ખુલાસો / “પપ્પા, હવે તમારે કોઈને પૈસા નહીં આપવા પડે...”, સંભવ જૈનના આ મેસેજે પિતાની સામે પુત્રની પીડા ઉજાગર કરી દીધી

સેક્ટર-94ની સુપરનોવા સ્પાયરા બિલ્ડિંગમાં 29 વર્ષીય સોફ્ટવેર એન્જિનિયર સંભવ જૈનના મોતના મામલામાં પોલીસ તપાસ આગળ વધી રહી છે. ઘટનાના થોડા સમય પહેલાં સંભવ તેના પિતા સાથે સતત વોટ્સએપ પર સંપર્કમાં હતો. ચેટમાં તેણે માનસિક તણાવ અને આર્થિક મુશ્કેલીનો ઉલ્લેખ કર્યો હતો.

પોલીસને સંભવના મોબાઇલમાંથી પિતા સાથેની વોટ્સએપ ચેટ મળી છે. તેમાં તેણે હિન્દી અને અંગ્રેજી બંને ભાષામાં અનેક મેસેજ કર્યા હતા. એક મેસેજમાં તેણે પિતાને લખ્યું હતું, “પપ્પા, હવે તમારે કોઈને પૈસા આપવા નહીં પડે...” આ મેસેજથી તેની સ્થિતિ કેટલી ગંભીર હતી તેનો અંદાજ પોલીસ લગાવી રહી છે.

પિતા સતત સમજાવતા રહ્યા, ઘરે પરત આવવા કહ્યું

પોલીસના જણાવ્યા પ્રમાણે, સંભવ છેલ્લા કેટલાક સમયથી પરેશાન હતો અને ઘટનાના ત્રણ દિવસ પહેલાંથી પિતા સાથે વાતચીત કરી રહ્યો હતો. પિતાએ તેને સતત સમજાવ્યો હતો અને ઘરે પરત આવવા માટે કહ્યું હતું. તેમણે આવું કોઈ અંતિમ પગલું ન ભરવા પણ વિનંતી કરી હતી. પરંતુ શનિવારે સંભવ સેક્ટર-94માં આવેલી સુપરનોવા સ્પાયરા બિલ્ડિંગના 43મા માળેથી નીચે કૂદી ગયો હતો.

એસી ટેક્નિશિયનોએ બચાવવાનો પ્રયાસ કર્યો

ઘટના પહેલાં સંભવને બચાવવાનો પ્રયાસ પણ કરવામાં આવ્યો હતો. બાજુના રૂમમાં કામ કરી રહેલા એસી ટેક્નિશિયનોએ તેને બાલ્કનીની રેલિંગની બહાર લટકેલો જોયો હતો. ટેક્નિશિયનોએ તેની પાસે જઈને તેને નીચે ન કૂદવા માટે સમજાવ્યો હતો. પોલીસના જણાવ્યા પ્રમાણે, સંભવે તે સમયે કહ્યું હતું કે તે ખૂબ જ ડિપ્રેશનમાં છે અને હવે જીવવા માગતો નથી. સમજાવટ છતાં તેણે અંતે છલાંગ લગાવી દીધી.

મોબાઇલમાંથી લગભગ 2 મિનિટનો વીડિયો મળ્યો

તપાસ દરમિયાન પોલીસને સંભવના મોબાઇલમાંથી ઘટના પહેલાં રેકોર્ડ કરાયેલો આશરે બે મિનિટનો વીડિયો પણ મળ્યો છે. પોલીસનું કહેવું છે કે વીડિયોમાં સંભવે પોતાની આર્થિક મુશ્કેલીઓનો ઉલ્લેખ કર્યો હતો. પ્રાથમિક તપાસમાં વીડિયોમાં તેણે કોઈ વ્યક્તિને પોતાના મોત માટે જવાબદાર ઠેરવ્યો હોવાની વાત સામે આવી નથી. પોલીસે વીડિયો સહિત મોબાઇલમાં રહેલા ડિજિટલ પુરાવાઓને સુરક્ષિત રાખ્યા છે.

ચેક-ઇનથી રૂમ સુધીના CCTV ફૂટેજ કબજે

ઘટના બાદ સેક્ટર-126 પોલીસ સ્ટેશનની ટીમે બિલ્ડિંગ અને આસપાસના CCTV કેમેરાના ફૂટેજની તપાસ શરૂ કરી હતી. પોલીસે સંભવના સુપરનોવામાં ચેક-ઇન કરવાથી લઈને રૂમ સુધી પહોંચવાના ફૂટેજ પણ સુરક્ષિત કર્યા છે. ઘટના સમયે બિલ્ડિંગમાં હાજર એસી ટેક્નિશિયન તેમજ હોટેલના કર્મચારીઓની પૂછપરછ કરવામાં આવી રહી છે.

મોબાઇલ, ચેટ, વીડિયો અને CCTVની તપાસ

હાલ પોલીસ પાસે સંભવનો મોબાઇલ ફોન, પિતા સાથેની વોટ્સએપ ચેટ, ઘટના પહેલાં બનાવેલો વીડિયો અને CCTV ફૂટેજ જેવા મહત્વના ઇલેક્ટ્રોનિક પુરાવા છે.

આ પણ વાંચોઃ 5 ઓક્ટોબરથી રાજ્યભરના વકીલોનું અચોક્કસ મુદ્દતની હડતાળનું આહવાન

પોલીસ આ તમામ પુરાવાઓના આધારે સંભવની ઘટનાથી પહેલાંની માનસિક અને આર્થિક સ્થિતિ તથા ઘટનાક્રમ સમજવાનો પ્રયાસ કરી રહી છે. તપાસ પૂર્ણ થયા બાદ જ મોત પાછળના ચોક્કસ કારણો અંગે વધુ સ્પષ્ટતા થઈ શકશે.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ