ઇલેક્શન 2022 / સિનિયર નેતાઓનો ચૂંટણી નહીં લડવાનો નિર્ણય પાર્ટીનો હતો કે પોતાનો? રૂપાણીએ જુઓ શું આપ્યો જવાબ

• મલ્લિકાર્જૂન ખડગેના વિવાદિત નિવેદન પર રૂપાણીની પ્રતિક્રિયા
• રાવણ સાથેની તુલના ગુજરાતીઓનું અપમાન : રૂપાણી
• આ નિવેદનથી કોંગ્રેસને નુકસાન થશે : રૂપાણી

ગુજરાત વિધાનસભાની ચૂંટણી માથે છે. ત્યારે રાજકીય ગરમાવો ચરમસીમાંએ પહોચ્યો છે.  પ્રચારકો એકબીજા પર પ્રહારો કરી રહ્યાં છે.  તેવામાં ચૂંટણીના પ્રચાર માટે ગુજરાતની મુલાકાતે આવેલા મલ્લિકાર્જૂન ખડગેએ ગઇકાલે વડાપ્રધાન મોદીને લઇને નિવેદન આપ્યુ હતુ. જેને લઇને ભાજપના અલગ અલગ નેતાઑમાં વિરોધ છેડાયો  છે. ગુજરાતના મુખ્યમંત્રીએ ટ્વિટ કરીને ખડગેના નિવેદન સામે પ્રતિક્રિયા આપ્યા બાદ પૂર્વ મુખ્યમંત્રી વિજય રૂપાણીનું પણ નિવેદન સામે આવ્યું છે.

 
આ વખતે કોંગ્રેસ માત્ર પોતાના અસ્તિત્વ માટે લડી રહી છે : રૂપાણી
મલ્લિકાર્જૂન ખડગેના વિવાદિત નિવેદન પર વિજય રૂપાણીએ પ્રતિક્રિયા આપી કહ્યું કે, વડાપ્રધાનની રાવણ સાથેની તુલના ગુજરાતીઓનું અપમાન છે. ગુજરાત ચુંટણી ટાણે આ નિવેદનથી કોંગ્રેસને નુકસાન થશે. ગુજરાતીઓ આ ટિપ્પણીને ક્યારેય સહન નહીં કરે. વધુમાં તેમણે કહ્યું કે 2017માં કોંગ્રેસની લહેર હતી. જેને લઇને કોંગ્રેસ માનતી હતી કે તેની સરકાર બનશે. પાટીદાર આંદોલન, ઉનાકાંડને લઇને કોંગ્રેસની સ્થિતિ મજબૂત હતી. પરંતુ 5 વર્ષમાં કોઇ આંદોલન થયું નથી.

બીજી બાજુ 15 MLA ભાજપમાં આવી ગયા હોવાથી આ વખતે કોંગ્રેસ નિરાશ છે. જેને લઇને આ વખતે કોંગ્રેસ માત્ર પોતાના અસ્તિત્વ માટે લડી રહી છે. તો કેજરીવાલ કોંગ્રેસની બેઠકોમાંથી જીત મેળવશે તેવું માને છે. પરંતુ આ વખતે માહોલ અમારી તરફેણમાં હોવાનો વિજય રૂપાણીએ દાવો કર્યો હતો. 

ચુંટણી ન લડવાના કારણમાં જુઓ શું બોલ્યા વિજય રૂપાણી ?
ચુંટણી ન લડવાના પાછળના કારણ અંગે જણાવતા વિજય રૂપાણીએ કહ્યું હતું કે, આ વખતે યુવાઓને મોકો મળે તે માટે ભાજપના નેતાઑએ સાથે મળીને નિર્ણય લીધો હતો. જેના માટે અમે સિનિયર નેતાઓએ એક સૂર થઈ ચુંટણી ન લડવાનો નિર્ણય કર્યો હતો. વધુમાં તેમણે દાવો કર્યો કે આ વખતે રાજકોટમાં નવા લોકોને મોકો આપ્યો છે. જે ચારે'ય સીટ પર અમારી જીત નક્કી છે. કારણ કે રાજકોટ વર્ષોથી ભાજપનું ગઢ છે.

જુઓ મલ્લિકાર્જુન ખડગે શું બોલ્યા હતા? 
 ઉલ્લેખનીય છે કે અમદાવાદમાં ગુજરાત ચુંટણીના પ્રચારને લઇને કોંગ્રેસ નેતા મલ્લિકાર્જુન ખડગે આવ્યા હતા. આ દરમિયાન તેમણે કહ્યું કે મોદી લોકોને પોતાનો ચહેરો જોઈ મત કરવા હાંકલ કરે છે. તો શું એ રાવણની જેમ એક કરતા વધુ માથા છે કે અલગ-અલગ મતની માગણી કરો છો? જેને લઇને  ચારેકોર શાબ્દિક યુદ્ધ જામ્યું છે.