જાગૃતિ / ગુજરાતમાં ડ્રગ્સ સામે કડક કાર્યવાહી, 5 વર્ષમાં ₹13,600 કરોડનું ડ્રગ્સ ઝડપાયું, હજારો આરોપીઓ જેલમાં

26 જૂનના રોજ વિશ્વભરમાં આંતરરાષ્ટ્રીય ડ્રગ્સ વિરોધ દિવસની ઉજવણી કરવામાં આવે છે. આ અવસરે અમદાવાદના રિવરફ્રન્ટ ખાતે એન્ટી નાર્કોટિક્સ ટાસ્ક ફોર્સ ગુજરાત અને ગુજરાત પોલીસના સંયુક્ત આયોજન હેઠળ વિશેષ કાર્યક્રમ અને સાયકલોથોનનું આયોજન કરવામાં આવ્યું હતું. આ કાર્યક્રમનો મુખ્ય હેતુ લોકોને ડ્રગ્સના દૂષણ સામે જાગૃત કરવાનો અને સમાજને નશામુક્ત બનાવવાનો હતો.

મોટી સંખ્યામાં પોલીસ અધિકારીઓ

કાર્યક્રમ દરમિયાન મોટી સંખ્યામાં પોલીસ અધિકારીઓ, યુવાનો, રમતવીરો, વિવિધ સંસ્થાઓના પ્રતિનિધિઓ અને નાગરિકોએ ભાગ લીધો હતો. સાયકલોથોન દ્વારા શહેરમાં ડ્રગ્સ વિરોધી જનજાગૃતિનો સંદેશ આપવામાં આવ્યો હતો. આયોજકોએ જણાવ્યું કે આવા કાર્યક્રમો દ્વારા ખાસ કરીને યુવા પેઢીને નશાના દૂષણથી દૂર રાખવાનો પ્રયાસ કરવામાં આવી રહ્યો છે.

ગુજરાત પાસે અંદાજે 1600 કિલોમીટર લાંબો દરિયાકિનારો

કાર્યક્રમ દરમિયાન ગુજરાતના પોલીસ DGPએ જણાવ્યું હતું કે ડ્રગ્સ સામેની લડાઈ માત્ર કાયદો અમલમાં મૂકતી એજન્સીઓની જવાબદારી નથી, પરંતુ સમગ્ર સમાજની સામૂહિક જવાબદારી છે. તેમણે જણાવ્યું કે ડ્રગ્સના વધતા ખતરાને રોકવા માટે દરેક નાગરિકે આગળ આવવું જરૂરી છે. DGPએ વધુમાં જણાવ્યું કે ગુજરાત પાસે અંદાજે 1600 કિલોમીટર લાંબો દરિયાકિનારો છે, જેના કારણે રાજ્ય માટે ડ્રગ્સની દાણચોરી રોકવી એક મોટો પડકાર છે. તેમ છતાં ગુજરાત પોલીસ ડ્રગ્સ સામે આ લડાઈને એક યુદ્ધ સમજીને સતત કાર્યવાહી કરી રહી છે અને રાજ્યમાં ડ્રગ્સના નેટવર્કને નાબૂદ કરવા માટે કડક પગલાં લેવામાં આવી રહ્યા છે.

ડ્રગ્સના દૂષણને વધુ અસરકારક રીતે અટકાવી

તેમણે લોકોને અપીલ કરી કે ડ્રગ્સ વિરોધી અભિયાનમાં માત્ર પોલીસ પર નિર્ભર ન રહેવું જોઈએ. સમાજના દરેક વર્ગ, યુવાનો, માતા-પિતા, શિક્ષકો અને સામાજિક સંસ્થાઓએ પણ આ ઝુંબેશમાં સક્રિય ભાગ લેવો જોઈએ. જો સમાજના તમામ લોકો એકસાથે જોડાશે તો ડ્રગ્સના દૂષણને વધુ અસરકારક રીતે અટકાવી શકાય છે.

આ પણ વાંચો : સુરેન્દ્રનગરના લખતર APMC ચેરમેનની ચૂંટણી રદ, ચૂંટણી પ્રક્રિયામાં અનિયમિતતા બાદ નવી ચૂંટણીનો આદેશ

કાર્યક્રમ દરમિયાન ઉપસ્થિત લોકોએ પણ ડ્રગ્સમુક્ત ગુજરાત બનાવવા માટે પ્રતિબદ્ધતા વ્યક્ત કરી હતી. સાયકલોથોન દ્વારા લોકોને સ્વસ્થ જીવનશૈલી અપનાવવાનો અને નશાથી દૂર રહેવાનો સંદેશ આપવામાં આવ્યો હતો. ગુજરાત પોલીસ અને એન્ટી નાર્કોટિક્સ ટાસ્ક ફોર્સે ભવિષ્યમાં પણ આવા જાગૃતિ કાર્યક્રમો વધુ વ્યાપક સ્તરે યોજવાની પ્રતિબદ્ધતા વ્યક્ત કરી છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ