ટેક્નોલોજી / હવેથી બદલાઇ જશે YouTuberનો એક્સપિરિયન્સ, Googleનું મોટું એલાન

ગૂગલ યુટ્યુબ માટે 'Ask YouTube' નામનું નવું AI ફીચર લાવી રહ્યું છે, જે યુઝર્સને ચેટબોટની જેમ સવાલો પૂછવાની સુવિધા આપશે. આ ફીચર માત્ર વીડિયોની યાદી જ નહીં, પરંતુ પૂછેલા સવાલનો સીધો જવાબ પણ આપશે. હાલમાં આ ફીચર અમેરિકામાં યુટ્યુબ પ્રીમિયમ યુઝર્સ માટે ટેસ્ટિંગ હેઠળ છે. આ સુવિધા દ્વારા યુઝર્સ લાંબા વીડિયો જોયા વગર પણ મહત્વની માહિતી મેળવી શકશે અને સ્માર્ટ કન્ટેન્ટ સજેશન પ્રાપ્ત કરી શકશે.

યુટ્યુબ પર સર્ચ કરવાની રીત ટૂંક સમયમાં બદલાવા જઈ રહી છે. અત્યાર સુધી આપણે યુટ્યુબ પર માત્ર કીવર્ડ ટાઈપ કરીને વીડિયો શોધતા હતા, પરંતુ 'Ask YouTube' ફીચર આવ્યા પછી યુઝર્સ સીધા સવાલો પૂછી શકશે. આ ફીચર હાલમાં પ્રાયોગિક ધોરણે છે અને પસંદગીના યુઝર્સ સાથે તેનું પરીક્ષણ કરવામાં આવી રહ્યું છે. ગૂગલ હવે યુટ્યુબને માત્ર એક વીડિયો શેરિંગ એપ તરીકે નહીં, પરંતુ ગૂગલ સર્ચની જેમ એક સર્ચ પ્લેટફોર્મ તરીકે સ્થાપિત કરવા માંગે છે. હાલમાં યુટ્યુબના સર્ચ ઓપ્શનમાં 'કોન્ટેક્સ્ટ અવેરનેસ' એટલે કે સંદર્ભ સમજવાની ક્ષમતા ગૂગલ સર્ચ જેટલી નથી, જેને ગૂગલ હવે બદલી રહ્યું છે.

આ ફીચરની સૌથી મોટી ખાસિયત એ છે કે તે ChatGPT અથવા ગૂગલ જેમિની (Gemini) ની જેમ કામ કરશે. ઉદાહરણ તરીકે, જો તમે પૂછશો કે "એપોલો 11 મિશન શું હતું?" તો એઆઈ તમને માત્ર વીડિયોની લિસ્ટ જ નહીં બતાવે, પરંતુ તે મિશન વિશે ટૂંકમાં માહિતી પણ લખીને આપશે. આ સાથે જ તે મિશનને લગતા શ્રેષ્ઠ વીડિયો પણ સજેસ્ટ કરશે. એટલે કે હવે યુઝર્સે કોઈ માહિતી સમજવા માટે આખો વીડિયો જોવાની જરૂર નહીં પડે, એઆઈ પહેલેથી જ તેનો સારાંશ આપી દેશે. આ ફીચર માત્ર લાંબા વીડિયો જ નહીં, પરંતુ શોર્ટ્સ અને અલગ-અલગ કેટેગરીના વીડિયોને પણ ફિલ્ટર કરીને આપશે.

વર્તમાન સમયમાં આ સુવિધા મર્યાદિત છે. તે માત્ર 18 વર્ષથી વધુ ઉંમરના યુટ્યુબ પ્રીમિયમ સબ્સ્ક્રાઇબર્સ માટે અને તે પણ માત્ર અમેરિકામાં જ ઉપલબ્ધ છે. જોકે, ગૂગલે સંકેત આપ્યા છે કે પરીક્ષણ સફળ થયા પછી તે ધીમે ધીમે વિશ્વભરના તમામ યુઝર્સ માટે લોન્ચ કરવામાં આવશે. ગૂગલનો મુખ્ય ઉદ્દેશ્ય તેના તમામ ઉત્પાદનો જેવા કે જીમેલ, સર્ચ અને યુટ્યુબમાં એઆઈ જોડીને યુઝર્સને સ્માર્ટ એક્સપિરિયન્સ આપવાનો છે. હવે સર્ચ માત્ર લિસ્ટિંગ પૂરતું સીમિત નહીં રહે, પરંતુ તે એક વાતચીત જેવો અનુભવ બની જશે.

આ પણ વાંચોઃ Bengal Election 2026 / બંગાળમાં EVM પર ટેપ લાગ્યાંની ફરીયાદ, ચૂંટણી પંચે કહ્યું-દાવો સાચો હોય તો ફરી મતદાન

જોકે, આ ટેક્નોલોજીના કેટલાક જોખમો પણ છે. ઘણી વખત એઆઈ ખોટી અથવા ગેરમાર્ગે દોરનારી માહિતી પણ આપી શકે છે, જેને 'હેલ્યુસિનેશન' કહેવામાં આવે છે. તેથી યુઝર્સને સલાહ આપવામાં આવી છે કે તેઓ એઆઈ દ્વારા આપવામાં આવેલી માહિતીની ચોકસાઈની તપાસ જાતે પણ કરી લે. કુલ મળીને, 'Ask YouTube' ના આગમનથી યુટ્યુબ હવે માત્ર મનોરંજનનું સાધન નહીં રહે, પરંતુ તે એક સક્ષમ એજ્યુકેશનલ અને ઇન્ફોર્મેશનલ હબ બની જશે જ્યાં તમે સવાલ પૂછશો અને એઆઈ તમને સચોટ જવાબ આપશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ