રાજનીતિ / દિનુ મામાની ભાજપમાં ઘરવાપસી, આવતીકાલે જોડાશે, પાદરા બેઠક પર અપક્ષ લડીને કર્યો હતો બળવો

• દિનુ મામાની ભાજપમાં થશે ઘરવાપસી
• આવતીકાલે ભાજપમાં જોડાશે દિનેશ પટેલ
• સી.આર.પાટીલની હાજરીમાં જોડાશે ભાજપમાં

બરોડા ડેરીના પૂર્વ ચેરમેન દિનુ મામા ફરી ભાજપમાં ઘરવાપસી કરશે. આવતી કાલે ભાજપ પ્રદેશ અધ્યક્ષ સી.આર.પાટીલની હાજરીમાં ભાજપમાં જોડાશે. અત્રે જણાવી દઈએ કે, ગત ચૂંટણીમાં પાદરા બેઠક પરથી બળવો કરી તેઓ અપક્ષ લડ્યા હતા. આવતીકાલે સી.આર.પાટીલ પાદરાની મુલાકાતે છે. ત્યારે તેઓ ભાજપનો ખેસ ધારણ કરાવી દિનુ મામાને ઘરવાપસી કરાવશે.

દિનુ મામા કાર્યકર-અગ્રણીઓ સાથે ભાજપમાં જોડાશે
અત્રે ઉલ્લખનીય છે કે, કેતન ઇનામદાર દ્વારા આંદોલન થતા ચેરમેન પદેથી તેમણે રાજીનામુ આપ્યું હતું. જૂન મહિનામાં ફરી બરોડા ડેરીની ચૂંટણી યોજાવાની છે ત્યારે તેઓ ફરી ભાજપમાં જોડાવાના છે જેને લઈ અટકળો શરૂ થઈ છે. તમને જણાવી દઈએ કે, ડેરી ડિરેકટર સતીશ નિશાળીયાને ભાજપ જિલ્લા પ્રમુખ બનાવ્યા છે. સસ્પેન્ડેડ દિનુ મામા કાર્યકર-અગ્રણીઓ સાથે ભાજપમાં જોડાશે. દિનુ મામા ભાજપમા જોડાયા બાદ બરોડા ડેરીમાં ફરી એકવાર નવાજૂનીના એંધાણ સર્જાઈ શકે છે. 

અગાઉ દિનુ પટેલે ભાજપમાંથી આપ્યું હતું રાજીનામું
બરોડા ડેરીના પૂર્વ ચેરમેન દિનુ પટેલે ભાજપમાંથી રાજીનામું આપ્યું હતું. પાદરાના પૂર્વ ધારાસભ્ય દિનુ પટેલને ટિકિટ ન મળતા તેઓ નારાજ થયા હતા. તેમજ દિનુ પટેલે પાદરા બેઠક પરથી અપક્ષ ઉમેદવારી નોંધાવી હતી. દિનુ પટેલને હર્ષ સંઘવી અને સી આર પાટીલની સમજાવટ બાદ તેઓ માન્યા ન હતા. દિનુ પટેલે સી આર પાટીલ અને જિલ્લા ભાજપ પ્રમુખને રાજીનામું મોકલ્યું હતું. પાર્ટી દિનુ પટેલને સસ્પેન્ડ કરે તે પહેલા જ દિનુ પટેલે પાર્ટીને રામ રામ કર્યા હતા. આ બધી ઘટનાઓ વચ્ચે તેઓ ફરી ભાજપમાં જોડાવા જઈ રહ્યાં છે.

અગાઉ પણ અપક્ષ ચૂંટણી લડ્યા હતા 
અત્રે ઉલ્લેખીય છે કે, 2007માં પાદરા બેઠક પરથી દિનેશ પટેલ અપક્ષ તરીકે ચૂંટણી લડ્યા હતા અને જેમાં તેમનો વિજય થયો હતો. ત્યારબાદ તેઓએ ભાજપનો ખેસ ધારણ કરી લીધો હતો. ભાજપમાં ગયા બાદ 2012માં ભાજપે તેઓને ટિકિટ આપી હતી અને તેમાં પણ તેઓ વિજયી બન્યા હતા. જો કે વર્ષ 2022ની ચૂંટણીમાં ભાજપમાં બળવો કરી અપક્ષ ચૂંટણી લડ્યા હતા જેમાં તેમનો પરાજય થયો હતો