આનંદો! / ખેડૂતો માટે ગુડ ન્યુઝ: વીજ કનેક્શન આપવા મુદ્દે ગુજરાત સરકારે લીધો મોટો નિર્ણય

• ખેત તલાવડીમાંથી પાણી ખેંચવા અપાશે વીજ જોડાણ 
• ખેડૂતોને 5 HPનું વીજ જોડાણ આપવાનો સરકારનો નિર્ણય
• સુક્ષ્મ પદ્ધતિથી ખેતી કરવા માટે અપાશે વીજ કનેક્શન

ગુજરાતના ખેડૂતો માટે મહત્વના સમાચાર સામે આવ્યા છે. ખેત તલાવડીમાંથી પાણી ખેંચવા ખેડૂતોને 5 HPનું વીજ જોડાણ આપવાનો સરકારે નિર્ણય કર્યો છે. ગુજરાત સરકારમાં ઉર્જા મંત્રી કનુભાઈ દેસાઈએ આ અંગેની જાહેરાત કરી છે. 

ટાંકા કે હોજમાંથી પાણી ખેંચવા અપાશે વીજ જોડાણ
ઉર્જા મંત્રી કનુભાઈ દેસાઈએ જણાવ્યું કે, પાણીના ટાંકા કે હોજમાંથી પાણી ખેંચવા ખેડૂતોને વીજ જોડાણ આપવામાં આવશે. બોર કે કુવા સિવાયના સ્ત્રોતમાંથી પાણી ખેંચવા માટે વીજ જોડાણ આપવામાં આવશે. સુક્ષ્મ પદ્ધતિથી ખેતી કરવા માટે વીજ કનેક્શન અપાશે.

ખેડૂતોની રજૂઆત મંજૂર કરાઈઃ કનુભાઈ દેસાઈ
તેઓએ જણાવ્યું કે, ખેડૂતોની રજૂઆત હતી જે મંજૂર કરવામાં આવી છે. ચોમાસામાં ખેત તલાવડી અને અન્ય પાણીના સ્ત્રોત માટે ખેડૂતને કનેક્શન અપાશે. વરસાદી પાણીનો સંગ્રહ કરતા ખેડૂતોને વધારાનું કનેક્શન અપાશે.

વરસાદ અને પવનના કારણે 12,770 પોલ ધરાશાયી
આ ઉપરાંત તેઓએ તાજેતરમાં ખાબકેલા વરસાદને લઈને વીજપોલમાં થયેલા નુકસાન અંગે માહિતી આપતા જણાવ્યું કે, મે મહિનાના અંતમાં અને જૂન મહિનાની શરૂઆતમાં આપણા ગુજરાતમાં ભારે પવન સાથે ખાબકેલા વરસાદને કારણે 12,770 વીજપોલ ધરાશાયી થયા હતા. જ્યારે લગભગ 1233.5 HT લાઈન અને 1279.8 LT લાઈનને નુકસાન થયું છે.  371 જેટલા ટ્રાન્સફોર્મરને નુકસાન થયું છે. આ બધુ નુકસાન 48થી 72 કલાકમાં રિસ્ટોર કરવામાં આવ્યું છે. ગુજરાતના તમામ ગામોમાં પાવર રિસ્ટોર કરવામાં સફળ થયા છીએ.

વાવાઝોડાના ખતરાને જોતા બનાવાઈ ઈમરજન્સી ટીમ
સંભવિત વાવાઝોડાને લઈને તેઓએ જણાવ્યું કે, ઈમરજન્સી ટીમ બની ગઈ છે. મટીરિયલની પણ પ્લાનિંગ અગાઉથી કરેલી છે. જ્યાં જરૂર પડે ત્યાં બીજા ડીસ્ફોર્મરથી માણસો લઈને આપણે ચોક્કસ કામગીરી કરીશું.