તારાજી / આણંદમાં નુકસાની ભર'પૂર': જિલ્લા ખેતીવાડી વિભાગે 20 ટીમો બનાવી હાથ ધર્યો સરવે, આટલા સમયમાં રિપોર્ટ રજૂ આદેશ

• મહી નદીમાં પૂરની અસર બાદ સરવેની કામગીરી 
• 20 ટીમ બનાવી હાથ ધર્યો સરવે
• એક સપ્તાહમાં નુકસાનીનો રિપોર્ટ બનાવવા આદેશ 

જિલ્લા ખેતીવાડી વિભાગે 20 ટીમો બનાવી હાથ ધર્યો સરવે
આણંદની મહી નદીમાં પુરની અસરને પગલે સર્વેની કામગીરી શરૂ કરી દીધી છે. જીલ્લા ખેતીવાડી વિભાગે 20 ટીમો બનાવી સર્વે હાથ ધર્યો હતો. ગ્રામ સેવકો અને તલાટીઓને સર્વેની કામગીરી સોંપાઈ છે. મહી નદીકાંઠે આવતા 17 ગામોમાં સર્વે થશે. પુરનાં કારણે પાક નુકશાનીનો સર્વે કરાશે. પુરનાં પાણી ઓસરતા જ સર્વેની કામગીરી હાથ ધરાઈ છે. એક સપ્તાહમાં નુકશાનીનો રિપોર્ટ તૈયાર કરવા તંત્ર દ્વારા આદેશ આપ્યો છે. 

કૃષિમંત્રી પૂરના કારણે કૃષિમાં નુકસાન સહિતની બાબતો પર કરશે સમિક્ષા
તાજેતરમાં દક્ષિણ ગુજરાતનાં અનેક વિસ્તારોમાં પુરે ભારે તારાજી સર્જી છે. પુરગ્રસ્ત વિસ્તારની કૃષિમંત્રી રાઘવજી પટેલ મુલાકાત કરશે. નર્મદા નદીમાં પૂરમાં થયેલ નુકશાન બાબતે કૃષિ મંત્રી સમીક્ષા કશે. તેમજ પુરનાં કારણે કૃષિમાં નુકશાન સહિતની બાબતો પર સમીક્ષા કરશે. ત્યારે અસરગ્રસ્ત વિસ્તારમાં સ્થાનિકો સાથે કૃષિમંત્રી ચર્ચા કરશે.

કેળના પાકમાં પાણી ફરી વળતા બળી ગયો પાક
ભરૂચનાં અંકલેશ્વરનાં અનેક ગામોમાં નર્મદાનાં પુરને લઈ ભારે નુકશાન થયું છે. કંશીયા અને માંડવા ગામે કેળનાં ઉભા પાકમાં પાણી ફરી વળ્યા હતા. કેળનાં પાકમાં પાણી ફરી વળતા પાક બળી ગયો હતો. કેળનો ભાવ 200 રૂપિયા મણથી ઘટીને 50 રૂપિયા થયો હતો. હેક્ટર દીઢ રૂપિયા 2 લાખની સહાય કરવા ખેડૂતોની માંગ છે. 
 

કોઇલી ગામના 8થી 10 ઘરો નદીના પ્રવાહમાં તણાયા
ભરૂચનાં અંકલેશ્વર તાલુકાનાં કોયલી ગામે ભારે નુકશાન થવા પામ્યું છે. નર્મદા નદીનાં તટે આવેલ કોયલી ગામમાં પુરનાં કારણે ઘરમાં પાણી ઘુસી ગયા હતા. શ્રમજીવી પરિવારોનાં ઘરમાં ઘરવખરીનો સામાનનો નાશ થયો છે. હજુ સુધી કોઈ સર્વે કરાયો નથી. અનાજ પણ પલળી જતા લોકોને ભારે હાલાકીનો સામનો કરવો પડ્યો હતો. કોઈલી ગામનાં 8 થી 10 ઘરો નદીનાં પ્રવાહમાં તણાયા હતા. 

રાજ્યમાં પુરના લીધે ખરીફ પાક તેમજ કપાસને થયું નુકસાન 
રાજ્યમાં કુલ 85.48 લાખ હેક્ટરમાં ખરીફ પાકનું વાવેતર થયું છે. જેમાં નર્મદા જીલ્લામાં 97 હજાર હેક્ટર, ભરૂચ જીલ્લામાં 2 લાખ હેક્ટર ખરીફ પાકનું વાવેતર થયું છે. જ્યારે રાજ્યમાં 26.82 લાખ હેક્ટરમાં કપાસનું વાવેતર, 16.35 લાખ હેક્ટરમાં મગફળીનું વાવેતર, 8.71 લાખ હેક્ટરમાં ડાંગરનું વાવેતર કરવામાં આવ્યું છે. રાજ્યમાં ભારે વરસાદ અને પૂરનાં લીધે ખરીફ પાક તેમજ કપાસ સહિતનાં પાકને નુકશાન થયું છે.