આગાહી / ગુજરાતમાં મેઘરાજાની ધમાકેદાર ઈનિંગ, અનેક જિલ્લામાં ભારે નુકશાન, સૌથી વધુ ખુવારી ઉત્તરમાં

Gujarat Rain: ગુજરાતમાં છેલ્લા કેટલાક દિવસથી વરસાદે વિરામ લીધો હતો. છુટોછવાયા વરસાદ સિવાય ક્યાય વરસાદ જોવા મળ્યો ન હતો. આ કારણે તાપમાનનો પારો ઉંચકાયો હતો, જેના કારણે ગરમીનું પ્રમાણ પણ વધ્યું હતું. ભારે ઉકળાટ અને બફારાથી લોકો ત્રાહિમામ પોકારી ઉઠ્યા હતા. ત્યારે ગઈકાલ (26 જુલાઈ) રાતથી જ મેઘરાજાએ દેખા દીધી છે.

વરસાદી પાણી ઘરમા ઘૂસી ગયા

રાજ્યમાં લાંબા વિરામ બાદ મેઘસવારી જોવા મળી હતી. હવામાન વિભાગે ભારે વરસાદને લઈને આગાહી કરી હતી. ત્યારે અરવલ્લી, બનાસકાંઠા સહિત ઉત્તર ગુજરાતને વરસાદે ધમરોળ્યું છે. મુશળધાર વરસાદથી ખેતરોમાં પાણી ભરાયા હતા, તો કેટલીક સોસાયટીમાં વરસાદી પાણી ઘરમા ઘૂસી ગયા હતા. ઘરવખરીને પણ નુકસાન પહોંચ્યું હતું. આ સિવાય રસ્તાઓ પર પાણી વળતા નદીઓ બની ગયા હતા.

બાવળામાં જ્યાં જુઓ ત્યાં પાણી

બાવળામાં સતત વરસાદથી શહેર બેટમાં ફેરવાયું હતું. સવારથી જ ધોધમાર વરસાદ વરસતા લોકજીવન ખોરવાયું ગયું હતું. મુખ્ય માર્ગથી લઈને અન્ય રસ્તાઓમાં ભરાયું વરસાદી પાણી ધોધમાર વરસાદથી ઠેર-ઠેર પાણી ભરાયા હતા.

આજે (27 જુલાઈ) વહેલી સવારથી જ રાજ્યના અનેક જિલ્લામાં વરસાદી માહોલ જોવા મળ્યો હતો. અમદાવાદ પણ મેઘરાજાએ તોફાની બેટિંગ કરી હતી, જેના પગલે અનેક વિસ્તાર જળમગ્ન બન્યા હતા. લાંબા અંતરાલ બાદ વરસાદ પડતા વાતવરણમાં ઠંડક પ્રસરી ગઈ હતી. જો કે રસ્તા પર ગોઠણસમા પાણી ભરાઈ જતા વાહનચાલકોને હાલાકી ભોગવવી પડી હતી. અરવલ્લી જિલ્લામાં ધોધમાર વરસાદથી ખેતરો ભરાયા છે. કોલીખડ આસપાસના ખેતરોમાં ઢીંચણ સમા પાણી ભરાયા છે. ખેતરો જાણે સરોવર હોય એવા દ્રશ્યો સર્જાયા છે. ખેડૂતનું મકાન પશુ સહિત પાણીમાં ગરકાવ થઈ જવા પામ્યા હતા. પશુપાલક દૂધ આપવા પણ જઈ શક્યા નથી.

બાજરી- મગફળીનો પાક પાણીમાં ગરકાવ

બનાસકાંઠા જિલ્લાના વડગામમાં ભારે વરસાદને પગલે જનજીવન અસ્તવ્યસ્ત બન્યું હતું. વડગામ પંથકમાં 9 ઈંચ વરસાદથી ખેતરો જળબંબાકાર બન્યા હતા. પાકનું વાવેતર કરેલ ખેતરોમાં પાંચ ફૂટ જેટલા પાણી ભરાયા હતા. પાણી ભરાતા બાજરી- મગફળીનો પાક પાણીમાં ગરકાવ થઈ જવા પામ્યો હતો. ફુવારા પણ પાણીમાં ડૂબ્યા હતા. ફુવારા નળીઓ તરતી જોવા મળી હતી. ચોમાસાની સીઝનમાં ખેડૂતોને ખેતરમાં પાણી ભરાતા નુકસાન થવા પામ્યું હતું.

આ પણ વાંચોઃ મગફળી-બાજરીનો પાક પાણીમાં ગરકાવ, બનાસકાંઠાના વડગામમાં જળબંબાકાર

અરવલ્લીનો સુનસર ધોધ જીવંત

અરવલ્લીના ભિલોડાનો સુનસર ધોધ થયો જીવંત થયો છે. ભિલોડામાં ભારે વરસાદ બાદ નદી નાળા છલકાઈ ઉઠ્યાં છે. ધરતી માતા મંદિર પાસે કુદરતી ધોધ ડુંગર પરથી વહે છે. સુનસર ધોધ પાસે ઉત્તર ગુજરાતના મીની કાશ્મીર જેવા દ્રશ્યો સર્જાયા છે. ધોધની મજા માણવા દૂર-દૂરથી અનેક સહેલાણીઓ ઉમટી પડ્યાં છે. આ ધોધ સહેલાણીઓ માટે આકર્ષણનું કેન્દ્ર બની ગયો છે. ભિલોડા તાલુકાના સુણસર ગામે અરવલ્લીની ગિરિમાળામાંથી 500 ફૂટથી વધુ ઊંચાઈએથી પાણી નીચે પડીને ધોધના આહલાદક દ્રશ્યો રચે છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ