તમારા કામનું / જો-જો તમે આવી ભૂલ કરતા! પહેલાં WhatsApp પર કરાઇ જોબ ઓફર, બાદમાં લગાવ્યો 37 લાખનો ચૂનો

• લગભગ દરેક લોકો વોટ્સએપ વાપરી રહ્યા છે
• સ્કેમર્સ પણ તેનો ફાયદો ઉઠાવી રહ્યા છે
• મહિનામાં 90,000 રૂપિયા સુધીની કમાણી કરવાની ઓફર આપી 
• સ્કેમર્સ 37 લાખ રૂપિયા પડાવી લીધા 

દરેક ઘરેમાં આજકાલ લગભગ દરેક લોકો વોટ્સએપ વાપરી રહ્યા છે અને આ એપ્લિકેશનની લોકપ્રિયતા કોઈનાથી છુપી નથી. જો કે સ્કેમર્સ પણ તેનો ફાયદો ઉઠાવી રહ્યા છે. વાત એમ છે કે ઓનલાઈન છેતરપિંડીનો એક નવો મામલો સામે આવ્યો છે, જ્યાં એક વ્યક્તિને વોટ્સએપ મેસેજ મોકલીને રોજના 2-3 હજાર રૂપિયા કમાવવાની ઓફર કરવામાં આવી હતી અને અંતે તેના ખાતામાંથી 37 લાખ રૂપિયા ઉપાડી લેવામાં આવ્યા હતા. ચાલો જાણીએ શું છે આ સ્કેમ.. 

મહિનામાં 90,000 રૂપિયા સુધીની કમાણી કરવાની ઓફર 
મીડિયા રિપોર્ટ્સ અનુસાર મહારાષ્ટ્રના થાણેમાં રહેતા એક વ્યક્તિનો વર્તમાન જોબ કોન્ટ્રાક્ટ ટૂંક સમયમાં સમાપ્ત થવા જઈ રહ્યો છે, ત્યારબાદ તેણે ઓનલાઈન રિક્રુટમેન્ટ પોર્ટલ પર પોતાનો રિઝ્યૂમે શેર કર્યો. આ પછી વ્યક્તિને ઇન્સ્ટન્ટ મેસેજિંગ એપ પર અજાણ્યા નંબર પરથી મેસેજ આવ્યો. આ મેસેજમાં નવી જોબની ઓફર હતી અને આ જોબ પાર્ટ ટાઈમ હતી. એ વ્યક્તિને આ પાર્ટ ટાઈમ જોબમાં રોજના 2000 થી 3000 રૂપિયા કમાવવાની તક મળશે તેવી લાલચ આપવામાં આવી હતી. એટલે કે યુઝર એક મહિનામાં 90,000 રૂપિયા સુધીની કમાણી કરી શકે છે. 

ફોટો લાઇક કરવાનું કામ 
સ્કેમર્સે એ વ્યક્તિને કહ્યું કે પાર્ટ ટાઈમ જોબમાં યુઝર્સને ઈન્સ્ટાગ્રામ પર સેલિબ્રિટીના ફોટો લાઈક કરવા પડશે. એક લાઈક પર 70 રૂપિયા આપવામાં આવશે. આ માટે દરેક લાઈકના સ્ક્રીનશોટ શેર કરવાના રહેશે. વિશ્વાસ જીતવા માટે પહેલા એ વ્યક્તિને 210 રૂપિયાની ચુકવણી કરવામાં આવી હતી. 

ટેલિગ્રામ ગ્રુપમાં એડ કરવામાં આવ્યો 
આ પછી એ વ્યક્તિને એક ટેલિગ્રામ ગ્રુપમાં એડ કરવામાં આવ્યો. આ પછી એ વ્યક્તિએ વધુ વળતરની લાલચ આપવામાં આવી અને ક્રિપ્ટોકરન્સી ખરીદવાનું કહેવામાં આવ્યું. અહેવાલો અનુસાર વ્યક્તિએ શરૂઆતમાં 9,000 રૂપિયાનું રોકાણ કર્યું હતું અને તેને 9,980 રૂપિયાનું વળતર મળ્યું હતું. વિશ્વાસ મેળવ્યા પછી વ્યક્તિએ વધુ પૈસા રોક્યા અને આ પછી તેને VIP એકાઉન્ટ સ્ટેટસ આપીને વધુ પૈસા રોકવા માટે કહેવામાં આવ્યું. 

37 લાખ રૂપિયા ગુમાવ્યા 
આ પછી એ વ્યક્તિએ લગભગ 37 લાખ રૂપિયાનું રોકાણ કર્યું. આ પછી સ્કેમર્સે કોઈ વળતર આપ્યું ન હતું. આ પછી તેને ખબર પડી કે તે એક સ્કેમનો શિકાર બન્યો છે. આ અંગે તે વ્યક્તિએ પોલીસમાં ફરિયાદ કરી છે.