ગુજરાત / આણંદ જિલ્લા પંચાયતનું નવું સીમાંકન જાહેર, બદલાઈ જશે રાજકીય સમીકરણો

Anand News: આણંદ જિલ્લા પંચાયતનું નવુ સીમાંકન અને બેઠકોની ફાળવણી અંગે રાજ્ય ચૂંટણી પંચ દ્વારા જાહેરાત થઈ ચુકી છે. નવા સીમાંકન બાદ હવે આણંદ જિલ્લા પંચાયતની બેઠકો 42 થી ઘટાડીને 40 કરી દેવામાં આવી છે. રાજ્ય ચૂંટણી પંચ દ્વારા અનામત બેઠકો સહિતનું પ્રાથમિક સીમાંકન બહાર પાડવામાં આવ્યું છે. નવા સીમાંકન બાદ અનેક બેઠકોના પ્રકાર બદલાતા રાજકીય સમીકરણોમાં પણ ફેરફાર થવાની શક્યતા છે. 2011ની વસ્તી ગણતરીના આધારે સીમાંકન તૈયાર કરવામાં આવ્યું છે.

આણંદ મહાનગરપાલિકાની રચના અને તારાપુર ગ્રામપંચાયતને નગરપાલિકા તરીકે દરજ્જો મળ્યો, એ પછી હવે આણંદ જિલ્લાની સ્થાનિક સ્વરાજ્ય સંસ્થાઓનું રાજકીય સમીકરણ પણ બદલાઈ જશે. આણંદ મહાનગરપાલિકા વિસ્તારમાં ગામડી અને નવાખલ જિલ્લા પંચાયત બેઠકો રદ્દ કરવામાં આવતા હવે આણંદ જિલ્લા પંચાયતની કુલ બેઠકો 42 માંથી ઘટીને 40 રહી ગઈ છે. નવા સીમાંકનમાં આણંદ તાલુકાની બેઠકો 9માંથી ઘટીને 8 થઈ ગઈ છે, જ્યારે આંકલાવ તાલુકાની બેઠકો 4માંથી ઘટીને 3 થઈ ગઈ છે. ત્યારે ગામડી અને નવાખલ બેઠકો રદ્દ થવાથી સીમાંકનમાં સંપૂર્ણ નવી રાજકીય તાસીર જોવા મળશે. આ સિવાય મોગરીના સ્થાને નવી વલાસણ બેઠક અમલમાં આવી છે. ઉપરાંત તારાપુર બેઠક રદ્દ કરી દેવામાં આવી છે અને નવી મોરજ જિલ્લા પંચાયત બેઠક રચાઈ છે.

માહિતી પ્રમાણે, બેઠકોમાંથી 50 ટકા બેઠકો મહિલા માટે અનામત હોવાથી, 40 માંથી 20 બેઠકો પુરુષો માટે અને 20 બેઠકો મહિલાઓ માટે અનામત છે. પહેલીવાર 27 ટકા ઓબીસી અનામત અમલમાં મૂકાઈ છે. ત્યારે કુલ 40માંથી 11 બેઠકો ઓબીસી માટે અનામત રહેશે. ત્યારે અનામત અને રોટેશન જાહેર થતાં રાજકીય ચહલપહલ તેજ થઈ ગઈ છે. ગ્રામ્ય બેઠકોના નવા સીમાંકનનો રાજકીય પક્ષો દ્વારા અભ્યાસ શરૂ કરી દેવામાં આવ્યો.

આ પણ વાંચો: તાંત્રિક વિધિના નામે 2 ભાઈઓએ યુગલ પાસેથી પડાવ્યા રૂ. 7.50 લાખ

નવા સીમાંકનની અસર

હવે નવા સીમાંકન બાદ રાજકીય પક્ષોએ તેમના ઉમેદવારો માટે નવા સોગઠાં ગોઠવવા પડશે. જેના કારણે રાજકીય સમીકરણો પણ બદલાઈ જશે. ઉપરાંત ઓબીસી અનામતને કારણે રાજકીય પક્ષોએ આ કેટેગરીના સક્ષમ ઉમેદવારો પણ શોધવા પડશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ