ગુજરાત / દેશની પાંચ પ્રસ્તાવિત યુનિવર્સિટી ટાઉનશિપમાંથી એક માટે ગુજરાતની દાવેદારી

યુનિવર્સિટી ગ્રાન્ટ્સ કમિશન (યુજીસી) દેશભરમાં પાંચ ઇન્ટિગ્રેટેડ યુનિવર્સિટી ટાઉનશિપ સ્થાપવાની પ્રક્રિયા શરૂ કરી રહ્યું છે ત્યારે ગુજરાતે તેમાંથી એક ટાઉનશિપ રાજ્યમાં સ્થાપવા માટે કેન્દ્ર સરકાર સમક્ષ દાવો રજૂ કર્યો છે. રાજ્ય સરકારે પોતાની મજબૂત ઔદ્યોગિક ક્ષમતા, વિકસતું રિસર્ચ ઇકોસિસ્ટમ અને ઉચ્ચ શિક્ષણ સંસ્થાઓના વિશાળ નેટવર્કને મુખ્ય તાકાત તરીકે રજૂ કર્યા છે.

કેન્દ્રીય બજેટ ૨૦૨૬-૨૭માં મોટા ઔદ્યોગિક અને લોજિસ્ટિક્સ કોરિડોર નજીક ચેલેન્જ આધારિત પ્રક્રિયા મારફતે પાંચ યુનિવર્સિટી ટાઉનશિપ સ્થાપવા રાજ્યોને સહયોગ આપવાની જાહેરાત કરવામાં આવી હતી. આ ટાઉનશિપમાં યુનિવર્સિટીઓ, કોલેજો, સંશોધન સંસ્થાઓ, સ્કિલ સેન્ટરો અને રહેણાંક સંકુલને એક જ સંકલિત ઇકોસિસ્ટમમાં જોડવાની કલ્પના છે.

મોડલ ઉદ્યોગ અને શિક્ષણ જગતને નજીક લાવી શકે

ગુજરાતના અધિકારીઓના મતે આ મોડલ ઉદ્યોગ અને શિક્ષણ જગતને નજીક લાવી શકે છે. ગુજરાતમાં ફાર્માસ્યુટિકલ્સ, કેમિકલ્સ-પેટ્રોકેમિકલ્સ, એન્જિનિયરિંગ, ઓટોમોબાઇલ, ઓટો કમ્પોનન્ટ્સ, ટેક્સટાઇલ્સ, જેમ્સ-જ્વેલરી, મેન્યુફેક્ચરિંગ, રિન્યુએબલ એનર્જી તથા સેમિકન્ડક્ટર જેવા ઉભરતા ક્ષેત્રોનું મોટું ઔદ્યોગિક નેટવર્ક છે. આ ઔદ્યોગિક ક્લસ્ટરોની નજીક મોટું શૈક્ષણિક અને સંશોધન કેન્દ્ર ઊભું થાય તો અભ્યાસક્રમ, તાલીમ અને સંશોધનને ઉદ્યોગની જરૂરિયાતો સાથે વધુ નજીકથી સાંકળી શકાય. વિદ્યાર્થીઓ અને સંશોધકોને ઇન્ટર્નશિપ, એપ્રેન્ટિસશિપ, ઉદ્યોગ પ્રોજેક્ટ, વિશિષ્ટ કૌશલ્ય તાલીમ અને રોજગારીની તકો એક જ ઇકોસિસ્ટમમાં મળી શકે.

વિદ્યાર્થીઓને નવી ટેક્નોલોજી અને તેના પ્રાયોગિક ઉપયોગની સમજ

કંપનીઓ સાથેના નજીકના સંપર્કથી વિદ્યાર્થીઓને નવી ટેક્નોલોજી અને તેના પ્રાયોગિક ઉપયોગની સમજ પણ મળશે. બીજી તરફ ઉદ્યોગોને પ્રોડક્ટ ડેવલપમેન્ટ, ટેક્નોલોજી ટ્રાન્સફર અને ઉદ્યોગ આધારિત સંશોધન માટે તૈયાર ટેલેન્ટ પૂલ તથા યુનિવર્સિટીઓ-રિસર્ચ સંસ્થાઓનો લાભ મળશે.

‘ટેલેન્ટ અને ઈનોવેશન કોરિડોર’ બનવાની શક્યતા

શૈક્ષણિક ક્ષેત્રના નિષ્ણાતોના મતે આ મોડલ ગુજરાતના ઔદ્યોગિક કોરિડોરને ટેલેન્ટ અને ઇનોવેશન કોરિડોરમાં પરિવર્તિત કરી શકે છે, જેમાં શિક્ષણ, કૌશલ્ય, સંશોધન અને રોજગારી એકબીજા સાથે જોડાશે. એક વરિષ્ઠ અધિકારીના જણાવ્યા મુજબ હેતુ માત્ર અનેક શૈક્ષણિક સંસ્થાઓને એકબીજાની નજીક લાવવાનો નથી, પરંતુ યુનિવર્સિટી, સંશોધન સંસ્થા, સ્કિલ સેન્ટર અને ઉદ્યોગ સાથે મળીને કામ કરી શકે તેવું સંપૂર્ણ ઇકોસિસ્ટમ ઊભું કરવાનો છે.

આ પણ વાંચો : ગુજરાતમાં એક વર્ષમાં 17 આરોપી પર પોલીસ ફાયરિંગ, 6 આરોપીઓ દુષ્કર્મના, 2ના મોત થયા હતા

અમદાવાદથી સાણંદ સુધીનું ઔદ્યોગિક નેટવર્ક ફાયદાકારક

ગુજરાતનું પહેલેથી જ વિકસેલું ઔદ્યોગિક અને લોજિસ્ટિક્સ નેટવર્ક તેની દાવેદારીને વધુ મજબૂત બનાવી શકે છે. અમદાવાદ, વડોદરા, સુરત, ભરૂચ, રાજકોટ અને સાણંદ જેવા મોટા ઔદ્યોગિક ક્લસ્ટરો ઉપરાંત દિલ્હી-મુંબઈ ઇન્ડસ્ટ્રિયલ કોરિડોર સાથેની કનેક્ટિવિટી પણ પ્રસ્તાવિત ટાઉનશિપને રાજ્યના હાલના ઔદ્યોગિક ઇકોસિસ્ટમ સાથે સીધી રીતે જોડવામાં મદદરૂપ બની શકે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ