અમદાવાદ / સિગ્નલ તોડતાં બે વાર વિચારજો! અમદાવાદમાં રાત્રે 12 સુધી ટ્રાફિક પોલીસ તૈનાત રહેશે

Gujarat: અમદાવાદ જેવા મેટ્રો શહેરમાં દિવસ દરમિયાન જ નહીં, પરંતુ રાત્રિના સમયે પણ ટ્રાફિકનું ભારણ જોવા મળે છે. શહેરમાં એસ.જી. હાઈવે સહિતના અનેક વ્યસ્ત રસ્તાઓ પર રાત્રે પણ ભયંકર ટ્રાફિન જોવા મળે છે.

ટ્રાફિકનું ભારણ રહે છે

એક તરફ એસ.જી હાઈવે ઉપરાંત કેટલાક વિસ્તારોમાં ઓવરબ્રિજ તેમજ અંડર બ્રિજ જેવા કામો ચાલી રહ્યા હોવાથી ટ્રાફિકનું ભારણ રહે છે. સવારે ઓફિસ જવા સમયે તેમજ સાંજે ઓફિસના છુટવા સમયે તો સ્થિતિ બેકાબૂ બની જાય છે.

પીક અવર્સમાં થાય છે ભયાનક ટ્રાફિક

શહેરમાં કેટલાક વિસ્તારો એવા પણ છે જ્યાં રાત્રે 10 વાગ્યા બાદ પણ વાહનવ્યવહારનો ઘસારો જોવા મળે છે. ટ્રાફિકની વિકરાળ પરિસ્થિતિને ધ્યાને રાખીને ટ્રાફિક પોલીસ દ્વારા તાજેતરમાં ડ્યુટી સમયસીમામાં ફેરફાર કરવામાં આવ્યો છે જેથી રાત્રિના પીક અવર્સમાં પણ વધુ સક્ષમ વ્યવસ્થા જાળવી શકાય.

હવે રાત્રે 12 ટ્રાફિક પોલીસ તૈનાત રહેશે

અમદાવાદમાં છેલ્લા કેટલાક સમયમાં રાત્રિ દરમિયાન ઓવર સ્પીડિંગના કારણે અકસ્માતના બનાવોમાં પણ નોંધપાત્ર વધારો થયો છે. જેના કારણે હવે અમદાવાદ શહેરમાં હવે રાત્રે 12 સુધી ટ્રાફિક પોલીસ તૈનાત રહેશે. ટ્રાફિક પોઈન્ટ પર રાત્રે પોલીસ તહેનાત રહેતા હોવાથી વાહનચાલકો પર નિયંત્રણ રહેશે અને નિયમભંગ કરનારાઓ પર કડક કાર્યવાહી પણ શક્ય બનશે.

વધુ વાંચો : જૂનાગઢમાં મેંદરડા ગામ નજીક બનેલી દુર્ઘટનામાં બે યુવાનોનાં કરુણ મોત

સમસ્યા ઓછી થવાની આશા

ટ્રાફિક પોઈન્ટ પર પોલીસકર્મીઓ બે શિફ્ટમાં ફરજ બજાવશે. શિફ્ટમાં ફેરફાર કરીને રાત્રિના 11થી વધારી 12 વાગ્યા સુધીનો કરવામાં આવ્યો છે. નવી વ્યવસ્થા અમલમાં આવતા હવે આ સમસ્યામાં થોડો ઘટાડો જોવા મળશે તેવી આશા છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ