મોટી ખુશખબર / નોકરિયાતના ખિસ્સા છલકાઈ જશે ! 2023માં 10 ટકા પગાર વધારો, બેસ્ટ પર્ફોમન્સ કરનારને બખ્ખાં

• નોકરી કરનાર લોકો માટે સારા સમાચાર 
• એપ્રિલમાં કંપનીઓ આપી શકે 10 ટકા પગાર વધારો
• બેસ્ટ પર્ફોમન્સ કરનારને તો 10 ટકાથી પણ વધુ મળી શકે
• કોર્ન ફેરીના સર્વેમાં થયો ખુલાસો 

2023નું વર્ષ નોકરી કરનારા લોકો માટે સારી આશા લઈને શરુ થયું છે. આ વર્ષમાં કર્મચારીઓને નોકરીમાં પગાર વધારો મળવાની પૂરી શક્યતા છે અને કંપનીઓએ તેને માટે તૈયારીઓ પણ શરુ કરી દીધી છે. કોર્ન ફેરીના તાજેતરના સર્વે અનુસાર, 
આ વખતે ભારતમાં કંપનીઓ કર્મચારીઓના પગારમાં સરેરાશ 9.8 એટલે કે લગભગ 10 ટકાનો વધારો કરી શકે છે. જે 2022માં ગયા વર્ષ કરતા થોડો વધારે છે. 2022માં આ આંકડો 9.4 ટકા હતો.

બેસ્ટ વર્ક કરનારને તો 10 ટકાથી પણ વધારે પગાર 
કોર્ન ફેરીના તાજેતરના સર્વે અનુસાર, જે કર્મચારીઓ વધુ સારું પ્રદર્શન કરી રહ્યા છે તેમના માટે આ પગાર વધારો ઘણો વધારે હશે. આ સર્વેમાં 8,00,000થી વધુ કર્મચારીઓ ધરાવતી 818 સંસ્થાઓને આવરી લેવામાં આવી હતી. આ સર્વે અનુસાર ભારતમાં 2023માં પગારમાં 9.8 ટકાનો વધારો થવાનો અંદાજ છે. કોરોના મહામારીથી પ્રભાવિત 2020 માં પગાર વધારો, 6.8 ટકા કરતા ઘણો ઓછો હતો. 

વિશ્વમાં મંદી પણ ભારતના જીડીપીમાં 6 ટકા વધારાની ધારણા 
કોર્ન ફેરીના ચેરમેન અને રિજનલ મેનેજિંગ ડિરેક્ટર નવનીત સિંહે કહ્યું છે કે, વિશ્વભરમાં મંદી અને આર્થિક મંદીની વાતો ચાલી રહી છે, પરંતુ ભારતીય અર્થતંત્રની દ્રષ્ટિએ જોઈએ તો ગ્રોસ ડોમેસ્ટિક પ્રોડક્ટ (જીડીપી) 6 ટકાના દરે વધવાની ધારણા છે. સિંહે વધુમાં જણાવ્યું હતું કે પોતાનું બેસ્ટ પર્ફોમન્સ આપનાર કર્મચારીઓ માટેનો પગાર વધારો  15 ટકાથી 30 ટકા સુધીનો હોઈ શકે છે.

કયા સેક્ટરમાં કેટલા ટકા પગાર વધારાની આશા 
સર્વિસ સેક્ટરમાં 9.8 ટકા, ઓટો સેક્ટર માટે 9 ટકા, કન્ઝ્યુમર ગુડ્સ માટે 9.8 ટકા અને રિટેલ ક્ષેત્રમાં 9 ટકા પગાર વધારાની સંભાવના છે.