દર્શિલ ઠક્કરના માતા-પિતા સહિત ચાર સભ્યો અમેરિકા રવાના
અમેરિકામાં અકસ્માતમાં મૃત્યુ પામેલા પાટણના દર્શિલ ઠક્કરના અંતિમ સંસ્કાર અમેરિકામાં જ કરવામાં આવશે. જેથી દર્શિલ ઠક્કરના માતા-પિતા સહિત ચાર સભ્યો અમેરિકા જવા રવાના થયા છે. મહત્વનું છે કે, ટુરિસ્ટ વિઝા પર અમેરિકા ગયેલા દર્શિલને રોડ ક્રોસ કરતી વખતે કારચાલકે અડફેટે લીધો હતો. જેમાં તેનું કમકમાટીભર્યું મૃત્યુ નિપજ્યું હતું.
રોડ ક્રોસ કરતી વખતે કારે મારી ટક્કર
ગુજરાતના પાટણ શહેરનો રહેવાસી દર્શિલ ઠક્કર 4 મહિના માટે ટુરિસ્ટ વિઝા પર અમેરિકા ફરવા ગયો હતો. ગત 29 જુલાઈના રોજ અમેરિકાના હ્યુસ્ટન શહેરમાં દર્શિલ મિત્ર સાથે ફરવા નીકળ્યો હતો. અમેરિકાના હ્યુસ્ટન શહેરમાં દર્શિલ સિગ્નલ બંધ હતું ત્યારે રોડ ક્રોસ કરી રહ્યો હતો, આ દરમિયાન અચાનક સિગ્નલ ચાલું થઈ ગયું હતું. આ દરમિયાન એક કારે દર્શિલને ટક્કર મારી હતી અને પછી 14 જેટલી ગાડીઓ તેના ઉપરથી પસાર થઈ ગઈ હતી. આ અકસ્માતમાં દર્શિલ ઠક્કરનું ઘટના સ્થળે જ મૃત્યુ નિપજ્યું હતું.
અમેરિકાના હ્યુસ્ટન શહેરમાં 'હિટ એન્ડ રન'માં પાટણના યુવકનું મોત, સિગ્નલ બંધ હતું એ દરમિયાન રોડ ક્રોસ કરતાની સાથે જ સિગ્નલ ખુલ્યું અને આ અકસ્માત સર્જાયો, આવતા મહિને જ યુવક આવવાનો હતો ભારત #america#gujarat#patan#vtvgujaratipic.twitter.com/Bf2nAcxBK1
— VTV Gujarati News and Beyond (@VtvGujarati) August 3, 2023
મોતના સમાચાર મળતા જ પરિવારજનોમાં શોક
મિત્રએ જ ગુજરાતમાં દર્શિલના પરિવારજનોને તેના મૃત્યુના દુઃખદ સમાચાર આપ્યા હતા. દર્શિલના મોતના સમાચાર મળતા જ પરિવારજનોમાં શોકનો માહોલ છવાઈ ગયો હતો. જે બાદ પરિવારજનોએ મૃતદેહને ભારત લાવવા માટે અધિકારીઓ સાથે સંપર્ક કર્યો હતો, પરંતુ મૃતદેહની હાલત ખરાબ હોવાને કારણે તેને ભારત મોકલવો સંભવ નથી. જેથી દર્શિલના માતા-પિતા સહિત ચાર સભ્યો અમેરિકા જવા રવાના થયા છે.
મૃતક દર્શિલ ઠક્કર
ટુરિસ્ટ વિઝા પર અમેરિકા ગયો હતો દર્શિલ
મહત્વનું છે કે, પાટણનો દર્શિલ ટુરિસ્ટ વિઝા પર ચાર મહિના માટે અમેરિકા ફરવા ગયો હતો અને તે 26 સપ્ટેમ્બરના રોજ ઘરે પરત આવવાનો હતો. આ પહેલા જ તેનું અમેરિકામાં અકસ્માતમાં મોત નિપજ્યું છે.
અમદાવાદના વર્સિલ પટેલનું પણ થયું હતું મોત
અત્રે ઉલ્લેખનીય છે કે, ગયા મહિને જુલાઈમાં કેનેડામાં રોડ અકસ્માતમાં અમદાવાદના વર્સિલ પટેલ (ઉં.વ 19)નું મૃત્યુ નિપજ્યું હતું. વર્સિલ પટેલ હાયર એજ્યુકેશન માટે કેનેડા ગયો હતો. તે કેનેડાના ઓન્ટારિયો પ્રોવેન્સના બેરી શહેરમાં રહેતો હતો. વર્સિલ પટેલ સર્કલ કે કન્વીનિયન્સ સ્ટોરમાં કામ કરતો હતો. તે 21 જુલાઈ રોજ દરરોજની જેમ ચાલીને નોકરીએ જઈ રહ્યો હતો ત્યારે એક કારે તેને ટક્કર મારી હતી. રોડ અકસ્માતમાં વર્સિલ પટેલ ગંભીર રીતે ઈજાગ્રસ્ત થતાં તેનું મોત નિપજ્યું હતું.
