રાજકારણ / નવા મંત્રીમંડળમાં થઈ શકે મોટો ઉલટફેર, થોડીવારમાં જ CMની રાજ્યપાલ સાથે મુલાકાત

Gujarat Cabinet Expansion : ગાંધીનગર મહાત્મા મંદિર ખાતે આજે (17 ઓક્ટોબર 2025)ના શુક્રવારે નવું મંત્રીમંડળ સવારે 11:30 કલાકે શપથ ગ્રહણ કરશે. રાજ્યપાલ આચાર્ય દેવવ્રત તમામ મંત્રીઓને શપથ લેવડાવશે. જો કે તે પહેલા જ મુખ્યમંત્રી ભૂપેન્દ્ર પટેલ રાજ્યપાલ સાથે મુલાકાત કરશે.

નવા ચહેરાઓને સ્થાન મળી શકે

ગુજરાતના નવા મંત્રીમંડળનો આજે શપથ ગ્રહણ સમારોહ યોજાનાર છે અને 16 નવા ચહેરાઓને સ્થાન મળી શકે છે. અગાઉ મુખ્યમંત્રીની ગૂરૂવારે રાત્રે રાજ્યપાલ સાથે મુલાકાત થવાની હતી, જો કે કોઈ કારણોસર મુલાકાત રદ થઈ ગઈ હતી.

નવા મંત્રીમંડળ અંગે રાજ્યપાલ સાથે ચર્ચા

નોંધનીય છે કે, જે. પી. નડ્ડા સાથે ત્રણ કલાક બેઠક થતાં રાજ્યપાલ સાથે મુખ્યમંત્રીની મુલાકાત થઈ શકી ન હતી. આજે સીએમ વર્તમાન મંત્રીમંડળના સભ્યોના રાજીનામા તેમજ નવા મંત્રીઓના સમાવેશ પર રાજ્યપાલ સાથે ચર્ચા કરી શકે તેવી શક્યતા છે.

મહાત્મા મંદિર ખાતે કડક પોલીસ બંદોબસ્ત

મંત્રીમંડળના શપથવિધિને ધ્યાને રાખીને સુરક્ષા વ્યવસ્થા માટે પણ કડક બંદોબસ્ત ગોઠવાયો છે. મહાત્મા મંદિર ખાતે 2 ડીવાયએસપી, 20 પોલીસ ઇન્સ્પેક્ટર, 30 પીએસઆઈ અને આશરે 450 પોલીસ જવાનો તૈનાત રહેશે.

વધુ વાંચો : LIVE : આજે ગુજરાતના નવા મંત્રીમંડળનું વિસ્તરણ, કોનું કપાશે પત્તું, કોણ મારશે બાજી?

તમામ મંત્રીઓએ રાજીનામું આપ્યું હતું

નોંધનીય છે કે, ગરુવાર 16 ઓક્ટોબર 2025ના રોજ ભૂપેન્દ્ર પટેલના નેતૃત્વ હેઠળના તમામ 16 મંત્રીઓએ રાજીનામું આપ્યું હતું. સંભવના અનુસાર, જૂના મંત્રીઓમાંથી કેટલાક મંત્રીઓને ફરી સ્થાન મળવાની શક્યતા છે. કેટલાકને નવા ખાતા મળવાની તો કેટલીકના હોદ્દા વધારવાની પણ શક્યતા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ