ્યકતાઓને પૂર્ણ કરવા માટે કરવામાં આવ્યો છે. રિઝર્વ બેંકના નિયમો મુજબ, ઊંચી સ્તરની NBFCને આ માન્યતા મળ્યાના ત્રણ વર્ષની અંદર શેરબજારમાં લિસ્ટિંગ કરવું ફરજિયાત છે. ટાટા કેપિટલને સપ્ટેમ્બર 2022માં ઊંચી સ્તરની NBFC તરીકે વર્ગીકૃત કરવામાં આવી હતી. ટાટા કેપિટલ ઉપરાંત, હાઉસિંગ ડેવલપમેન્ટ ફાઈનાન્સ કોર્પોરેશન (HDFC) બેંકની માલિકીની HDB ફાઈનાન્સિયલ સર્વિસિસ પણ IPO લાવવા માટે તૈયારી કરી રહી છે.

વધુ વાંચો: વિદેશી રોકાણકારોનો ભારતીય સ્ટોક માર્કેટથી મોહભંગ! માર્ચની શરૂઆતમાં જ ઉપાડ્યા 2000 કરોડ

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ