સુરત / PM મોદીના રાહુલ ગાંધી પર પ્રહાર, કહ્યું - "કેટલાક લોકો નિરાશાવાદી છે, ભારતને નીચુ દેખાડવા માંગે છે"

પ્રધાનમંત્રી નરેન્દ્ર મોદી ગુજરાતના પ્રવાસે છે. તેમણે સુરતમાં ₹18,800 કરોડથી વધુના અનેક વિકાસ પ્રોજેક્ટ્સનું ઉદ્ઘાટન, રાષ્ટ્રને સમર્પિત અને શિલાન્યાસ કર્યો છે, જેમાં રોડ, વીજળી અને ઔદ્યોગિક ક્ષેત્રોનો સમાવેશ થાય છે.

સુરતમાં એક જાહેર સભાને સંબોધતા પીએમ મોદીએ જણાવ્યું કે આજકાલ સુરતની સર્કુલર વોટર ઇકોનોમીની બહુ ચર્ચા થઇ રહી છે. હવે પ્રયાસ એ સુનિશ્ચિત કરવાનો છે કે આવનારા દાયકાઓ સુધી સુરતનો પાણી પુરવઠો સંપૂર્ણપણે પુરો કરવાનો છે. આ હેતુ માટે તાપી બેરેજ પ્રોજેક્ટને મંજૂરી આપવામાં આવી છે. પીએમ મોદીએ વધુમાં જણાવ્યું કે સુરતના વિકાસને વેગ આપવા માટે આજે અનેક પ્રોજેક્ટ્સનો શિલાન્યાસ અને ઉદ્ઘાટન કરવામાં આવ્યું. આજે ભારત પ્રકૃતિ સાથે પ્રગતિના મંત્ર સાથે વિકાસને આગળ ધપાવી રહ્યું છે. ઇકોનોમી પણ અને પર્યાવરણ પણ. પોતાના સંબોધન દરમિયાન પીએમ મોદીએ કોંગ્રેસ પાર્ટી પર પણ આકરા પ્રહારો કર્યા.

ભારત નકારાત્મકતાથી આગળ વધી ગયું છે - પીએમ મોદી

પીએમ મોદીએ કહ્યું, "આજે દેશના કેટલાક નિરાશાવાદી લોકો આત્મનિર્ભર ભારત અભિયાનની મજાક ઉડાવે છે. કેટલાક લોકો ભારતને નીચું બતાવવા માંગે છે. આ એ લોકો છે જેમણે ભારતને હંમેશા અન્ય દેશો પર નિર્ભર રાખ્યું છે. તેઓ ભૂલી જાય છે કે બીજાઓ પર નિર્ભર દેશ ક્યારેય વિકાસની તે ઊંચાઈ પ્રાપ્ત કરી શકતો નથી જે તે લાયક છે. ભારત નકારાત્મકતાથી આગળ વધી ગયું છે. તે આશાવાદથી ભરેલો અને અસાધારણ આકાંક્ષાઓથી પ્રેરિત રાષ્ટ્ર છે. ભારતના નાગરિકો સપના અને દૃઢ નિશ્ચયથી ભરેલા છે, અને લોકો તે દૃઢ નિશ્ચયને વાસ્તવિકતામાં ફેરવવા માટે પ્રતિબદ્ધ છે. જ્યારે કોઈ રાષ્ટ્રની સામૂહિક ઇચ્છાશક્તિ એટલી મજબૂત હોય છે, ત્યારે તે કોઈપણ લક્ષ્ય પ્રાપ્ત કરી શકે છે. તમે બે પગલાં ભરશો, હું ત્રણ પગલાં ભરવા તૈયાર છું. રોકાવું અને થાકવું મને મંજુર નથી. કોઈ પણ પક્ષને આટલા લાંબા સમય સુધી લોકોના આશીર્વાદ નથી મળ્યા. લોકોએ અમારી સેવાની ભાવનાને સમર્થન કર્યુ છે. આપણે વિકસિત ભારતના સંકલ્પને પૂર્ણ કરવો પડશે."

પીએમ મોદીએ તેલના ભાવ પર પણ વાત કરી

પ્રધાનમંત્રી નરેન્દ્ર મોદીએ કહ્યું, "આજે દુનિયા અભૂતપૂર્વ પડકારોનો સામનો કરી રહી છે. થોડા સમય પહેલા મેં કહ્યું હતું કે આ દાયકો દુનિયા માટે આપત્તિનો દાયકો સાબિત થઈ રહ્યો છે. આપણે એક પછી એક વૈશ્વિક આપત્તિ જોઈ છે. પહેલા COVID-19નું મોટુ સંકટ આવ્યુ, પછી દરેક જગ્યાએ યુદ્ધો શરુ થઇ ગયા અને હવે આ વિશાળ ઉર્જા કટોકટી. આનાથી આખી દુનિયા અવ્યવસ્થિત થઈ ગઈ છે. પેટ્રોલના ભાવ વિશ્વભરમાં વધઘટ થઈ રહ્યા છે, અને ગેસ સપ્લાય ચેઈન તૂટી રહી છે. મને સંતોષ છે કે 140 કરોડ ભારતીયોના સામૂહિક પ્રયાસોથી દેશ આવી દરેક કટોકટીનો મજબૂતાઈથી સામનો કરી રહ્યો છે."

આ પણ વાંચોઃ PM મોદીએ હજીરાની શસ્ત્ર ફેક્ટરીની મુલાકાત લીધી, સંરક્ષણ સાધાનોનું કર્યું નિરીક્ષણ

કોંગ્રેસ ભારતમાં અરાજકતા ફેલાવી રહી છે

વડાપ્રધાન નરેન્દ્ર મોદીએ કોંગ્રેસ પાર્ટી પર પ્રહાર કરતા કહ્યું કે, "છેલ્લા 12 વર્ષથી કોંગ્રેસ પાર્ટી ભારતમાં અરાજકતા અને અનિશ્ચિતતા ફેલાવીને તક શોધી રહી છે, પરંતુ દેશના લોકોએ તેને વારંવાર યોગ્ય જવાબ આપ્યો છે. ગુજરાતના લોકોએ કોંગ્રેસ પાર્ટીને હાંસિયામાં ધકેલી દીધી છે, પરંતુ જે રાજ્યોમાં કોંગ્રેસની સરકારો છે ત્યાં પણ જનતા પાર્ટીના કુશાસનથી કંટાળી ગઈ છે. તાજેતરમાં, હિમાચલ પ્રદેશમાં સ્થાનિક સ્વરાજ્યની ચૂંટણીઓ યોજાઈ હતી. ત્યાં કોંગ્રેસની સરકાર હોવા છતાં પાર્ટીને કારમી હારનો સામનો કરવો પડ્યો હતો. હિમાચલ પ્રદેશના લોકોએ કોંગ્રેસ પાર્ટીના કુશાસનને નકારી કાઢ્યું છે. અગાઉ કોંગ્રેસ હરિયાણામાં સ્થાનિક સ્વરાજ્યની ચૂંટણીઓ હારી ગઈ હતી, અને પંજાબના લોકોએ પણ પાર્ટીને સ્પષ્ટ સંદેશ આપ્યો છે કે અરાજકતા વચ્ચે તક શોધવાની તેની રાજનીતિ કામ કરશે નહીં. કર્ણાટકના લોકોમાં કોંગ્રેસ સરકાર પ્રત્યે વ્યાપક અસંતોષ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ