રાજકારણ / એવાં જવાબદાર કારણો, જેના લીધે ગુજરાતના મંત્રીમંડળમાં કરાયો મોટો ઉલટફેર, 6 રિપીટ

Gujarat Politics: ગુજરાતના મુખ્યમંત્રી તરીકે સેવા આપતા હતા તે સમયે નરેન્દ્ર મોદીએ અનેક વખત ચૂંટણીમાં ચહેરો બદલવાની નીતિ અજમાવી હતી. એ જ નીતિ અંતર્ગત કોવિડ પછી ભાજપે વિજય રૂપાણીની આગેવાની હેઠળની આખી સરકાર બદલી નાંખી હતી. તેના માત્ર એક વર્ષ પછી યોજાયેલી વિધાનસભા ચૂંટણીમાં ભાજપે 182માંથી 156 બેઠકો જીતીને ઇતિહાસ રચ્યો હતો. તે વખતે “નરેન્દ્ર-ભૂપેન્દ્ર” સૂત્રના આધારે પાર્ટીએ જબરદસ્ત જીત મેળવી હતી. હવે 2027ની ચૂંટણીના બે વર્ષ પહેલા ફરી મોટી સર્જરી થવાના કારણે અનેક રાજકીય પ્રશ્નો ઉભા થયા છે.

ચૂંટણીના બે વર્ષ પહેલા કેમ મંત્રીમંડળમાં બદલાવ?

વિશ્લેષકોના મતે આ ઓપરેશનના અનેક કારણો છે. કેટલાક મંત્રીઓ વધુ વયસ્ક હોવાથી તેમની કાર્યક્ષમતા પર અસર પડી હતી, જ્યારે કેટલાક મંત્રીઓ પર ભ્રષ્ટાચારના આરોપો પણ હતા. ખાસ કરીને બચુભાઈ ખાબડ, ભીખુસિંહ પરમાર અને મુકેશ પટેલ વિવાદમાં હતા. જો ભાજપે તેમને અલગ-અલગ રીતે હટાવ્યા હોત તો વિપક્ષે રાજકીય માછલા ધોઈ શક્યા હોત. તેથી પાર્ટીએ એક જ ઝટકામાં તમામ મંત્રીઓના રાજીનામા સ્વીકારીને આખું દૃશ્ય સંતુલિત રાખ્યું છે.

આ રાજકીય ફેરફારનું એક મોટું કારણ રાજ્યની આવનારી મ્યુનિસિપલ કોર્પોરેશનની ચૂંટણીઓ પણ છે. અમદાવાદ, વડોદરા, સુરત, રાજકોટ, જૂનાગઢ અને ગાંધીનગર સહિતના શહેરોમાં ચૂંટણી યોજાવાની છે, જેને “મીની વિધાનસભા ચૂંટણી” પણ કહેવામાં આવે છે. શહેરોમાં ભાજપનું વર્ચસ્વ જાળવી રાખવા માટે પાર્ટી આ સર્જરીને વ્યૂહાત્મક પગલું ગણાવી રહી છે.

આ જૂના જોગીને ફરી મોકો!

1. પ્રફુલ પાનશેરીયા
2. કુંવરજી બાવળિયા
3. કનુ દેસાઈ
4. ઋષિકેશ પટેલ
5. પરષોત્તમ સોલંકી
6. હર્ષ સંઘવી

વધુ વાંચો: LIVE: રીવાબા જાડેજા, જીતુ વાઘાણી અને કાંતિ અમૃતિયાને આવ્યો મંત્રી બનવા ફોન, અહીં જુઓ લિસ્ટ

આ આખી પ્રક્રિયાને નવી દિલ્હી ખાતે રવિવારે યોજાયેલી બેઠકમાં અંતિમ સ્વરૂપ આપવામાં આવ્યું હતું, જેમાં પીએમ મોદી અને ગુજરાતના વરિષ્ઠ નેતાઓ હાજર હતા. હવે ભાજપે ભૂપેન્દ્ર પટેલને બદલે જગદીશ વિશ્વકર્માને મુખ્યમંત્રી તરીકે પસંદ કર્યા છે. વિશ્વકર્મા અગાઉ સહકાર મંત્રી તરીકે કાર્યરત હતા અને તેમને ગુજરાતના નવા રાજકીય ચહેરા તરીકે પ્રોજેક્ટ કરવામાં આવી રહ્યા છે. આ સાથે ગુજરાતની રાજનીતિમાં નવા અધ્યાયની શરૂઆત થઈ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ