વિવાદ / ગુનાહિત ઇતિહાસ ધરાવે છે દેવાયત ખવડ, એક-બે નહીં, અનેક કલમો લાગી ચૂકી છે

Devayat Khawad : દેવાયત ખવડ દ્વારા ગત રોજ ધ્રુવરાજસિંહ પર થયેલા હુમલામાં તેઓને ગંભીર ઈજાઓ થતા જૂનાગઢ ખાનગી હોસ્પિટલમાં સારવાર અર્થે ખસેડાયા હતા. આ બાબતે ધ્રુવરાજ સિંહે કહ્યું કે, દસથી પંદર લોકો હુમલો કરવામાં હતા. સોનાની ચેન અને રોકડ રકમની લૂંટ કરી હતી. આ સાથે તેમણે કહ્યું કે, દેવાયત ખવડ જ મુખ્ય હતો તેમજ બંદૂક બતાવીને કેસ ન કરવાની ધમકી આપી હતી. આ તરફ તાલાલા પોલીસે લોકગાયક દેવાયત ખવડ અને તેના સાથીદારો સામે ગંભીર ગુનો દાખલ કર્યો છે. નોંધનીય છે કે, દેવાયત ખવડ ઉપર અગાઉ પણ અનેક ફરિયાદ નોંધાઈ ચૂકી છે.

શું કહી રહ્યા છે ફરિયાદી ?

અમદાવાદના સનાથલના રહેવાસી ધ્રુવરાજસિંહ રામચંદ્રસિંહ ચૌહાણ (ઉંમર-24) એ ફરિયાદ નોંધાવતા કહ્યું કે, દેવાયત ખવડે અગાઉ તેમના ગામમાં ડાયરાનું આયોજન કર્યું હતું. દેવાયત ખવડ ડાયરામાં હાજર ન હોવા છતાં તેણે આઠ લાખ રૂપિયા લઈ લીધા હતા. આ અંગે ધ્રુવરાજસિંહના મોટા બાપા ભગવતસિંહ કાનજીભા ચૌહાણે ફરિયાદ નોંધાવી હતી જેની અદાવત રાખીને આ હુમલો કરવામાં આવ્યો છે.

આ રીતે કરવામાં આવ્યો હુમલો ?

ફરિયાદીના આક્ષેપ મુજબ આરોપીઓએ પૂર્વ આયોજિત કાવતરું રચીને ધ્રુવરાજસિંહનો પીછો કરી ધ્રુવરાજસિંહની કારને મારી નાખવાના ઈરાદાથી તેમની કાર સાથે ફોર્ચ્યુનર અને ક્રેટા કાર ભટકાવી હતી. આ તરફ હુમલા દરમિયાન આરોપીઓએ ધ્રુવરાજસિંહ પાસેથી સોનાનો ચેઇન અને લોકેટ ઝૂંટવી લીધો હતો. ત્યારબાદ લોખંડના પાઈપ વડે માર મારીને તેમને ડાબા હાથ અને ડાબા પગમાં ફ્રેક્ચર જેવી ગંભીર ઈજાઓ પહોંચાડી હતી. આરોપીઓએ તેમને રિવોલ્વર તાકીને ધમકી પણ આપી હતી કે, જો પોલીસ કેસ કરવામાં આવશે તો તેઓ તેમને મારી નાખશે.

12 થી 15 લોકો સામે ફરિયાદ દાખલ

પ્રાથમિક વિગતો મુજબ આ ગુનામાં દેવાયત ખવડ અને 12 થી 15 બુકાનીધારી અજાણ્યા માણસો આરોપી છે. આ કેસ તાલાલા પોલીસ સ્ટેશનમાં નોંધવામાં આવ્યો છે આ ગુનો BNS કલમ 109, 311, 117(1), 118(2) 189 (2), 191 (2), 191(3), 190, 61, 352, 351 (3) તેમજ આર્મસ એક્ટ અને જી.પી.એક્ટ હેઠળ દાખલ કરવામાં આવ્યો છે.

આ પણ વાંચો : દેવાયત ખવડ સહિત 15 શખ્સો વિરૂદ્ધ ફરિયાદ દાખલ, હવે શું થશે?

દેવાયત ખવડનો ગુનાહિત ઇતિહાસ

• ચોટીલા પોલીસ સ્ટેશન: ગુ.ર.નં. 80/2015 હેઠળ IPC કલમ 323, 325, 503, 114 અને જી.પી.એક્ટ કલમ 135 મુજબ ગુનો નોંધાયેલ છે.
• મુળી પોલીસ સ્ટેશન: ગુ.ર.નં. 84/2015 હેઠળ આર્મસ એક્ટ કલમ 24(9)(51)(27), 29 અને IPC કલમ 147, 148, 149, 307, 447, 504 અને જી.પી. એક્ટ કલમ 135 મુજબ ગુનો નોંધાયેલ છે.
• સુરેન્દ્રનગર સિટી બી-ડિવિઝન પોલીસ સ્ટેશન: ગુ.ર.નં. II 08/2018 હેઠળ આર્મસ એક્ટ કલમ 25(1), 25(1)(એ), 25(1)(બી) મુજબ ગુનો નોંધાયેલ છે.
• બોપલ દસક્રોઈ, અમદાવાદ પોલીસ સ્ટેશન: ગુ.ર.નં. 252/2025 હેઠળ BNS કલમ 318 (4), 351(2) મુજબ ગુનો નોંધાયેલ છે.
• એ-ડિવિઝન, રાજકોટ શહેર પોલીસ સ્ટેશન: ગુ.ર.નં. 512/2022 હેઠળ IPC કલમ 114, 307, 325, 506(2) અને જી.પી. એક્ટ કલમ 135 તથા 37(1) મુજબ ગુનો નોંધાયેલ છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ