તપાસ તેજ / પત્ની પર ચાકુ ફેરવી, દીકરાને કૂવા ફેંકી પિતા પણ કૂદી પડ્યો, પોતે બચ્યો પણ..નવસારીમાં ઘર કંકાસનો કરુંણ અંજામ

• નવસારીના ખેરગામમાં પતિ પત્નીના ઝઘડામાં પુત્રનો ભોગ લેવાયો 
• ખેરગામના જગદીશ પટેલ અને તેની પત્ની પીનલ વચ્ચે કોઈ વાતે ચાલતો હતો વિવાદ 
• પિતાએ પુત્રને કુવામાં ફેંકી પોતે પણ છલાંગ લાગાવી પુત્રનું મોત

નવસારીના ખેરગામમાં ચકચારી ઘટના સામે આવી છે. જેમાં પતિ પત્નીના ઝઘડામાં પુત્રનો ભોગ લેવાયો હોવાનું સામે આવતા ખળભળાટ મચી જવા પામી છે. વાત એમ છે કે ખેરગામના જગદીશ પટેલ અને તેની પત્ની પીનલ વચ્ચે કોઈ વાતને લઈને મોટા પાયે ઝગડો ચાલતો હતો. બંનેને  સંતાનમાં એક પુત્ર અને પુત્રી હતા. વિવાદને પગલે પત્ની પીનલ છોકરી ભેરવી સાથે પિયર રહેતી હતી, જ્યારે જગદીશ છોકરા જય સાથે રહેતો હતો. 

પીનલને આંતરી લઈ કર્યો હુમલો 

આ વેળાએ પુત્ર જયે માતાને ફોન કરી ખેરગામ બોલાવી હતી. આથી પીનલ તેને લેવા નિકળી હતી. આ વાતનો મોકો જોઈ રસ્તામાં ગુનાહિત માનસિકતા ધરાવતા પતિ જગદીશે પત્ની પીનલને આંતરી લીધી હતી અને તેને પતાવી દેવાના ઇરાડે ચાકુ વડે જીવલેણ હુમલો કર્યો હતો. બાદમાં ત્યાંથી ભાગીને પુત્રને ક્ષણભરનો પર વિચાર કર્યા વગર ઘરના પાછળ આવેલી વાડીના કૂવા ફેંકી દીધો હતો એટલું જ નહીં ત્યારવાદ પોતે પણ કૂવામાં છલાંગ લગાવી દીધી હતી. કપાતર પુત્રની કરતૂત જોઈ જતા જગદીશની માતા પણ પાછળ દોડી અને પૌત્રને બચાવવા કૂવામાં કૂદી હતી. આ સમગ્ર ઘટનાને લઈને દેકારો બોલી જતા ગ્રામજનોને ઘટનાની જાણ થઈ હતી. આથી લોકો દોરડા લઇને કૂવા પાસે પહોંચી ત્રણેયને બચાવવાનો જહેમત ઉઠાવી હતી. જેમાં એક દોરડું પકડી જગદીશ કુવામાંથી બહાર આવી ભાગી છૂટ્યો હતો.

બાળકના મૃતદેહને પીએમ અર્થે ખસેડ્યો હતો

જ્યારે પૌત્રને બચાવવામાં દાદી નિષ્ફળ રહ્યા હતા. બીજી બાજુ લોકોએ કૂવામાં ખાટલો ઉતારી દાદીને બચાવી લીધા હતા. બાદ ડૂબી ગયેલા એક પૌત્રના મૃતદેહને બહાર કાઢયો હતો. આ મામલે જાણ થતાં ખેરગામ પોલીસ ઘટનાસ્થળે પહોંચી હતી. જ્યા બાળકના મૃતદેહને પીએમ અર્થે ખસેડ્યો હતો.બીજી તરફ હુમલામાં ઘાયલ પીનલને ખેરગામ રેફરલ હોસ્પિટલમાં સારવાર અર્થે ખસેડાઇ હોવાનું જાણવા મળી રહ્યું છે. તથા પોલીસે ભાગી છૂટેલા જગદીશ પટેલને પકડવાના ચક્રો ગતિમાન કર્યા છે. હાલ પોલીસે પિતા જગદીશ સામે પુત્રની હત્યા અને પત્નીની હત્યાના પ્રયાસનો ગુનો નોંધવાની તજવીજ હાથ ધરી છે.