લૉકડાઉન / રાજ્યના સરકારી કર્મચારીઓ અને પેન્શનરોને આ મહિનાનો પગાર આપવા અંગે લેવાયો મહત્વનો નિર્ણય

• હાલ ધંધા-રોજગાર બંધ હોવાથી રાજ્યની આવકમાં ઘટાડો
• સરકારી કર્મચારીઓને સંપૂર્ણ પગાર ચૂકવાશે
• પેન્શનરોને પણ સંપૂર્ણ પેન્શન ચૂકવાશે

નાયબ મુખ્યમંત્રીએ જણાવ્યું કે, સમગ્ર દેશ અને રાજ્ય કોરોના વાયરસની મહામારી સામે લડત આપી રહ્યું છે. સમગ્ર દેશમાં 1 મહિનાથી વધુ સમયથી લોકડાઉન અમલમાં છે. ધંધા-વેપાર, ઉદ્યોગો, કૃષિ ક્ષેત્ર, પેટ્રોલપંપ, ટુરિઝમ, કોઇ પણ પ્રકારનું ટ્રાન્સ્પોટેશન, હોટલો, થિયેટરો સહિત દુકાનો બંધ હોવાથી રાજ્ય સરકારને વેરાકિય આવક મળે છે તેવામાં ખુબ મોટો ઘટાડો નોંધાયો છે. GSTની આવક પણ ઓછી થઇ ચૂકી છે, પેટ્રોલના વેટની આવક પણ ઓછી થઇ છે. તેવામાં રાજ્યની પરિસ્થિતિ ખુબ આયોજન બદ્ધરીતે સંભાળી રહ્યા છીએ. રાજ્યની આવકમાં ખુબ મોટો ઘટાડો હોવા છતા અમારી નાણા વિભાગની કાર્યક્ષમતાના કારણે મુખ્યમંત્રી અને અમે નિર્ણય કર્યો છે કે, સરકારી કર્મચારીઓ અને પેન્શનરોને પગાર ચૂકવવામાં આવશે.

નીતિન પટેલે કહ્યું કે, એપ્રિલ મહિનો પૂર્ણ થવા તરફ છે ત્યારે આ મહિનાનો 5 લાખ 28 હજાર સરકારી કર્મચારીઓ માસિક પગાર 2 હજાર 600 કરોડ થાય છે. તે સંપૂર્ણ રીતે મે મહિનાના પહેલા અઠવાડિયામાં ચૂકવવાનો નિર્ણય કર્યો છે. રાજ્યના 4 લાખ 57 પેન્શનરોને પણ જે પેન્શન ચૂકવવામાં આવે છે તે પણ દર મહિને 1 હજાર 400 કરોડનું થાય છે તે પણ ચૂકવવામાં આવશે. રાજ્યના સરકારી કર્મચારીઓ અને પેન્શનરોનો બન્નેનો થઇ રૂપિયા 4000 હજાર કરોડની જંગી રકમનો ખર્ચ આવે છે તે ચૂકવવાનો નિર્ણય કર્યો છે. આજે નાણા વિભાગના સચિવો સાથે ચર્ચા વિચારણા કર્યા બાદ આ નિર્ણય લેવાયો છે.

કોરોના સામેની લડાઇમાં સરકારના દરેક વિભાગના અધિકારીઓ ખડેપગે છે અને આ બધા જ કર્મચારીઓ ગુજરાતની જનાતની સેવા કરી રહ્યા છે. આરોગ્ય, પોલીસ , મહેસૂલ, અન્ન નાગરિક વિભાગ કે કોઇપણ સરકારી અધિકારીઓ પોતાની જાતને જોખમમાં મુકીને કામગીરી કરી રહ્યા છે. હું તમામ કર્મચારીઓને અભિનંદન આપું છું, બિરદાવુ છું.