બનાસકાંઠા / "મને..." કોંગ્રેસના પૂર્વ SC મોરચા મહિલા પ્રમુખ અરુણા પરમારે જીગ્નેશ મેવાણી સામે કર્યાં ગંભીર આક્ષેપો

બનાસકાંઠાના વડગામના ધારાસભ્ય જિગ્નેશ મેવાણી વધુ એક વિવાદમાં ફસાયા છે. કોંગ્રેસના પૂર્વ SC મોરચા મહિલા પ્રમુખ અરુણા પરમારે ધારાસભ્ય જીગ્નેશ મેવાણી સામે ગંભીર આક્ષેપો કર્યા છે. અરુણાબેનના જણાવ્યા મુજબ, 2022ની ચૂંટણી દરમિયાન તેમણે જ્ઞાતિભાઈ તરીકે મણીભાઈ વાઘેલાને સમર્થન આપ્યું હતું, જે બાબત જીગ્નેશ મેવાણીને પસંદ આવી ન હતી અને ત્યારબાદથી તેમને સતત હેરાન કરી રહ્યાં છે.

પોલીસ હેરાનગતિનો પણ આરોપ

અરુણાબેને પોલીસ મારફતે પણ હેરાનગતિ કરાઈ હોવાનો અને 24 કલાક લોકઅપમાં રાખવાની ધમકી અપાઈ હોવાનો દાવો કર્યો છે. પરિવાર અને સમાજના આગેવાનોના સમર્થન વિના પોતે એકલી પડી ગઈ હોવાનું પણ તેમણે જણાવ્યું છે. હવે અરુણાબેને સરકાર પાસે ન્યાયની માંગ સાથે FIR નોંધાવવા માટે સરકારી વકીલની મદદ આપવાની વિનંતી કરી છે.

જીગ્નેશ મેવાણી પર 4 લાખની ઉઘરાણીનો આરોપ

ચાર લાખની ઉઘરાણીના આરોપમાં વડગામ ધારાસભ્ય જીગ્નેશ મેવાણીની મુશ્કેલી વધી છે. વડગામના ટોકરીયા ગામના યાકુબ શેરસિયાએ પાલનપુર શહેર પશ્ચિમ પોલીસ મથકે લેખિતમાં અરજી નોંધાવી છે. યાકુબ શેરસિયાએ જીગ્નેશ મેવાણી પર ચાર લાખ રૂપિયાની ઉઘરાણીનો આક્ષેપ કર્યો છે. યાકુબ શેરસિયાનો એવો પણ આક્ષેપ છે કે પોતાને ભાજપનો વ્યક્તિ ગણાવી હેરાન કરવામાં આવી રહ્યો છે.

વધુ વાંચો : પાટડીના બામણવા ગામે 55 વર્ષીય વ્યક્તિની હત્યા, રાતે ખેતર સુવા જતી વેળાએ અજાણ્યા શખ્સોએ ધારિયું માર્યું

શું હતો આખો બનાવ?

વડગામ તાલુકાના ટોકરીયા ગામમાં ગ્રામસભામાં એવો આક્ષેપ કરવામાં આવ્યો હતો કે જીજ્ઞેશ મેવાણીએ કાર્યકર્તા પાસેથી 4 લાખ લીધા હતા તથા તેમને ઈશારે ખોટું મતદાન પણ કરાયું હતું. શિક્ષણ મંત્રી પ્રદ્યુમન વાજાએ જીજ્ઞેશ મેવાણીની ઝાટકણી કાઢી હતી. તેમણે કહ્યું કે વોટ ચોરીનો આક્ષેપ કરતાં મેવાણી ખોટું મતદાન કરાવતા અચકાતા નથી. જીજ્ઞેશ મેવાણીના ચૂંટણી પંચના આક્ષેપો નિરાધાર છે. રાજકારણમાં શુદ્ધીની વાત કરતા કોંગ્રેસે જીજ્ઞેશ મેવાણી સામે શિસ્તભંગની કાર્યવાહી કરવી જોઈએ. સોશિયલ મીડિયામાં વાયરલ થયેલા વીડિયો અનુસાર, જાહેર સભા દરમિયાન ધારાસભ્ય જીગ્નેશ મેવાણી સામે 4 લાખ રૂપિયા લીધા હોવાનો સીધો આક્ષેપ કરવામાં આવ્યો છે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ