અમદાવાદ / ડેન્ગ્યુ-સ્વાઈન ફ્લૂના કેસમાં ઉછાળો થતા જ હોસ્પિટલોમાં વધી દર્દીઓની દોડધામ

છેલ્લા પખવાડિયામાં શહેરની હોસ્પિટલોમાં ડેન્ગ્યુ અને સ્વાઈન ફ્લૂના કેસોમાં ઓચિંતો વધારો થતાં તાવ, શરીરમાં દુખાવો અને ડિહાઇડ્રેશનની ફરિયાદ સાથે વધુ ને વધુ દર્દીઓ સારવાર માટે પહોંચી રહ્યા છે.

ડોક્ટર્સના જણાવ્યા મુજબ હોસ્પિટલમાં દાખલ થનારા દર્દીઓની સંખ્યા વધવા પાછળ પ્લેટલેટ્સમાં નોંધપાત્ર ઘટાડો, સતત ઝાડા-ઊલટી અને ત્રણ-ચાર દિવસ કરતાં વધુ સમય સુધી રહેતો તાવ (હાઈ ફીવર) જેવાં પરિબળો જવાબદાર છે. આ વધારો મુખ્યત્વે યુવા દર્દીઓમાં જોવા મળી રહ્યો છે. એમાંના ઘણા દર્દીઓ વાઇરલ ઇન્ફેક્શન અને મચ્છરના કરડવાના સંપર્કમાં આવ્યા હોવાનું તબીબોએ જણાવ્યું છે.

ડોક્ટર્સનું કહેવું છે કે મોટા ભાગના દર્દીઓની ઉંમર ૫૦ વર્ષથી ઓછી છે. દર્દીઓની સંખ્યા વધુ છે, પરંતુ બીમારીની ગંભીરતા મોટી ચિંતાનો વિષય નથી. દર્દીઓ સામાન્ય રીતે તેમનાં લક્ષણોની તીવ્રતા અનુસાર ચારથી પાંચ દિવસમાં સાજા થઈ જાય છે.

ડોક્ટર્સના જણાવ્યા મુજબ લાંબા સમય સુધી હાઈ ફીવર રહેતાં શરીરમાંથી પરસેવા અને ઝડપી શ્વાસોચ્છ્વાસ દ્વારા મોટા પ્રમાણમાં પ્રવાહી ઘટી શકે છે. તેના કારણે ડિહાઇડ્રેશન અને સંબંધિત તકલીફો ઊભી થઈ શકે છે અને દર્દીને હોસ્પિટલમાં દાખલ કરવાની જરૂર પડી શકે છે.

તબીબોના કહેવા અનુસાર શ્વેત રક્તકણો (WBC)ની સંખ્યામાં ઘટાડો પણ ચિંતાનો વિષય છે. દર્દીઓ સામાન્ય રીતે શરીરમાં દુખાવો, ઊબકા, માથાનો દુખાવો અને સમગ્ર શરીરમાં અસ્વસ્થતા જેવાં લક્ષણો સાથે આવે છે. ડેન્ગ્યુ અને અન્ય વાઇરલ ઇન્ફેક્શનમાં ઊંચો તાવ જેવાં લક્ષણો એકસરખાં હોઈ શકે છે, તેથી સારવારનો અભિગમ નક્કી કરવા લેબોરેટરી રિપોર્ટ જરૂરી બને છે.

તબીબોના કહેવા પ્રમાણે ડેન્ગ્યુ અને H1N1 બંનેથી સંક્રમિત દર્દીઓ સામે આવી રહ્યા છે. શરૂઆતના કેસો ઔદ્યોગિક વિસ્તારો અને નવા બાંધકામ તથા ખુલ્લી જગ્યાઓ ધરાવતા વિસ્તારોમાંથી નોંધાયા હતા. શહેરમાં વરસાદના અંતરાલમાં રહેલાં ગાબડાંના કારણે આ સિઝન લાંબી ચાલી છે.

ડોક્ટર્સના જણાવ્યા મુજબ બહુ ઓછા દર્દીઓ ગંભીર બીમારીનો ભોગ બને છે. આશરે બેથી ત્રણ ટકા દર્દીઓમાં ગંભીર લક્ષણો વિકસે છે, ખાસ કરીને નબળી રોગપ્રતિકારક શક્તિ ધરાવતા અથવા અગાઉથી અન્ય બીમારી ધરાવતા દર્દીઓમાં આવું વધુ જોવા મળ્યું છે.

ડોક્ટર્સે જણાવ્યું છે કે સતત તાવ, ભારે નબળાઈ, પેશાબનું પ્રમાણ ઘટવું, શ્વાસ લેવામાં તકલીફ, રક્તસ્રાવ, વારંવાર ઊલટી અથવા ડિહાઇડ્રેશનનાં લક્ષણો જણાય તો તાત્કાલિક તબીબી સારવાર લેવી જોઈએ.

આ પણ વાંચોઃ ₹ 28.19 લાખના MD ડ્રગ્સ સાથે અમદાવાદમાંથી ત્રણ આરોપીઓની ધરપકડ

ડેન્ગ્યૂને સમજીએ

• ડેન્ગ્યૂનું સામાન્ય લક્ષણ બે દિવસથી વધુ સમય સુધી રહેતો ઉંચો તાવ છે.
• તેની સાથે શરીરમાં દુખાવો, સ્નાયુઓમાં દુખાવો અને ચામડી પર ચકામા પણ થઈ શકે છે.
• ગંભીર ચેપથી દર્દીમાં પ્લેટલેટ્સ ઘટી શકે છે, જેના કારણે રોગપ્રતિકારક શક્તિ પર પણ અસર થઈ શકે છે.
• સાજા થવામાં સામાન્ય રીતે 5 દિવસથી 2 અઠવાડિયા લાગી શકે છે; સમયગાળો બીમારીની ગંભીરતા પર આધારિત છે.
• તાવ માટે જાતે દવા લેવાનું ટાળવું અને દર્દીના પ્લેટલેટ કાઉન્ટ પર નજીકથી નજર રાખવી.
• WBC અને પ્લેટલેટ કાઉન્ટમાં ઘટાડો જોવા મળે તો તેને તબીબી સારવારની જરૂરિયાતના સંકેત તરીકે જોવો જોઈએ.
• નિષ્ણાતોની સલાહ: દર્દીને પૂરતું પ્રવાહી, પૌષ્ટિક આહાર અને આરામ આપવો.

બધા જ સમાચાર અને અપડેટ્સ મેળવવા માટે પ્લેસ્ટોર/એપ સ્ટોર પર જઇને અથવા આ લાઇન પર ક્લિક કરીને ડાઉનલોડ કરો અમારી લેટેસ્ટ એપ