BIG NEWS / ખેડૂતો માટે ગુજરાત સરકારનું 546 કરોડનું પેકેજ જાહેર, રોડ-રસ્તા માટે CM પટેલે આપ્યા મોટા આદેશ

• ગુજરાત સરકારની કેબિનેટ બેઠકમાં મોટા નિર્ણયો 
• ખેડૂતો માટે કરોડોનું રાહત પેકેજ જાહેર 
• રોડ રસ્તાને લઈને પણ ભૂપેન્દ્ર પટેલે આપ્યા મોટા આદેશ 

ખેડૂતો માટે સહાયની જાહેરાત 
ગુજરાત સરકારની કેબિનેટ બેઠકમાં આજે મોટા નિર્ણયો કરવામાં આવ્યા છે જેમા ખેડૂતોની સહાય અને રોડ રસ્તાને લઈને આપવામાં આવેલ આદેશ સૌથી મોટા છે. ગુજરાતનાં ખેડૂતો માટે આજે રાજ્ય સરકાર મોટી સહાયની જાહેરાત કરતાં 546 કરોડ રૂપિયાનું પેકેજ જાહેર કર્યું છે. આ પેકેજમાં સરકારનાં જણાવ્યા અનુસાર 2.82 લાખ ખેડૂતોને લાભ આપવામાં આવશે. 

નુકસાન સામે રાહતની જાહેરાત 
આજે મુખ્યમંત્રી ભૂપેન્દ્ર પટેલની અધ્યક્ષતામાં કેબિનેટની બેઠક બાદ કેબિનેટ મંત્રી જીતુ વાઘાણીએ જણાવ્યું કે વરસાદ બાદ સૌરાષ્ટ્ર સહિતનાં સાતથી આઠ જિલ્લાઓમાં ખેડૂતોને ભારે નુકસાન થયું હતું જેમા સર્વે બાદ સહાયની જાહેરાત કરવામાં આવી છે. જીતુ વાઘાણીએ કહ્યું કે કુદરત રૂઠે ત્યારે ખેડૂતો પર જે મુશ્કેલી આવે છે તેની સામે તે ખેડૂત ફરીથી ઊભો થઈ શકે તેનાં માટે આ મદદની જાહેરાત કરવામાં આવી છે. વાઘાણીએ કહ્યું કે ખેડૂતોની અરજી કરવાનો ખર્ચ પણ સરકાર જ ભોગવશે. 

રોડ રસ્તાનાં કામ દિવાળી પહેલા પૂરા કરવાના આદેશ 
આ સાથે જ વાઘાણીએ જણાવ્યું કે કેબિનેટ મીટિંગમાં મુખ્યમંત્રી ભૂપેન્દ્ર પટેલે મંત્રી પૂર્ણેશ મોદી સહિત આખા મંત્રાલયને રોડ રસ્તાને લઈને સૂચના આપી છે. મુખ્યમંત્રી ભૂપેન્દ્ર પટેલે ગુજરાતનાં દરેક ગામડા અને શહેરમાં દિવાળી પહેલા જ રિપેરિંગ કામ પૂરા કરવાના આદેશ આપ્યા છે.

આગામી સમયમાં મોટા પાયે થશે ભરતીઓ 
વાઘાણીએ વધુમાં કહ્યું કે હાલમાં ભરતીઓની જાહેરાત કરવામાં આવી છે અને આગામી સમયમાં હજુ પણ તબક્કાવાર ભરતીઓની જાહેરાત કરવામાં આવશે. 

આ સિવાય CM પટેલે શું આદેશ આપ્યા 
આ સિવાય મુખ્યમંત્રી ભૂપેન્દ્ર પટેલે ખાણ-ખનીજ વિભાગ અને GIDC  ના પડતર પ્રશ્નો ઝડપથી પૂર્ણ કરવા માટે પણ આદેશ આપ્યા છે.